Morgunblaðið - 22.01.2002, Síða 12

FRÉTTIR
12 ÞRIÐJUDAGUR 22. JANÚAR 2002 MORGUNBLAÐIÐ
INDRIÐI H. Þorláksson ríkisskatt-
stjóri segir að reglur um skattmat
hlunninda þurfi að vera í sífelldri
endurskoðun. Að hans sögn voru
breytingar á reglum um skattmat á
tekuárinu 2002 birtar fyrir mistök áð-
ur en athugasemdir höfðu borist frá
fjármálaráðuneytinu, en eins og fram
hefur komið kom fjármálaráðuneytið
í veg fyrir að breytingar á skattmati
hlunninda, sem ríkisskattstjóraemb-
ættið hafði í undirbúningi, kæmu til
framkvæmda á tekjuárinu 2002.
Aðspurður hvort þörf væri á að út-
víkka skattmatsreglurnar sagði
Indriði að eflaust mætti deila um það
en hann sagði töluvert skorta á að
menn gerðu sér grein fyrir hvað í
skattmatinu fælist. Það væri regin-
misskilningur að með því væri verið
að ákveða hvað væri skattskylt og
hvað ekki. „Skattmatsreglurnar
fjalla eingöngu um það sem er skatt-
skylt samkvæmt lögunum,“ segir
hann.
„Almenna reglan samkvæmt lög-
unum er sú að hlunnindi sem eru
skattskyld skuli meta og telja til
tekna á gangverði. Skattmatsregl-
urnar grípa inn í þegar um er að ræða
eitthvað sem er þess eðlis að gang-
verð liggur ekki fyrir. Þetta þýðir að
hafa þarf reglurnar í stöðugri endur-
skoðun með hliðsjón af þeim breyt-
ingum, sem verða í umhverfinu. Það
koma upp nýir hlutir, breytingar
verða á verðlagi og svo framvegis,“
segir Indriði og bætir því við að rík-
isskattstjóra beri skylda til að hafa
þessar reglur á hverjum tíma þannig
úr garði gerðar að þær samrýmist
ákvæðum laganna um tekju- og
eignaskatt.
Spurður um þau ummæli fjármála-
ráðherra að ekki væri ástæða til að
gera breytingar að sinni og hvort
embættið hefði gert mistök með birt-
ingu þeirra sagði Indriði að skatt-
matsreglur hefðu verið gefnar út ár-
lega og búið væri að gefa út reglur
fyrir þetta ár. Endanlegar reglur
hefðu ekki verið gefnar út fyrr en í
lok árs en hins vegar hafa verið gefn-
ar út viðmiðunarreglur fyrir stað-
greiðsluna. „Núna gáfum við út regl-
ur sem gilda fyrir allt árið þannig að
það liggur fyrir við uppharf tekjuárs-
ins hvað gildir í þessu efni. Þetta er
ástæða þess að þetta var í meira mæli
á dagskrá núna en áður,“ segir Indr-
iði.
Að sögn hans hefur verið unnið að
gerð reglnanna á vettvangi embætt-
isins í nokkrar vikur. „Við sendum
þær til kynningar, m.a. til ráðuneyt-
isins, og gerðum ráð fyrir að fá við-
brögð við því. Það var síðan fyrir mis-
tök að menn töldu að það lægju ekki
fyrir neinar athugasemdir um þetta
og þær voru svo settar inn [á heima-
síðu Ríkisskattstjóra] áður en þær
voru birtar með formlegum hætti í
stjórnartíðindum.“
Bifreiða- og íbúðahlunnindi
fara vaxandi
Spurður hvort hlunnindi væru að
verða sífellt stærri hluti tekna ein-
staklinga sagði Indriði að ákveðnir
þættir, sérstaklega bifreiðahlunn-
indi, hefðu farið vaxandi, þar sem
menn fengju t.d. bifreið fyrirtækis til
afnota. „Það hefur líka verið nokkur
vöxtur í íbúðahlunnindum en þetta er
ekki almennt í þeim skilningi að þetta
eigi við um mjög marga skattaðila
heldur er þetta afmarkað við ákveðna
hópa sem eru í slíkri stöðu eða starfi
sem gerir þetta mögulegt. Launþeg-
ar í landinu eru á annað hundrað þús-
und en aðeins lítill hluti þeirra er með
bifreiða- eða íbúðahlunnindi. Þessar
reglur snerta því hinn almenna skatt-
borgara ekkert óskaplega mikið,“
sagði Indriði.
