Gerðir kirkjuþings - 2021, Qupperneq 81

81
12. mál 2020-2021
Flutt af forsætisnefnd
Starfsreglur um kjaranefnd Þjóðkirkjunnar.
1. gr.
Kirkjuþing kýs kjaranefnd Þjóðkirkjunnar. Í starfsreglum þessum skal heiti nefndarinnar
vera kjaranefnd kirkjunnar.

2. gr.
Hlutverk kjaranefndar kirkjunnar er:
1. Að gæta hagsmuna Þjóðkirkjunnar gagnvart samtökum þeirra launþega sem ráðnir
eru þar til starfa, sérstaklega að því er varðar kaup og kjör.
2. Að koma fram sem samningsaðili fyrir hönd Þjóðkirkjunnar gagnvart stéttarfélögum
hlutaðeigandi starfsfólks eða öðrum þeim, sem umboð hafa til slíkrar samningsgerðar.
3. Að vinna að því að móta starfskjarastefnu Þjóðkirkjunnar.
4. Að ákvarða laun biskups Íslands og vígslubiskupa.
3. gr.
Kjaranefnd kirkjunnar hefur ótakmarkað umboð til samningsgerðar við þá sem
tilgreindir eru í 2. tölul. 2. gr. Samningar og ákvarðanir kjaranefndarinnar skulu þó
undirritaðir með fyrirvara um samþykki kirkjuþings.
4. gr.
Þegar kjaranefnd ákvarðar laun og önnur starfskjör biskups Íslands og vígslubiskupa
aflar nefndin af sjálfsdáðum nauðsynlegra gagna og upplýsinga. Í því skyni getur nefndin
óskað eftir skýrslum, munnlegum og/eða skriflegum til að tryggja fagleg vinnubrögð, að
mál séu hæfilega rannsökuð áður en ákvarðanir eru teknar og að þeir sem ákvarðanir
beinast að komi sjónarmiðum sínum að. Nefndin getur og heimilað málsaðilum að reifa
mál sitt fyrir kjaranefnd.
Kjaranefnd skal meta árlega hvort tilefni sé til breytinga á launum biskups Íslands og
vígslubiskupa.
5. gr.
Kjaranefnd kirkjunnar er skipuð þremur aðalmönnum og þremur til vara, sem kosnir
eru til fjögurra ára í senn. Skulu nefndarmenn vera skráðir í Þjóðkirkjuna og mega þeir ekki
gegna launuðu starfi sem greitt er fyrir af hálfu Þjóðkirkjunnar. Enginn getur setið nema
tvö kjörtímabil samfellt í nefndinni. Nefndin er kosin á þriðja reglulega kirkjuþingi eftir
kirkjuþingskosningar. Kirkjuþing ákveður hver skuli vera formaður kjaranefndarinnar,
auk þess sem kosinn skal varaformaður. Varamenn taka sæti í þeirri röð sem þeir eru
kosnir til. Skal fyrsti varamaður gegna formennsku í kjaranefndinni hátti svo til að allir
aðalmenn í kjaranefnd starfi ekki að tilteknum samningum.