Skólavarðan - 01.09.2012, Blaðsíða 10

10
Skólavarðan 1. tbl. 2012ALþjóÐAdAguRInn
Fimmta þing Kennarasambands Íslands vorið 2011 fól stjórn KÍ
að velja stuðningsverkefni erlendis í samráði við aðalskrifstofu
Alþjóða kennarasambandsins (EI) og/eða hjálparstofnanir hérlendis.
Tilgangurinn er að styðja þróunarstarf í landi þar sem kennarar og/
eða skólastarf eiga erfitt uppdráttar vegna stríðsátaka eða annarra
hörmunga. Til verkefnisins skal árlega verja upphæð sem þing KÍ
ákveður í fjárhagsáætlun hverju sinni. Stjórnin valdi að styðja við
þróunarstarf í Síerra Leóne í samvinnu við Rauða kross Íslands.
Síerra Leóne sem er á vesturströnd Afríku á landamæri við Gíneu
og Líberíu. Landið er meðal þeirra fátækustu í heimi og lífskjör þar
með því versta sem um getur. Nærri helmingur þjóðarinnar er undir
fimmtán ára aldri en grimmileg borgarstyrjöld geisaði í landinu um
árabil með nauðungarþátttöku þúsunda barna. Síerra Leóne vermdi
lengi botnsætið á lífskjaralista Sameinuðu þjóðanna en nú horfir til
betri vegar og vonir hafa glæðst um batnandi lífskjör þar.
Fyrsta og eina tækifærið til menntunar
Moyamba er hérað í Suður-Síerra Leóne og er samnefndur bær
höfuðstaður þess en þar búa á tólfta þúsund manns skv. opinberum
tölum frá 2004. Rauði krossinn á Íslandi styður 150 ungmenni
árlega til náms og starfsþjálfunar í svokölluðu Moyamba-athvarfi.
Ungmennin læra þar að lesa og skrifa og stunda iðnnám í valinni
grein. Hver nemandi fær áhöld fyrir sitt sérsvið sem hann nýtir í
náminu og fær svo til eignar að útskrift lokinni; trésmíðanemar
fá sagir, hamra og hefla en klæðskeranemarnir fá meðal annars
saumavél. Fræðsla um alnæmi og getnaðarvarnir er líka í
námskránni. Fyrir mörg ungmennanna er þetta fyrsta og eina
tækifærið til að öðlast menntun. Rauði krossinn í Síerra Leóne
heldur úti nokkrum slíkum athvörfum víðs vegar um landið en
Rauði krossinn á Íslandi hefur stutt starfsemina í Moyamba frá
árinu 2004.
Stöndum með kennurum
Á alþjóðadegi kennara 5. október nk. stendur Kennarasamband
Íslands að fjársöfnun til styrktar verkefninu í Moyamba-athvarfinu
í samstarfi við Rauða kross Íslands en yfirskrift dagsins er
„Stöndum með kennurum“. Fjárins verður aflað meðal kennara
með símasöfnun. Með þessu móti hrindir KÍ samþykkt fimmta
þingsins í framkvæmd og tekur þátt í alþjóðlegu uppbyggingarstarfi
til eflingar menntunar. Kennurum er í lófa lagið að horfa til Síerra
Leóne og flétta verkefnið í Moyamba-athvarfinu inn í skólaverkefni.
Margt smátt gerir eitt stórt. Fólki gefst kostur á að greiða
mismunandi upphæð með því að hringja í mismunandi númer líkt
og í símakosningu. Nánara fyrirkomulag söfnunarinnar verður
kynnt í Eplinu, veftímariti KÍ, og fjölmiðlum þegar nær dregur.
Texti: GG
Myndir: Rauði kross Íslands
Alþjóðadagur
kennara 2012
Stöndum með kennurum í Síerra Leóne.