Morgunblaðið - 14.08.2001, Page 10

FRÉTTIR
10 ÞRIÐJUDAGUR 14. ÁGÚST 2001 MORGUNBLAÐIÐ
MAÐUR var fluttur á Fjórðungs-
sjúkrahúsið á Akureyri eftir árekst-
ur á Ólafsfjarðarvegi við Stóra-Holt
um sexleytið á sunnudag. Að sögn
lögreglunnar á Sauðárkróki er or-
sökin fyrir árekstrinum talin vera
framúrakstur. Sjö manns voru alls í
tveimur bílum og hlutu flestir lítils-
háttar meiðsl.
Fluttur á
sjúkrahús eftir
árekstur
FEIKNALEGA vænn lax veiddist í
Hnausastreng í Vatnsdalsá síðastlið-
ið laugardagskvöld. Laxinum var
sleppt, en mældist 104 sentimetrar
sem meðaltalsskali segir vera 11,2
kg fiskur, eða rétt tæplega 22,5
pund. Að sögn Péturs Péturssonar,
leigutaka Vatnsdalsár, verður laxinn
skráður þannig, en sjálfur hafi hann
séð og vitað um marga 104 senti-
metra laxa sem voru 23-24 pund og
þessi lax hafi verið nýgenginn og
feitur vel.
„Það er af okkar alkunnu hógværð
að við skráum hann 11,2 kg, en sjálf-
ur held ég að hann sé þyngri,“ sagði
Pétur í samtali við Morgunblaðið í
gærdag.
Stórlaxinn veiddist á rauða Franc-
es númer 14 og var erfiður viðfangs.
„Frúin hans var hins vegar erfiðari,
hún tók á sama bletti daginn eftir og
sleit flugulínuna hjá veiðimanninum,
svo ótrúlega sem það hljómar.
Nokkru seinna tókst svo að slæða
línuna upp og var hún sett inn á hjól
og ballið byrjaði upp á nýtt. Þá var
laxinn hálfu verri viðureignar og
tvisvar þurfti karlinn að vaða
Hnausastrenginn upp í háls til að
fylgja fiskinum, enda var línan svo
stutt. Þetta var 98 sentimetra fiskur,
svona 18-19 punda hrygna og parið
er að hvíla sig í kistu í strengnum um
þessar mundir. Við gerum það gjarn-
an við stóra fiska eftir hörð átök,
þetta er nokkurs konar endurhæf-
ingarstofa. Við sleppum þeim í
kvöld,“ sagði Pétur.
Vel getur verið að hængurinn sé
stærsti lax sumarsins til þessa,
heyrst hefur af 22 punda laxi úr
Laxá í Aðaldal, en þessi er trúlega
þyngri. Annars eru fleiri laxar
komnir á land úr Vatnsdalsá nú held-
ur en allt síðasta sumar, sem var
reyndar afspyrnuslakt, 280 komnir á
land á móti 263 allt síðasta sumar. Ef
við höldum í horfinu náum við
kannski 100 löxum í viðbót og þá
myndi ég segja að við værum
kannski aftur komin á uppleið. Ég
sagði alltaf að það gæti varla orðið
verra en í fyrra,“ sagði Pétur.
Eitthvað skárra
fyrir norðan
Benedikt Ragnarsson, umsjónar-
maður Miðfjarðarár, sagði síðustu
daga hafa verið nokkuð skemmti-
lega. „Við fengum loksins veður-
breytingu og það lifnaði yfir laxinum
og við höfum séð nokkuð af nýjum
fiski. Það er líka góð bleikjuveiði að
bjarga miklu, nokkrir staðir í ánni
eru fullir af 2-4 punda fiski og það
koma þrír til fimm svoleiðis fiskar í
hús eftir hverja vakt. Það er víða
talsvert af laxi í ánni, en skilyrði hafa
verið mjög slæm og fiskur tekið illa.
Gleðilegustu fréttirnar eru, að ég hef
séð talsvert af laxi í Núpsá, en hún
var nánast laxlaus síðasta sumar og
hefur verið á mikilli niðurleið,“ sagði
Benedikt.
Í gærdag voru komnir 274 laxar á
land úr Miðfjarðará.
