Morgunblaðið - 03.09.2003, Blaðsíða 35
MINNINGAR
MORGUNBLAÐIÐ MIÐVIKUDAGUR 3. SEPTEMBER 2003 35
og þá ein í einu nú í seinni tíð og var
gistingunum skipt jafnt á milli
þeirra. Sú sem var í gistingu var
borin á höndum þeirra og með-
höndluð eins og prinsessa. Einnig
var mikill spenningur þegar amma
gisti hjá okkur og var því einnig
skipt bróðurlega á milli hver ætti að
sofa upp í hjá ömmu. Þegar amma
kom í heimsókn brást aldrei að hún
kæmi með eitthvað handa prinsess-
unum sínum. Það var okkur mikil
huggun og góð minning að amma
Flóra var einmitt nýbúin að vera í
slíkri heimsókn í tengslum við 6 ára
afmæli Hjördísar Láru og gisti hún
hjá okkur í nokkrar nætur.
Flóra átti við hjartasjúkdóm að
stríða og var oft veik síðastliðinn
vetur en var mun hressari í vor og
sumar. Það er því ánægjulegt og
huggun fyrir okkur aðstandendur
að hugsa til þess að hún virtist njóta
sumarsins vel. Þau hjónin fengu
mikið af heimsóknum í sumar, bæði
vina og ættingja og naut hún þeirra
heimsóknar mjög. Daginn fyrir and-
látið tók hún á móti gestum og það
kvöldið fór hún á gospel tónleika, en
hún hafði mikið yndi af söng. Ég
held að Flóra hefði ekki viljað
kveðja með öðrum hætti og á stund-
um fannst mér eins og hún væri að
nýta sumarið sem best.
Mig langar til að ljúka þessari
grein með einni af þeim fjölmörgu
bænum sem Flóra kenndi stelpun-
um mínum og var í uppáhaldi hjá
henni.
Leiddu mína litlu hendi,
ljúfi Jesús, þér ég sendi
bæn frá mínu brjósti, sjáðu,
blíði Jesús, að mér gáðu.
(Ásmundur Eiríksson.)
Flóru vil ég þakka fyrir áralöng
góð kynni og bið guð að blessa
minningu hennar.
Laufey Ása.
Það eru margar ljúfar minningar
sem koma upp í huga okkar systk-
ina við andlát okkar elskulegu
ömmu Flóru. Þessar minningar eru
flestar tengdar Siglufirði en þar
bjuggu amma Flóra og afi Valli í
nær 50 ár og voru fastur punktur í
okkar tilveru.
Það voru dýrðardagar þegar við
systkinin vorum send til Siglufjarð-
ar sem börn, stundum saman og
stundum hvert í sínu lagi. Barna-
börnin voru ömmu allt og henni
fannst þessar heimsóknir okkar
yndislegar og hún gerði allt fyrir
okkur til að okkur liði sem best á
Háveginum.
Amma Flóra sá til þess að við
borðuðum vel á matmálstímum, sem
voru fimm sinnum á dag að sigl-
firskum sið. Hún hafði alltaf áhyggj-
ur af því að okkur væri kalt og ylj-
aði okkur með því að nudda hendur
og tær og var sífellt að prjóna á
okkur þykka ullarsokka og vett-
linga.
Það var árstíðabundið hvað var
gert okkur til skemmtunar á Sigló.
Á páskum fórum við á skíði upp í
Skarð með kleinur í poka frá ömmu.
Á sumrin fórum við í sund á Sól-
görðum og í bíltúr um Haganesvík.
Einnig var vinsælt að fara með okk-
ur í bíltúr fram á fjörð og út á gamla
flugvöllinn. Á sólardögum lágum við
í sólbaði á pallinum og borðuðum
frostpinna, sem voru alltaf til í
frystinum. Á meðan rótaði amma í
blómabeðunum sínum. Á haustin
var svo farið með okkur í berjamó
inn í Fljót og var amma ótrúlega
dugleg að tína ber. Á kvöldin lásum
við Tinnabækur og borðuðum fros-
inn bíóís, örbylgjupopp eða freyju-
staur.
Á þessum árum var drukkið soda-
stream með öllum mat og borðað
hrært skyr í hádeginu sem amma
keypti í Kaupfélaginu. Stundum fór-
um við með ömmu í vinnuna á Vöku-
skrifstofuna og fengum að pikka á
ritvél á skrifstofunni hennar. Amma
var alltaf óróleg þegar við vorum að
ferðast til og frá Siglufirði og var
ekki í rónni fyrr en við vorum komin
á áfangastað. Það var alltaf okkar
fyrsta verk að hringja norður og til-
kynna að við værum komin heilu og
höldnu heim eftir þessar Siglóferðir.
