Gerðir kirkjuþings - 2021, Blaðsíða 131

131
V. KAFLI
Framtíðarsýn
Lögð er fram framtíðarsýn kirkjunnar annars vegar til eins árs og hins vegar til fjögurra
ára.
Lagt er til að eftir eitt ár verði eftirfarandi orðið að veruleika:
• Móttökusöfnuðir hafa verið skipaðir.
• Móttökusöfnuðir bjóði upp á helgihald og sálgæslu fyrir flóttafólk og innflytjendur.
• Kirkjustjórnin talar fyrir þessum málaflokki í kirkjunni og á opinberum vettvangi.
Lagt er til að á næstu fjórum árum verði eftirfarandi orðið að veruleika:
• Margir innflytjendur sæki messur og fleiri tungumál en íslenska fái að hljóma þar.
Tónlist og sálmar frá þeirra heimalöndum verði notuð. Fólk geti einnig iðkað trúna
á sínu móðurmáli í húsum þjóðkirkjunnar.
• Helgihaldi verði streymt.
• Fullorðinsskírnum fjölgi.
• Messuskrár á ýmsum tungumálum.
• Myndband með leiðbeiningum um skráningu í þjóðkirkjuna.
• Myndbönd með fræðsluefni um kristna trú og þjóðkirkjuna.
• Sjálfboðaliðum hafi fjölgað.
• Fræðsla/þjálfun sjálfboðaliða sem þjóna í starfi fyrir innflytjendur.
• Fræðsluhópar fyrir fólk með sams konar erfiðleika, t.d. sorg og áföll hafi verið
myndaðir.
• Ýmiss konar hjálparstarf fyrir flóttafólk í móttökusöfnuðum, t. d. leikfanga- og
fataúthlutun.
• Safnaðarheimili móttökusafnaðanna/Breiðholtskirkju verði orðin að miðstöð
fjölþjóðlegra menningarsamskipta.
• Samfylgdarkerfið (mentor) hafi festst í sessi.
• Aðstoð við heimanám fyrir börn innflytjenda verði í mörgum söfnuðum eins og
annað barnastarf.
• Vettvangur til að rjúfa einangrun og virkja félagsleg tengsl.
• Samræðuvettvangur fyrir fólk af mismunandi trúarbrögðum til að auðvelda þeim
að búa í sama samfélagi sem verði sýnilegur í þjóðfélaginu.
VI. Kafli
Alþjóðlegi söfnuðurinn
Í Breiðholtskirkju er söfnuður fólks á flótta í mótun undir nafninu Alþjóðlegi
söfnuðurinn. Hann hefur þróast út frá „Seekers samkomum“ með flóttafólki sem hófust
árið 2015 í Laugarneskirkju. Flóttafólk sem hefur fengið dvalarleyfi á Íslandi er kjarninn í
hópnum og hefur mótað söfnuðinn undanfarin ár.
Alþjóðlegi söfnuðurinn er ákveðin fyrirmynd fyrir starf á meðal flóttafólks í söfnuðum
landsins en þar koma innflytjendur, flóttafólk og Íslendingar saman í anda Krists.