„Maðkahollið“ í Víðidalsá byrjaði
eftir hádegið á sunnudag og á hádegi
í gær hafði það aðeins náð 21 laxi, níu
komu á fyrstu vaktinni og tólf í gær-
morgun. „Það endurspeglar ástandið
hérna, það er lítið af fiski og hann
tekur illa. Það er hins vegar víða
mikil og væn bleikja, en þó minna
heldur en t.d. í fyrra. Það er síðan
allur gangur á því hvort menn hafi
áhuga á því að veiða bleikju eða ekki.
Enn hefur ekki veiðst 20 punda lax í
ánni, hvað þá stærri.
ERU
ÞEIR AÐ
FÁ’ANN?
Sá stærsti í sumar?
Snoppuhylur í Leirvogsá.
Á HEIMASÍÐU eins tímarits
Fróða, Bleiks og blás, var um nokk-
urt skeið vísað með tengli yfir á vef-
síðu sem inniheldur soralegt efni,
meðal annars barnaklám. Í samtali
við Morgunblaðið segist Magnús
Hreggviðsson, stjórnarformaður
Fróða hf., harma mjög þau mistök
sem hafi átt sér stað og að fyrirtækið
skyldi á þennan hátt tengjast þeim
óþverra sem um var að ræða.
Hann segir tildrög málsins vera
þau að fyrir nokkrum misserum
setti fyrirtækið upp einfaldar vefsíð-
ur fyrir tímarit sín. Þar átti að vera
forsíða hvers nýs tölublaðs, ásamt
efnisyfirliti og í sumum tilvikum rit-
stjórnarpistill. „Þetta voru fyrstu
skref okkar á vefnum og má segja að
mál hafi fljótt komist í ákveðinn far-
veg. Það var í rauninni á ábyrgð
hvers ritstjóra að framfylgja þeirri
línu sem lögð hafði verið og senda
efnið inn til netdeildarinnar sem síð-
an sá um framkvæmd. Fyrrverandi
ritstjóri Bleiks og blás bætti við efni
inn á heimasíðu tímaritsins, sem var
utan umrædds ramma, og auk þess
lét hann setja upp tengla yfir á aðrar
vefsíður.“
Töldu að búið væri að loka
fyrir tengingar á önnur svæði
Að sögn Magnúsar var á síðast-
liðnu ári mótað nýtt skipurit fyrir
fyrirtækið þar sem margmiðlun og
tæknimál voru færð undir stjórn
Jóns Karlssonar, framkvæmda-
stjóra bókaútgáfu. Segir Magnús að
þegar á fyrsta degi eftir þessa skipu-
lagsbreytingu hafi Jón óskað eftir
því við margmiðlunardeild fyrirtæk-
isins að öllum tenglum Bleiks og blás
yrði lokað tafarlaust þar sem fyr-
irtækið gæti ekki borið ábyrgð á til-
vísun í efni sem ekki væri undir rit-
stjórn Fróða hf. Hafi þetta verið 15.
ágúst í fyrra. Jón hafi síðan yfirfarið
þetta til öryggis aftur og ítrekað fyr-
irmæli sín og hafi hann og aðrir í fyr-
irtækinu verið í góðri trú um að
þetta hefði verið gert.
„Síðastliðinn laugardagsmorgun
var hringt í mig frá fréttastofu út-
varps og ég spurður um hvort ég
gerði mér grein fyrir því hvaða
tenglar væru tengdir Bleiku og bláu.
Ég kom alveg af fjöllum,“ segir
Magnús og lýsir því að hann hafi þá
þegar haft samband við yfirmann
margmiðlunardeildarinnar. „Það var
okkur mikið áfall þegar við komumst
að því að tenglarnir sem loka átti í
ágúst í fyrra voru enn opnir. Var
þegar í stað gengið í að loka þeim og
var búið að gera það innan klukku-
stundar frá því að við gerðum okkur
grein fyrir hvað um var að vera.“
Magnús segir að af hálfu Fróða sé
litið á þetta sem mjög alvarlegt mál
og þegar hafi verið hafist handa við
að athuga hvernig á því stóð að svo
hrapallega tókst til. „Ákveðið var að
safna saman öllum tiltækum gögn-
um og koma þeim eins fljótt og
mögulegt væri til lögreglunnar.
