Gerðir kirkjuþings - 2021, Síða 29

29
Auglýsing um breytinguna hefur verið birt í Stjórnartíðindum og starfsreglurnar verið
uppfærðar á vef kirkjunnar, kirkjan.is. Breytingarnar taka gildi 1. maí 2021.
46. mál. Þingsályktun um frekari stefnumótun þjóðkirkjunnar.
Kirkjuráð samþykkti að leggja fyrir kirkjuþing í samráði við forsætisnefnd, tillögu til
þingsályktunar um frekari stefnumótun þjóðkirkjunnar. Kirkjuþing samþykkti að haldið
yrði áfram með vinnu við stefnumótun þjóðkirkjunnar sem hófst í upphafi árs og að
kirkjuráð fylgi því áfram eftir.
Kirkjuráð fól stýrihópnum að halda áfram með þá vinnu sem þegar var hafin í samráði
við dr. Bjarna Snæbjörn Jónsson.
47. mál. Þingsályktun um breytingu á heiti Fjölskylduþjónustu kirkjunnar.
Kirkjuþing samþykkti að heiti Fjölskylduþjónustu kirkjunnar yrði breytt í Fjölskyldu-
og sálgæsluþjónustu kirkjunnar. Sálgæsluhugtakið hefur víðtækari skírskotun til þjónustu
en hugtakið fjölskylduþjónusta. Kirkjunni er hugtakið dýrmætt, en það fjallar um að hlúa
að fólki og fjölskyldum í fjölbreyttum aðstæðum.
48. mál. Starfsreglur um breytingu á starfsreglum um Fjölskylduþjónustu kirkjunnar nr.
951/2009, með síðari breytingum.
Starfsreglurnar fela í sér formlegar breytingar svo þær samrýmist þeirri nafnabreytingu
sem samþykkt var í 47. máli. Jafnframt var fellt brott ákvæði um að kirkjuráð setti
forstöðumanni erindisbréf enda dugar ráðningasamningur í því samhengi.
Auglýsing um breytinguna hefur verið birt í Stjórnartíðindum og starfsreglurnar verið
uppfærðar á vef kirkjunnar, kirkjan.is.
49. mál. Þingsályktun um innra eftirlit og áhættugreiningu.
Kirkjuþing fól kirkjuráði að koma á innra eftirliti og áhættugreiningu varðandi
fjárfestingar, í samræmi við drög að heildstæðri eignastefnu sem kynnt var á kirkjuþingi
12. mars 2021.
Kirkjuráð samþykkti að fela Svönu Helen Björnsdóttur, verkfræðingi, að taka að sér
innleiðingarvinnu á innra eftirliti og áhættugreiningu varðandi fjárfestingar. Sú vinna hefur
þó ekki farið í gang þar sem eðlilegt þótti að bíða meðan unnið er að nýju skipulagi hjá
yfirstjórn þjóðkirkjunnar.
- Ályktanir og starfsreglur aukakirkjuþings 2021 í júní, ágúst og október
1. mál. Þingsályktun um kjarasamning Prestafélags Íslands og kjaranefndar kirkjunnar
fyrir hönd Þjóðkirkjunnar-Biskupsstofu.
Kjaranefnd kirkjunnar hefur samkvæmt starfsreglum, óskorað umboð til að koma
fram sem samningsaðili fyrir hönd Þjóðkirkjunnar-Biskupsstofu gagnvart stéttarfélögum
hlutaðeigandi starfsfólks eða öðrum þeim sem umboð hafa til slíkrar samningsgerðar.
Samningar kjaranefndar skulu þó undirritaðir með fyrirvara um samþykki kirkjuþings.