Við fengum margar góðar send-
ingar frá Sigló á afmælum og jólum
og amma skrifaði alltaf sérstaklega
fallegar kveðjur í öll kort sem hún
sendi til okkar. Einnig var fastur
liður að fá súkkulaðidagatal í des-
ember og páskaegg á páskum frá
ömmu og afa á Sigló.
Það er langt á milli Siglufjarðar
og Reykjavíkur svo amma og afi
fluttu til Hveragerðis fyrir sjö árum
til þess að vera nær fjölskyldunni.
Þá var hægt að skreppa í stuttan
bíltúr til Hveragerðis í heimsókn og
borða kleinur, soðið brauð og brún-
köku inni í eldhúsi hjá ömmu.
Hin síðari ár voru samskipti
hennar við Stefni bróður okkar
henni sérstaklega mikils virði. Það
var henni einnig mikil gleði að verða
langamma. Hún hélt mikið upp á
litla langömmubarnið sitt en bað
samt um að vera bara áfram kölluð
amma Flóra, en ekki langamma, því
eins og hún sagði; „ég er bara amma
Flóra“.
Við minnumst ömmu sem alveg
einstakrar manneskju sem fyllti líf
okkar af hlýju og ást. Skapstyrkur
hennar og röggsemi verður okkur
innblástur um ókomin ár. Minningin
um ömmu Flóru mun skipa stóran
sess í hjörtum okkar systkina og við
kveðjum ömmu með söknuði, en er-
um þakklát fyrir allar þær dýrmætu
stundir sem við áttum saman.
Fríða, Elsa Karen og Valtýr.
Elsku amma, ég sakna þín afar
mikið og hef ákveðið að kveðja þig
með nokkrum af þeim afar mörgu
minningum sem þú hefur skilið eft-
ir.
Ekkert var skemmtilegra en að
fara til ömmu og afa á Sigló. Ég fór
til þeirra þegar ég fékk frí frá skóla
hvort sem um var að ræða sumar-
eða vetrarfrí, þar tók amma manni
ætíð opnum örmum með mat og
frostpinna. Amma varðist, henni
fannst pottréttur, lambalæri og
hangikjöt mun betri matur en ham-
borgarar og pizzur borgarinnar og
sá til þess að við fengjum nóg af al-
mennilegum mat. Enda fannst
henni alltaf barnabörnin vera grind-
horuð og í hverri heimsókn var
byrjað á því að vigta mann inn svo
að það væri hægt að vitna í árangur
þegar farið var heim aftur og hún
búin að bæta einhverjum grömmum
á mann.
Amma stjórnaði heimilinu af
röggsemi og eitt sinn skipaði hún
mér og afa að koma flugunum í suð-
urglugganum út úr húsi. Sem og við
gerðum með lítilli handryksugu. Við
vöktum enga sérstaka aðdáun þegar
aðgerðin heppnaðist ekki betur en
svo að þegar við slökktum á ryksug-
unni þá flugu þær allar út aftur.
Amma var síprjónandi og þegar
ég var yngri átti ég alltaf lager af
peysum, sokkum og vettlingum frá
ömmu. Enda fylgdi hún því vel eftir
að maður færi almennilega klæddur
út á veturna. Hún tók vel á móti
manni með kakói eða einhverju
heitu hvort sem maður kom kaldur
úr snjóhúsinu eða af skíðum.
Á sumrin var farið í ferðir í kring-
um Siglufjörð og skoðað umhverfið
og sest út í náttúruna. Á haustin var
farið í berjamó með að sjálfsögðu
nóg nesti fyrir alla og vel það.
Alltaf var hægt að stóla á að fá
veitingar og faðmlag hjá ömmu. Eitt
sinn hringdi ég í hana þegar ég var
10 mínútur frá Hveragerði en samt
fékk ég kótilettur með öllu tilheyr-
andi þegar þangað var komið.
Elsku amma, ég þakka þér allar
samverustundirnar og hlýjuna sem
virtist vera ótakmörkuð.
Takk fyrir allt.
Þinn
Gunnlaugur.
Fyrsta minning mín um þig eru
fallega skrifuð bréf sem við fengum
um hver jól. Ég sat og horfði á
þessa fallegu rithönd og mig
dreymdi um að þegar ég yrði stór
myndi ég skrifa eins og þú. Þú varst
fyrsti tengiliðurinn við föðurætt
mína, ég hafði ekki hitt þig en af
myndum vissi ég hvernig þú leist út.
