Golf á Íslandi - 01.12.2010, Blaðsíða 40

40 GOLF Á ÍSLANDI • www.golf.is
„Ég get ekki verið annað en sáttur með árið. Ég
verð að viðurkenna að það kom mér svolítið á óvart
hversu vel mér gekk því ég æfði nánast ekkert síðasta
vetur. Ég snerti ekki kylfu fyrr en í mars sökum þess
að ég var að byggja hús myrkranna á milli fyrir fjöl-
skylduna. Þegar ég hugsa til baka þá var þetta e.t.v.
einmitt það sem ég þurfti því ég er búinn að vera
stanslaust í golfi frá árinu 1995. Þetta var kærkomið
frí,“ segir Hlynur sem telur sig hafa farið á taugum í
baráttunni um Íslandsmeistaratitilinn á Kiðjabergs-
velli, eina titilinn sem Hlyni vantar í safnið.
„Ég fann það strax í upphafi leiktíðar að ég var að
leika vel og fékk strax mikið sjálfstraust. Ég var ekki
langt frá Íslandsmeistaratitlinum en ég fór hreinlega
á taugum á seinni níu holunum á lokahringnum í
Kiðjabergi. Ég hef aldrei áður verið almennilega í bar-
áttunni um titilinn og þessi reynsla mun vafalaust
hjálpa mér í framtíðinni. Ég hef nægan tíma til að ná
þessum titli.“
Ber virðingu fyrir stigameistaratitlinum
„Ég hef alltaf borið mikla virðingu fyrir stigameist-
aratitlinum og ég held að flestir kylfingar sem taka
þátt á þessari mótaröð geri það einnig,“ segir Hlynur
þegar hann er spurður út í þýðingu þess að verða
stigameistari. Hann hlaut alls 6131,88 stig og fékk
einnig Júlíusarbikarinn fyrir lægsta meðalskorið á
mótaröðinni en hann lék á 71,31 höggi að meðaltali á
mótaröðinni í sumar.
„Stigameistaratitillinn er kannski ekki stærsti titilinn
á árinu en þetta sýnir hvaða kylfingur hefur leikið
best á tímabilinu. Mér þótti vænt um að hljóta Júlí-
usarbikarinn því sú verðlaun undirstrika hversu vel
ég lék í sumar og þetta er líklega mitt besta tímabil
á ferlinum,“ segir Hlynur en hvernig ætlar hann að
haga þátttöku sinni á mótaröðinni á næstu leiktíð?
„Ég efast um að ég muni taka þátt í öllum mótum á
næsta ári en ég get lofað því að ég verð í toppformi
í kringum Íslandsmótið í höggleik. Ég ætla að vera
duglegur að æfa í vetur og komast í betra líkamlegt
form,“ segir Hlynur sem varð aldrei neðar en í sjötta
sæti á mótaröðinni síðastliðið sumar.
Framtíð íslensks golfs gríðarlega björt
„Eimskipsmótaröðin var nokkuð góð í ár og það er
mikil gróska í unglingastarfinu. Það er greinilegt að
æfingaaðstaðan í Básum og Hrunakoti er að skila
nýrri kynslóð kylfinga sem eiga eftir að verða gríð-
arlega sterkir á næstu árum. Það eru kylfingar líkt og
Rúnar Arnórsson og Guðmundur Ágúst Kristjánsson
sem eru virkilega efnilegir og gætu orðið næstu
stjörnur Íslands. Framtíð íslensks golfs er gríðarlega
björt og það er hreinlega ótrúlegt hvað það er mikið
af hæfileikaríkum kylfingum á Íslandi,“ segir Hlynur
þegar hann er beðinn um að meta mótaröðina í
ár. Hann telur mjög jákvæða þróun ef hringjum í
stigamótunum verður fjölgað í þrjá eins og gerð var
tilraun með í sumar.
„Það var mjög ánægjulegt að sjá GSÍ taka þetta skref
að fjölga hringjum í stigamótum úr tveimur í þrjá og
þetta er það fyrirkomulag sem ég vil sjá í framtíð-
inni. Ég hef verið á þessari skoðun í mörg ár og svo
heppilega vildi til að ég vann mótið á Urriðavelli þar
sem þetta fyrirkomulag var prófað. Ég tel að það yrði
mótaröðinni til góðs ef að við værum alltaf með þrjá
hringi og svo niðurskurð eftir tvo hringi. Þetta eru
ekki það mörg mót að það sé ekki hægt að hefja leik
á föstudegi. Þegar ég var í boltanum í gamla daga þá
tók ég 20 daga í frí yfir sumarið og kylfingar ættu að
geta gert það sama.“
Hlynur er ánægður með þá umgjörð sem er í kring-
um mótaröðina þó alltaf megi gera betur. „Ég tel að
efla þurfi umfjöllun um mótaröðina í fjölmiðlum.
Þetta er næstfjölmennasta íþrótt landsins og GSÍ
verður að finna leið til þess að auka umfjöllun um
golf. Einnig þarf að vanda betur til verka við val á
mótsstöðum og hafa gæði valla í forgrunni.“
Fór á taugum í Kiðjabergi
Árið var afar viðburðarríkt hjá Selfyssingnum Hlyni Geir Hjartarsyni úr Keili. Hann
varð stigameistari á Eimskipsmótaröðinni eftir harða baráttu við Sigmund Einar
Másson úr GKG og er þetta í annað sinn sem Hlynur nær þessum titli. Hlynur náði
sínum fimmta sigri á ferlinum þegar hann lék best allra á Canon mótinu á Urriðavelli
í lok júní. Að auki var hann í sigurliði landsbyggðarinnar í KPMG-bikarnum og var
burðarás í íslenska landsliðinu sem náði sínum besta árangri frá upphafi þegar liðið
lenti í 19. sæti á Heimsmeistaramótinu í Argentínu. Það voru líka sigrar í einkalífinu
því Hlynur og Gunnhildur Hjaltadóttur kona hans, eignuðust sitt þriðja barn í október.
Golf á Íslandi fór yfir árið með Hlyni sem hann telur sitt besta á ferlinum.
G O L F Hlynur Geir