Íslenskt mál og almenn málfræði - 2020, Page 204

5.3 Samantekt
Í þessum kafla hefur verið fjallað um forspárgildi nokkurra breyta um
enskunotkun 13–15 ára þátttakenda í vefkönnuninni. Skoðað var hvort
notkun þeirra á stafrænum miðlum og viðhorf þeirra til enskunotkunar
geti skýrt hversu mikið þeir nota ensku sjálfir. Í ljós kom að viðbrögð
þátttakenda við fullyrðingum í (5a–d), sem ætlað var að endurspegla við -
horf þátttakenda, spá best fyrir um enskunotkun þeirra í heild og betur
um virka ensku notkun (tal og skrif) en óvirka (hlustun og lestur). Við -
brögð við þessum fullyrðingum sýndu að íslenskir unglingar eru almennt
jákvæðir gagnvart ensku og enskunotkun. Þessar niðurstöður virðast
nokkuð traustar miðað við það sem áður var sagt um áhrif viðhorfa á mál
og málnotkun (sbr. 2. kafla), þ.e. að þeir sem hafa jákvætt viðhorf til til-
tekins máls séu líklegir til að nota það meira en þeir sem eru neikvæðari
gagnvart því. Niðurstöðurnar í þessum aldurshópi benda til þess að raun-
veruleg fylgni sé á milli viðbragða við fullyrðingunum og þess hversu
mikið þátttakendur nota ensku, þannig að þeir sem eru jákvæðir gagnvart
ensku og enskunotkun noti hana líka mikið.
Einnig var athugað hvert forspárgildi notkunar á stafrænum miðlum
væri, þ.e. þess að horfa á sjónvarpsstöðvar, efni af netinu í gegnum efnis-
veitur, vefgáttir eða smáforrit og þess að spila tölvuleiki, um enskunotkun
13–15 ára unglinganna. Þar kom í ljós að tvennt hafði mest áhrif á óvirka
enskunotkun (hlustun og lestur), annars vegar áhorf á efni af netinu og
hins vegar tölvuleikir án samskipta. Það sem spáði aftur á móti best fyrir
um virka enskunotkun voru annars vegar tölvuleikir með samskiptum og
hins vegar dagleg notkun tölva og snjalltækja. Þessir þættir virðast því
geta stuðlað að því að íslenskir unglingar noti ensku.
6. Lokaorð
Í lokin er rétt að draga efni greinarinnar saman. Hér hefur verið farið yfir
niðurstöður úr hluta rannsóknarverkefnisins Greining á málfræðilegum
afleiðingum stafræns málsambýlis en með þeim var stafrænt málumhverfi
þátttakenda á aldrinum 13–98 ára kortlagt, enskunotkun þeirra skoðuð
sem og viðhorf til enskunotkunar. Rannsóknarspurningar greinarinnar
voru eftir farandi:
(1) Hvernig er stafrænt málumhverfi þátttakenda? Hvernig er notkun
þátttakenda á stafrænum miðlum háttað?
Dagbjört Guðmundsdóttir o.fl.204