Indriði Þorláksson ríkisskattstjóri segir að reglur um skattmat hafi verið birtar fyrir mistök
Reglur um skattmat
þurfa að vera í sí-
felldri endurskoðun
NORÐURLANDAÞINGI Lions-
manna lauk á Hótel Loftleiðum í
Reykjavík um helgina. Þing sem
þetta er haldið árlega til skiptis á
Norðurlöndunum, síðast haldið
hér á landi fyrir fimm árum. Um
200 þingfulltrúar sátu þingið en
ásamt mökum var fjöldi þátttak-
enda um 300. Þar af komu 65
manns frá einu umdæmi á vest-
urströnd Noregs. Ingibjörg Sól-
rún Gísladóttir borgarstjóri flutti
ávarp við setningu þingsins.
Að sögn Þórs Steinarssonar,
sem átti sæti í þingnefndinni,
þótti þingið fara vel fram og
mörg áhugaverð umræðuefni tek-
in fyrir. Hjálparstarf hreyfing-
arinnar í Evrópu og alþjóðasam-
starf almennt var ofarlega á
baugi og meðal þess sem fram
kom var að félagsstarf Lions á
víða undir högg að sækja í borg-
um og stærri byggðarlögum. Þór
sagði þetta einnig eiga við hér á
landi.
Stórbæirnir skapa
fjarlægð milli fólks
„Við fjölluðum talsvert um það
hvernig hreyfing eins og Lions
getur nálgast nýja félaga þegar
fólk er að flytja í stórum mæli til
stórborganna. Við erum með mjög
öflugt starf víða um land í miðl-
ungsstórum sveitarfélögum. Á
sama tíma eigum við í erfiðleikum
hér á höfuðborgarsvæðinu að fá
fólk til starfa og ég held að þetta
eigi einnig við um félagsskap eins
og Kiwanis og Rotary. Það er eins
og stórbæirnir skapi fjarlægð
milli fólks,“ sagði Þór.
Félagar í Lionsklúbbum
á Íslandi eru 2.500 talsins
Á Norðurlandaþinginu var
einnig fjallað um fræðsluskipulag
hreyfingarinnar, unglingaskipti í
Evrópu og öðrum heimsálfum,
hjálparverkefni Norðurlandanna í
Austur-Evrópu og nýtt verkefni í
Litháen var kynnt sérstaklega.
Þess má geta að um 90 þúsund
manns eru í Lions-hreyfingunni á
Norðurlöndunum, þar af eru um
2.500 á Íslandi, sem er mestur
fjöldi miðað við höfðatölu. Þrír
fulltrúar Norðurlandanna í 30
manna alþjóðastjórn Lions sátu
þingið, þ. á m. Jón B. Þorsteins-
son, sem er fjórði Íslendingurinn
frá upphafi til að sitja í alþjóða-
stjórn. Fjölumdæmisstjóri Lions á
Íslandi er um þessar mundir Örn
Gunnarsson.
Norrænir Lionsmenn þinguðu í Reykjavík um helgina
Morgunblaðið/Golli
Norðurlandaþing Lions á Hótel Loftleiðum var fjölmennt.
Félagsstarfið á
undir högg að
sækja í borgum VEGAGERÐIN, ríkislögreglustjóriog Umferðarráð skrifuðu í gær undirsamning um árangursstjórnun til aðkoma í veg fyrir umferðarslys. Um
leið kynnti Vegagerðin nýjan tækni-
búnað, svonefnda umferðargreina,
sem sýna m.a. umferðarhraða og bil
á milli bíla, en upplýsingar úr þeim
eru aðgengilegir á heimasíðu Vega-
gerðarinnar.
Í samningnum er því heitið að
vinna markvisst og af auknu afli að
því að koma í veg fyrir slys á þjóð-
vegum landsins til að ná þeim mark-
miðum sem sett eru í umferðarör-
yggisáætlun stjórnvalda.
