Tímarit Máls og menningar - 01.10.1981, Síða 35

Verda Uland. Fœreyjar og Granland . . .
kjarnorkuvopnakapphlaupið. Með samningi um kjarnorkuvopnalaust svæði á
Norðurlöndum, sem fæli í sér aðskilnað eyríkjanna og meginlandsríkjanna væru
hinar voldugri Norðurlandaþjóðir að kaupa sérgrið á kostnað hinna fámennari
og veikbyggðari. Slík þáttaskil myndu ógna hugsjónagrundvelli norrænnar
samvinnu og vera i æpandi mótsögn við sameiginlegar lýðræðishefðir, sögu
okkar og menningu.
I glímunni við hin hrikalegu vígbúnaðartröll, sem nú hafa framtíð veraldar-
byggðar i hendi sér, er sameiginlegur styrkur norrænna manna brýn nauðsyn. Á
tímum geigvænlegasta vígbúnaðarkapphlaups veraldarsögunnar, þegar marg-
faldur gereyðingarmáttur gagnvart öllu jarðnesku lifi er orðinn hversdagsleg
staðreynd og sérfræðingar stórveldanna vega og meta kosti kjarnorkustyrjaldar á
afmörkuðum svæðum, þá verða leiðir sem forða þjóðum frá gereyðingunni
bæði knýjandi og afdrifarík stefnumið. Stofnun kjarnorkuvopnalausra svæða er
slik leið. Hún á vaxandi fylgi meðal norrænna manna. Framkvæmd hennar
verður þó að vera á þann hátt að samstaða Norðurlandanna allra sé varðveitt.
íslendingar verða að hafa forystu um að tryggja að lögformlegur samningur um
kjarnorkuvopnalaust svæði veiti öllum norrænum mönnum aukna vernd gegn
tortímingarvaldi vigbúnaðartröllanna í austri og vestri.
TMM III
281