Þegar ég var orðin fullorðin heim-
sótti ég þig, fyrst á Siglufjörð og hin
síðari ár í Hveragerði. Þú tókst á
móti mér af þinni einstöku hlýju,
glaðværð og kærleik sem einkenndi
öll þau skipti sem við hittumst, mik-
ið var hlegið og grínast. Þá sýndirðu
mér myndir og fræddir mig um föð-
urfjölskyldu mína, og einnig um
pabba sem ég náði ekki að kynnast
almennilega. Mig langar til að
þakka fyrir bréfin sem þú sendir
mér við þau tækifæri sem við gátum
ekki hist, nú síðast við andlát
mömmu fyrir rúmu ári. Enn þá var
skriftin þín falleg, ég næ henni aldr-
ei. Takk fyrir allt. Samúðarkveðjur
til Valtýs, barnanna og fjölskyldna
þeirra.
Fríður Garðarsdóttir.
Afmælissamkoma
Kristniboðs-
sambandsins
SÍÐASTLIÐINN sunnudag var þess
minnst í báðum Reykjavíkur-
prófastsdæmunum að 50 ár eru nú
liðin frá því fyrstu íslensku kristni-
boðarnir héldu til starfa í Eþíópíu. Í
kvöld verður síðan sérstök afmæl-
issamkoma í Kristniboðssalnum,
Háaleitisbraut 58–60, norðurenda á
3. hæð. Hefst hún kl. 20 og þar
munu taka til máls Engida Kussia
frá Konsó í Eþíópíu og sr. Felix
Ólafsson kristniboði. Kanga-
kvartettinn syngur nokkur lög og
einnig mun Haraldur Ólafsson
kristniboði syngja, en hann er
staddur hér á landi í stuttri heim-
sókn. Samkoman er að sjálfsögðu
öllum opin og áhugafólk um
kristniboð sérstaklega hvatt til að
mæta.
Lofgjörðarstund fyrir
12 spora fólk
Í KVÖLD, miðvikudagskvöld, verð-
ur lofgjörðarstund í Hjallakirkju,
Kópavogi, kl. 20 fyrir fyrrum og
verðandi þátttakendur í 12 spora
námskeiðum á vegum fjölmargra
kirkna. 12 spora fólk er hvatt til að
mæta, gleðjast í söng og hefja vetr-
arstarfið með því að lofa Guð. Þor-
valdur Halldórsson og Margrét
Scheving leiða lofgjörðina.
Vinir í bata.
Dómkirkjan. Hádegisbænir kl. 12.10.
Léttur málsverður á eftir. Prestarnir taka
við fyrirbænum í síma 520 9700.
Hallgrímskirkja. Morgunmessa kl. 8. Hug-
leiðing, altarisganga, léttur morgunverður.
Háteigskirkja. Bænaguðsþjónusta kl. 11.
Súpa og brauð borið fram í Setrinu kl. 12.
Brids í Setrinu kl. 13–16. Kvöldbænir kl.
18.
Laugarneskirkja. Mömmumorgunn kl. 10
undir stjórn Aðalbjargar Helgadóttur. Nýjar
mömmur velkomnar með börnin sín.
Gönguhópurinn Sólarmegin leggur af stað
frá kirkjudyrum kl. 10.30 alla miðviku-
dagsmorgna undir stjórn Arnar Sigurgeirs-
sonar. Nú er kjörið að byrja. Kirkjuprakk-
arar kl. 14.10. Starf fyrir 1.–4. bekk.
Umsjón Aðalheiður Helgadóttir, hjónin
Kristjana H. Þorgeirsdóttir Heiðdal og Geir
Brynjólfsson auk sr. Bjarna.
Neskirkja. Fyrirbænamessa kl. 18. Prest-
ur sr. Örn Bárður Jónsson.
Breiðholtskirkja. Kyrrðarstund í dag kl.
12.10. Tónlist, altarisganga, fyrirbænir.
Léttur málsverður í safnaðarheimilinu eftir
stundina.
Seljakirkja. Kyrrðar- og bænastund í dag
kl. 18. Beðið fyrir sjúkum. Allir hjartanlega
velkomnir. Tekið á móti fyrirbænaefnum í
kirkjunni í síma 567 0110.
Vídalínskirkja. Foreldramorgnar kl. 10–12
með Nönnu Guðrúnu í Vídalínskirkju.
Hafnarfjarðarkirkja. Kyrrðarstund í kirkj-
unni kl. 12, íhugun, altarisganga, fyrir-
bænir. Léttur hádegisverður kl. 13 í Ljós-
broti Strandbergs.
Víðistaðakirkja. Kyrrðar- og fyrirbæna-
stund í dag kl. 12. Góður kostur fyrir þá
sem vilja taka frá kyrrláta og helga stund í
erli dagsins til að öðlast ró í huga og frið í
hjarta. Hægt er að koma fyrirbænaefnum
til sóknarprests eða kirkjuvarðar. Boðið er
upp á súpu og brauð í safnaðarheimilinu
að kyrrðarstund lokinni.