Höfðum við samband við rannsókn-
arlögregluna strax í morgun og
munum afhenda henni greinargerð
eða skýrslu um málið jafnskjótt og
við ljúkum henni sem verður von-
andi þegar í dag.“
Magnús segir það liggja nokkurn
veginn ljóst fyrir að það hafi verið
mannleg mistök sem urðu til þess að
tenglunum var ekki öllum lokað fyrir
ári. „Enginn í fyrirtækinu virðist
hafa farið inn á umræddan tengil eða
athugað hvað þar að baki bjó né
heldur hvort efni síðnanna hafi orðið
grófara á þessu tímabili eða ekki.“
Davíð Þór Jónsson, fyrrverandi rit-
stjóri blaðsins og sá sem kom tengl-
inum á á sínum tíma, fullyrðir aftur á
móti að þegar það var gert hafi þar
ekkert barnaklám verið að finna.
„Það var á ábyrgð hvers og eins
ritstjóra að framfylgja þeirri stefnu
sem stjórnendur fyrirtækisins settu
varðandi netmálin en eins og áður
sagði var það ætlun okkar að hafa
netásýnd tímaritanna einfalda og
eftir fyrirfram gefinni forskrift,“
sagði Magnús. „Atvikið nú gerir það
að verkum að við munum að sjálf-
sögðu gera allt sem í okkar valdi
stendur til þess að tryggja að ekkert
slíkt geti aftur gerst.“
Þegar hann var spurður um eft-
irmál ítrekaði Magnús að af hálfu
Fróða væri þetta mál litið mjög al-
varlegum augum og það jafnt þótt
fyrir lægi að um mannleg mistök
hefði verið að ræða. „Við leggjum
áherslu á að taka til öll gögn í málinu
og fá réttum yfirvöldum þau í hend-
ur og gera það sem við getum til
þess að upplýsa hvað gerðist í raun
og veru. Það teljum við sjálfsagða
skyldu okkar en það verður síðan að
vera annarra en okkar að meta hvert
framhaldið verður.“
Á vefsíðunni Strik.is var vísað í
tengil sem innihélt klámefni og hef-
ur þegar verið brugðist við því með
því að fjarlægja tengilinn. Ásgeir
Friðgeirsson, ritstjóri Strik.is, segir
að á vefsíðunni hafi verið grein eftir
Mikael Torfason þar sem hann segir
frá þeim vefsvæðum sem hann
gjarnan fer inn á. Þar á meðal er vef-
svæði með tenglasafni en þar er vís-
að inn á önnur vefsvæði þar sem er
að finna gróft klám.
Vísað á klámtengla
á vefsíðunni Strik.is
„Ég hef leitað til lögfræðings
varðandi þetta mál og mér hefur
verið ráðlagt að fara að öllu með gát.
Það ríkir óvissa um það hvað telst
vera dreifing á Netinu, þar sem ekki
er dómur til að styðjast við. Það leik-
ur hins vegar enginn vafi á því að
dreifing á klámefni er að sjálfsögðu
ólögleg. Í þessu tilfelli liggur hins
vegar ekki ljóst fyrir hvað telst
dreifing. Við erum að vísa á breyti-
legt tenglasafn og spurning er sú
hve margar kynslóðir þurfi til til
þess að ég sem útgefandi sé ekki
lengur ábyrgur,“ segir Ásgeir.
Hann segir að gætt verði ýtrustu
varúðar eftirleiðis varðandi vísanir
yfir á önnur vefsvæði.
Hörður Jóhannesson, yfirlög-
regluþjónn í Reykjavík, segir að það
verði skoðað hvort það teljist dreif-
ing á klámi að vísa í tengla sem inni-
halda klámefni. Þetta eigi jafnt við
um vísanir í tengla í tímaritinu
Bleiku og bláu og á Strik.is.
Tímaritið Bleikt og blátt vísaði á heimasíðu sinni á vefsíðu sem innihélt barnaklám
Stóð til að loka fyr-
ir tenglana í fyrra
BLÓÐFITULÆKKANDI lyf sem
innihalda virka efnið cerivastatín
hafa verið tekin af markaði í Evrópu
og í Bandaríkjunum en í þann flokk
fellur lyfið Lipobay sem notað var
hér á landi. Í tilkynningu frá Lyfja-
stofnun segir að framleiðandi lyfsins,
Bayer í Þýskalandi, hafi ákveðið að
taka lyfið úr notkun vegna þess að
borið hafi á vöðvakvilla eða rák-
vöðvasundrun við notkun þess og
eykst sú hætta sé lyfið tekið sam-
tímis öðru lyfi sem nefnist Lopid og
inniheldur virka efnið gemfibrozil.
