Lögmannablaðið - 2024, Page 18

18 LÖGMANNABLAÐIÐ TBL 02/24
minna á mánuði en karlar. Þær eru með lægra tímagjald og með
rúmlega 100 þúsund króna lægri mánaðarlaun. Mestur munur
er 11% hjá fulltrúum, hjá innanhússlögmönnum er munurinn
9% og 8% hjá sjálfstætt starfandi lögmönnum. Til samanburðar
má geta þess að samkvæmt Hagstofu Íslands var óleiðréttur
launamunur kynjanna 9,1% árið 2022.
Gera má ráð fyrir að færri vinnustundir og þar með lægri laun
hjá konum í lögmannastétt séu afleiðing meiri heimilis- og
fjölskylduábyrgðar. Þar hallar á karla sem þurfa að vinna fleiri
vinnustundir í stað þess að taka ábyrgð á fjölskyldulífinu til jafns
á við maka sína. Þar geta vinnustaðir stigið inn og gert öllum
starfsmönnum kleift að samræma vinnu og einkalíf. Það er til
dæmis hægt að gera með því að móta fjölskyldustefnu sem hluta
af stefnumótun í mannauðsmálum.
Starfsumhverfi
Starfsumhverfi lögmannsstofa virðist henta konum verr en
starf hjá fyrirtækjum og stofnunum en þær sækja mun meira
í innanhússlögmennsku. Þetta er í samræmi við erlendar
rannsóknir sem hafa sýnt fram á að karlar séu mun líklegri til
að vera sjálfstætt starfandi lögmenn en konur líklegri til að starfa
hjá fyrirtækjum eða hinu opinbera.
Í fyrrnefndri könnun LMFÍ merktu 47% kvenna en 23% karla,
sem höfðu hætt að starfa á lögmannsstofu, við að þau teldu starfið
ekki nógu fjölskylduvænt en karlarnir gátu frekar hugsað sér að
starfa aftur á lögmannsstofu. Velta má upp hvort til séu leiðir til
að gera starf lögmanna á lögmannsstofum fjölskylduvænna. Er
t.d. vinnutími lögmanna á stofum nógu sveigjanlegur? Er hugað
nógu mikið að starfsaðstæðum lögmanna? Hvað er til ráða?
Konur innan karlastétta
Konur innan karlastétta mæta fjölbreyttum hindrunum sem
rekja má til áhrifa kynjakerfisins. Til að uppræta það innan
lögmannastéttar þarf að bregðast við misrétti en meðal þeirra
tillagna sem Maríanna lagði til var að gera konur innan LMFÍ
sýnilegri, gæta þess að konur fái sömu tækifæri og karlar innan
stéttarinnar, hvetja lögmannsstofur til að tileinka sér starfshætti
sem ögra staðalímyndum, stuðla að launajafnrétti kynjanna og
koma í veg fyrir að körlum innan stéttar sé umbunað umfram
konum.
Þess má svo geta að „glerþakið“ ósýnilega hamlar konum í
lögmannastétt en þær þurfa að hafa meira fyrir ímynd sinni og
trúverðugleika og mæta annars konar viðmóti heldur en karlar.
Skýrsla Maríönnu Hlífar er aðgengileg á heimasíðu LMFÍ.
Eyrún Ingadóttir
Það kemur á óvart í könnun LMFÍ hve stórt hlutfall lögmanna telur samspil vinnu og einkalífs ganga vel enda bendir ýmislegt
til þess að margt megi betur fara. Fjölskylduábyrgðin virðist enn liggja meira hjá konum en körlum.