Þorlákskirkja. Barna- og foreldramorgnar í
dag kl. 10–12.
Lágafellskirkja. AA-fundur kl. 20.30 í
Lágafellskirkju. Unnið í 12 sporunum.
Sauðárkrókskirkja. Kyrrðarstund kl. 21.
Landakirkja í Vestmannaeyjum. Kl. 11
helgistund á Hraunbúðum. Sr. Þorvaldur
Víðisson og sr. Fjölnir Ásbjörnsson.
Kletturinn, kristið samfélag. Kl. 20.30
bænahópar í heimahúsum. Upplýsingar í
síma 565 3987.
Kefas. Samverustund unga fólksins kl.
20.30. Lofgjörð, lestur orðsins, fróðleikur
og samvera. Allt ungt fólk velkomið.
Fíladelfía. Mömmumorgunn kl. 10. Kl. 20
biblíulestur og bæn í aðalsal kirkjunnar.
Robert Maasbach forstöðumaður frá Eng-
landi sér um lesturinn. Allir velkomnir.
Safnaðarstarf
Ástkær eiginkona mín, móðir, tengdamóðir,
amma og langamma,
FLÓRA BALDVINSDÓTTIR,
Ási í Hveragerði,
áður til heimilis á Siglufirði,
lést á heimili sínu mánudaginn 25. ágúst.
Útförin fer fram frá Fossvogskirkju í dag, mið-
vikudaginn 3. september, kl. 15.00.
Einnig er fyrirhuguð kveðjuathöfn frá Siglu-
fjarðarkirkju og verður hún auglýst síðar.
Valtýr Jónasson,
Jónas Valtýsson, Vigdís S. Sverrisdóttir,
Guðrún Valtýsdóttir,
Baldvin Valtýsson, Laufey Ása Njálsdóttir,
barnabörn og barnabarnabarn.
Ástkær eiginmaður minn, faðir, tengdafaðir, afi
og langafi,
SIGURÐUR R. INGIMUNDARSON,
Álfheimum 4,
verður jarðsunginn frá Langholtskirkju fimmtu-
daginn 4. september kl. 15.00.
Dóra M. Ingólfsdóttir,
Lilja Sigurðardóttir,
Anna Sigurðardóttir, Konráð Jónsson,
Erna Sigurðardóttir, Tonny Espersen,
Ingi Sigurðsson,
Berglind Sigurðardóttir, Atli Sigurðarson,
barnabörn og barnabarnabarn.
Hjartans þakkir til allra þeirra er auðsýndu
okkur samúð og vinarhug við andlát og útför
eiginkonu minnar, móður, tengdamóður,
ömmu og langömmu,
RAGNHEIÐAR ÞÓRARINSDÓTTUR,
Hjaltastöðum.
Pétur Sigurðsson,
Þórólfur Pétursson, Anna Jóhannesdóttir,
Bryndís Pétursdóttir, Bjarni Friðriksson,
Margrét Pétursdóttir, Sveinn Björnsson,
barnabörn og barnabarnabörn.
Ástkær faðir okkar, tengdafaðir og afi,
ENGILBERT RAGNAR VALDIMARSSON,
Hrafnistu,
Reykjavík,
verður jarðsunginn frá Fossvogskirkju föstu-
daginn 5. september kl. 15.
Blóm og kransar afþakkaðir, en þeim, sem vilja
minnast hins látna, er bent á líknarfélög.
Engilbert R. Engilbertsson, Ragnheiður Brynjólfsdóttir,
Bergþór Engilbertsson, Stefanía Helgadóttir,
Jón N. Engilbertsson, Guðbjörg Vallaðsdóttir
og afabörn.
Innilegar þakkir sendum við öllum þeim sem
sýndu okkur samúð, vináttu og hlýhug við and-
lát og útför eiginmanns míns, föður okkar,
tengdaföður og afa,
YNGVARS GUÐMUNDSSONAR
fyrrv. rafmagnseftirlitsmanns,
Hlíf II,
Ísafirði.
Sérstakar þakkir til alls hjúkrunarfólks og lækna sem önnuðust hann
í veikindunum.
Sigrún Einarsdóttir,
Þuríður Yngvadóttir, Guðmundur Jónsson,
Auður Yngvadóttir,
Einar Á. Yngvason, Emelía Þórðardóttir
og barnabörn.
Fleiri minningargreinar
um Flóru Baldvinsdóttur bíða birt-
ingar og munu birtast í blaðinu
næstu daga.
KIRKJUSTARF