Skv. henni á alvarlegum umferð-
arslysum að fækka um 40% fram til
ársins 2012 og á árunum 2012–2025
verða ekki fleiri en 52 alvarleg slys
og dauðaslys. Vegagerðin og Um-
ferðarráð munu vinna tölfræðilegar
upplýsingar um allt sem tengist slys-
um á vegum s.s. hvar og hvenær
slysin verða helst eða hættu af völd-
um hálku eða veðurs. Lögreglan
mun síðan stýra sínu eftirliti í sam-
ræmi við þessar upplýsingar. Um-
ferðarráð mun veita vegfarendum
markvissar upplýsingar til þess að
stuðla að því að fólk virði umferð-
arreglur.
Dragi úr hraða
fækkar slysum
Mælingar Vegagerðarinnar sýna
að hraði úti á þjóðvegum landsins
hefur aukist. Á síðasta ári var svo-
nefndur óhindraður umferðarhraði,
þ.e. umferð stakra bíla, 93 km/klst á
landinu að meðaltali og óku 15% öku-
manna hraðar en 100 km/klst. Á
blaðamannafundi sem haldinn var í
tilefni samningsins kom fram að
hægt væri að draga úr dauðaslysum
um fjórðung og alvarlegum slysum
um fimmtung ef hægt væri að ná
meðalhraðanum niður í 90 km/klst.
Í gær var kynntur nýr tæknibún-
aður sem gerir Vegagerðinni m.a.
kleift að fylgjast með hraða á vegum
og bils á milli bíla. Átta slíkir um-
ferðargreinar hafa verið settir upp í
nágrenni höfuðborgarsvæðisins en
ætlunin er að 50–70 slíkir greinar
verði komnir í notkun á næstu fimm
árum. Hægt er að sjá þessar upplýs-
ingar á heimasíðu Vegagerðarinnar
og þetta verður meðal þeirra gagna
sem lögregla mun geta notað til að
stýra umferðareftirliti.
Slóðin er www.vegagerdin.is –
Umferð og umferðaröryggi – Um-
ferðargreinar.
Markvisst stefnt að
fækkun umferðarslysa
Morgunblaðið/Ásdís
Haraldur Johannessen ríkislögreglustjóri, Óli H. Þórðarson, fram-
kvæmdastjóri umferðarráðs, og Helgi Hallgrímsson vegamálastjóri við
undirritun samningsins í gær.
HÚSASMIÐJAN hefur ákveðið
að fara að dæmi BYKO og lækka
verð á vörum í verslunum sínum.
Verðlækkun Húsasmiðjunar er
3%, en BYKO lækkaði um 2%.
Verðlækkunin nær til fimmtán
verslana Húsasmiðjunnar um
land allt.
Í tilkynningu sem Húsasmiðj-
an sendi frá sér kemur fram að
félagið skori á hið opinbera og
atvinnulífið að leggjast á eitt til
að verðbólgumarkmið náist í maí
nk.
„Hagsmunir Húsasmiðjunnar,
viðskiptavina hennar og þjóð-
félagsins alls fara saman í verð-
lags- og vaxtamálum.
Það er mjög mikilvægt að
vextir lækki verulega sem allra
fyrst. Háir vextir draga úr fram-
kvæmdum almennings og fyrir-
tækja, og kaupum á nýju hús-
næði. Það er því afar mikilvægt
fyrir verktaka og þjónustufyrir-
tæki í byggingavörugeiranum að
hjólin fari að snúast hraðar. Sá
viðsnúningur verður hins vegar
ekki að neinu marki fyrr en vext-
ir lækka. Seðlabankinn hefur
margítrekað að vextir muni ekki
lækka að ráði fyrr en verðbólgan
hjaðni. Verðlækkanir á heimilis-
og byggingarvörum munu auð-
vitað vega talsvert í vísitölulækk-
unum, en það er ljóst að það dug-
ar ekki til. Ríkið, sveitarfélög og
önnur fyrirtæki verða að fylgja í
kjölfarið,“ segir í tilkynningu frá
Húsasmiðjunni.
Svara ákvörðun BYKO um lækkun
Húsasmiðjan lækk-
aði verð um 3%