Framleiðandi gæti átt
lögsókn yfir höfði sér
Lyfið sem hefur verið tengt dauðs-
föllum víða um heim var lítið notað
hér á landi og segir Lyfjastofnun að
ekki hafi borist neinar tilkynningar
um aukaverkanir af þess völdum
hér. Magnús Jóhannsson hjá Lyfja-
stofnun segir lyfið hafa verið notað
hér á landi í tvö ár og að á þeim tíma
hafi örfáir einstaklingar neytt þess.
Þá segir hann að einstaklingar sem
notað hafi lyfið og hafi ekki fundið
fyrir aukaverkunum þurfi ekki að ör-
vænta og geti tekið það áfram þar til
þeir þurfi að verða sér úti um nýjan
lyfjaskammt. Þá þurfi þeir að fá nýja
tegund þar sem Lipobay hafi verið
tekið af markaði. Magnús ítrekar að
blóðfitulækkandi lyf sem notuð eru
hér á landi séu fólki með of háa blóð-
fitu gagnleg og auki lífslíkur þess
verulega.
Í ráðleggingum Lyfjastofnunar til
lækna segir að taki sjúklingur bæði
inn Lopid og Lipobay ætti tafarlaust
að skipta yfir í önnur blóðfitulækk-
andi lyf. Að öðrum kosti segir að
nægi að skipta um blóðfitulækkandi
lyf þegar sjúklingurinn hafi lokið við
þær birgðir sem hann hafi þegar
keypt. Í ráðleggingum stofnunarinn-
ar til sjúklinga segir að þeir sem ekki
finni fyrir óþægindum vegna töku
lyfsins geti lokið við birgðir sínar af
því eins og ekkert hafi í skorist. En
finni sjúklingur fyrir óþægindum,
einkum ef hann fær hita eða vöðva-
verki, er honum ráðlagt að leita sem
fyrst til læknis.
Í fréttaskeyti AP segir að þýski
lyfjaframleiðandinn Bayer gæti átt
yfir höfði sér að minnsta kosti 40 lög-
sóknir vegna dauðsfalla sem talin
séutengjast neyslu lyfsins. Lipobay,
sem var í almennri notkun um heim
allan, var ekki bannað í Japan því lyf
með virka efninu gemfibrozil eru
ekki notuð þar. Talið er hugsanlegt
að 31 dauðsfall megi rekja til neyslu
lyfsins í Bandaríkjunum en þar hef-
ur það verið notað í þrjú ár, sex
dauðsföll í Þýskalandi eru sögð
tengjast neyslu lyfsins, þrjú á Spáni
og eitt tilfelli er til rannsóknar í
Frakklandi.
Að sögn Bayer er óvíst hvenær
eða hvort lyfið fer aftur á markað. Þá
segist fyrirtækið ekki ætla að gera
ráðstafanir vegna mögulegra máls-
höfðana, enda sé ekki endanlega
ljóst hvort rekja megi dauðsföll til
neyslu lyfsins.
Blóðfitulækkandi lyfið Lipobay tekið af markaði
Öryggisráðstafanir
vegna aukaverkana
Reuters
Víða um heim hafa dauðsföll verið tengd neyslu blóðfitulækkandi lyfs-
ins Lipobay og hefur það verið tekið af markaði.
HEIMIR Már Pétursson, upplýs-
ingafulltrúi Flugmálastjórnar,
vill árétta að eðlilegt og fullkom-
lega löglegt sé að Flugmálastjórn
lesi yfir skýrslu rannsóknar-
nefndar flugslysa.
Hann segir að í umfjöllun um
frumdrög skýrslu um flugslysið í
Skerjafirði í Morgunblaðinu sl.
föstudag sé að hans mati látið í
veðri vaka að óeðlilegt sé að
Flugmálastjórn lesi skýrsluna.
„Þar er sleppt að nefna að í lögum
stendur að Flugmálastjórn beri
að lesa skýrslur rannsóknar-
nefndar og þar af leiðandi að hafa
skoðun á þeim,“ segir Heimir
Már.
Eðlilegt að Flugmála-
stjórn lesi yfir skýrsluna
♦ ♦ ♦