Gerðir kirkjuþings - 2021, Síða 130

130 131
Lagt er til að þjóðkirkjan vinni á þremur sviðum í þjónustunni við innflytjendur og
flóttamenn er varða réttindi þeirra, trú, menningu og félagsmál auk þess að koma á fót
samfylgdarkerfi (mentor).
Réttindi
Kirkjan vinnur gegn fordómum, útskúfun og hvers konar ofbeldi gagnvart fólki
með erlendan bakgrunn í nærsamfélagi og opinberri umræðu. Þetta er hluti af
málsvarnarhlutverki hennar sem fólgið er í réttindagæslu og ráðgjöf. Kirkjan veitir þó
ekki lögfræðiþjónustu heldur veitir andlegan og mannúðlegan stuðning.
Trú
Þjóðkirkjan skipuleggur fjölbreytt helgihald í samvinnu við innflytjendur t.d. á
tungumálum sem þeir skilja með tónlist frá löndum þeirra. Sóknarbörnum verði boðið í
slíkt helgihald við sérstök tilefni t.d. á hátíðum kirkjunnar. Unnið verði að því að hjálpa
innflytjendum að finna sig sem hluta safnaðanna, jafnvel í guðsþjónustu á þeirra eigin
tungumálum. Þeim verði boðin fræðsla um kristna trú enda eru margir þeirra opnir fyrir
henni. Hugað verði að þörfum barna og unglinga í þessum hópi.
Menning og félagsmál
Móttökusöfnuðir bjóði flóttafólki og innflytjendum upp á íslenskunámskeið án
endurgjalds. En slík námskeið verði sem mest fjármögnuð með styrkjum. Á slíkum
námskeiðum gefst þátttakendum gott tækifæri til að kynnast starfi safnaðanna og traust
og tengsl geta myndast.
Mikilvægt er að bjóða upp á kynningu á íslensku samfélagi en einnig á sögu og menningu
innflytjenda. Prjóna- og handavinnusamverur, kynning á matar- og danshefðum eru dæmi
um það sem hægt er að gera til að byggja brýr á milli ólíkra menningarheima.
Samfylgdarkerfi (mentor)
Móttökusöfnuðir komi á fót samfylgdarkerfi. Samfylgdarkerfi er fyrir hendi t.d. hjá
Rauða krossinum fyrir fólk sem er komið með alþjóðlega vernd. Það er fólgið í því að
einstaklingar eða fjölskyldur taka að sér flóttafólk, einstaklinga eða fjölskyldur til að vera
þeim til stuðnings. Þetta er sjálfboðaliðastarf. Mikill fengur væri að koma slíku kerfi á fót
í söfnuðum sem þjóna flóttafólki. Þá myndi kirkjan leggja sérstaka áherslu á fólk sem ekki
hefur hlotið alþjóðlega vernd og er í biðstöðu.
Öflugt samstarf
Til þess að eftirfarandi framtíðarsýn geti orðið að veruleika er ljóst að öflugt samstarf
þarf að vera á milli framkvæmdanefndar málefnis innflytjenda og flóttamanna annars
vegar og yfirstjórnar, fræðsludeildar og annarra aðila um einstök mál.