Morgunblaðið - 30.04.2002, Blaðsíða 27

MORGUNBLAÐIÐ ÞRIÐJUDAGUR 30. APRÍL 2002 C 27HeimiliFasteignir
hússins. Útveggirnir hafa minnkað
að sama skapi, án þess að það bitni á
burðarvirkinu. Glerið er sérstaklega
hljóðeinangrað og gasfyllt K-gler frá
Íspan. „Það er því varla hægt að
hugsa sér betri einangrun,“ segir
Guðjón.
Ljósabúnaðurinn er ítölsk ljós frá
Targetti, sem Borgarljós hafa flutt
inn, mjög glæsileg og lýsingin snýr
upp. „Það er gert til þess að það
glampi sem minnst á tölvuskjái,“
segir Guðjón. „Ljósabúnaðurinn er
með svokölluðum dimmerum og
þessi birtutilhögun skapar
afskaplega rómantískan blæ að
kvöldi til.
Innveggir eru styrktir til þess að
halda uppi listaverkum, þannig að
það er hægt að hengja upp þung
listaverk hvar sem er í húsinu.
En þess hefur ekki síður verið
gætt að útbúa þetta húsnæði
tæknilega þannig úr garði, að það
geti hentað fyrir margvíslega nútíma
starfsemi.
Hér eru afar öflugar tölvulagnir
með um 120 tenglum og um 280 ljós.
Tölvutenglum er komið fyrir
innanveggja en engir ljótir
utanáliggjandi tölvutenglar til
staðar. Það er lagt fyrir öllum
mögulegum lögnum og búnaði og
hefur hvergi verið skorið við nögl við
hönnun og framkvæmdir.
Loks má geta þess að það er mjög
tilkomumikill og fallegur hringstigi
við innganginn í húsið og annar stigi
er sjávarmegin þar sem hægt er að
fara beint út í bát.“
Guðjón Bjarnason var loks
spurður að því hvernig gengið hefði
að fjármagna þessar framkvæmdir.
„Ég naut að sjálfsögðu stuðnings
virtra fjármagnsaðila og
Húsasmiðjan hefur aðstoðað mig á
allan mögulegan hátt,“ sagði hann að
lokum. „Auk þess hefur
Búnaðarbankinn reynzt mér afar vel
og verið góður bakhjarl við þessar
framkvæmdir.“
Til afhendingar strax
Þetta húsnæði er til sölu hjá
fasteignasölunum Fossi og
Þingholti, eins og fram er komið og
til afhendingar nú þegar. Ásett verð
er 112 millj. kr., en það er um
100–110 þús. kr. á fermetra. Yfirtaka
á hagstæðum langtímalánum og
leiga koma til greina. „Þetta er
einstakt og óvenjulegt húsnæði og
rétt að líta á það fyrst og fremst sem
framtíðarfjárfestingu,“ segir Úlfar
Þ. Davíðsson, sölustjóri hjá Fossi.
„Margir hafa sýnt þessu húsnæði
áhuga, sem kemur m.a. fram í
miklum fyrirspurnum. En þetta er
stórt húsnæði og það má skipta því
niður í tvo, þrjá eða fleiri hluta eftir
atvikum. Alls má skipta því niður í
átta einingar svo að vel sé. Þess
vegna kemur vel til álita að selja það
í hlutum.“
„Þetta húsnæði hentar vel fyrir
margs konar starfsemi,“ heldur
Úlfar áfram. „Það er nánast tilbúið
sem safn, enda hefur sú hugmynd að
koma hér fyrir safni af einhverju tagi
vissulega komið til álita. Þetta væri
t.d. kjörið sem hluti sjóminjasafns.
En þetta húsnæði myndi einnig
henta vel fyrir tölvufyrirtæki,
auglýsingastofu, verkfræðistofu og
síðast en ekki sízt margs konar
opinberar stofnanir og
verðbréfafyrirtæki. Ef stórfyrirtæki
eða stór stofnun á fjármálamarkaði
hefði áhuga, má geta þess að það eru
allmiklir stækkunarmöguleikar í
húsinu.
Allt umhverfi hússins á líka eftir
að breytast. Við suðvesturhlið þess
er skemma, sem verður rifin í júní og
það er þegar farið að rýma fyrir
götu, sem á að liggja á milli
Grandagarðs og Mýrargötu og
áformað að ljúka þeim
framkvæmdum í sumar.
Í framtíðinni verður þetta
hornhús á leið niður í miðbæ. Auk
þess eru nú uppi áform um glæsilega
endurbyggingu gömlu
hraðfrystistöðvarinnar við
Mýrargötu, en framkvæmdir við
hana munu hefjast nú í sumar.
Hönnun þess er á vegum
Hugsmíðar. Yfirbragð svæðisins
mun því taka gagngerum
breytingum innan skamms.“ Úlfar
bætir þvi við, að bílastæði við húsið
eigi ekki að vera vandamál.
„Hér er talsvert af bílastæðum og
ef skemman hverfur nú í sumar, þá
eykst fjöldi bílastæða til muna,“
segir hann.
Úlfar kveðst ekki hika við að halda
því fram að í framtíðinni verði þetta
eitt glæsilegasta svæði Reykjavíkur
og að það muni taka skemmri tíma
en margan grunar. „Út um
aðalglugga hússins á eftir að blasa
við tónlistarhús borgarinnar, sem
verður án efa tilkomumikil bygging
og síðan verður allt hafnarsvæðið
tekið í gegn,“ segir hann. „Nýja
hafnargatan á að liggja til hliðar við
þetta hús og mun gera leiðina niður í
miðbæ mun skemmri og
skemmtilegri en nú er.“
„Almennt er framboð nú meira á
atvinnuhúsnæði en eftirspurn,“ segir
Úlfar Davíðsson að lokum. „En það
eru batnandi horfur í þjóðfélaginu.
Það er búið að koma böndum á
verðbólguna og meiri stöðugleiki
framundan.
Með aukinni bjartsýni kemur
meiri kraftur í efnahagslífið og með
vaxandi umsvifum meiri eftirspurn
eftir atvinnuhúsnæði. Miðað við
fyrirspurnir geri ég mér vonir um að
þetta einstaka húsnæði við höfnina í
Reykjavík seljist innan skamms. Það
sést ekki mikið af svona húsnæði á
markaðnum nú, lofthæðin er t. a. m.
einstök.“
Lofthæðin er 4–5,5 metrar og útveggir með miklum útsýnisgluggum. Húsnæðið er innréttað sem skrifstofu- og iðnaðarrými, en er á allan hátt
mjög sveigjanlegt, hvað framtíðarnotkun snertir.
Sérvalinn kirsuberjaviður frá Innviðum er notaður
til þess að þilja húsnæðið að innan.
Húsnæðið er með átta svölum og með útsýni til allra átta, ekki hvað sízt einstöku útsýni frá framsölum hússins yfir
höfnina og til fjalla.
Á hæðinni er afar falleg móttaka, fullbúið eldhús auk tilbúinna lagna innanveggja fyrir önnur eldhús, rúm-
góð kaffistofa eða matsalur með sjávarútsýni, sérútbúið fundarherbergi með smáeldhúsi, ljósrit-
unarherbergi, geymsla og tölvuherbergi auk opinna og sveigjanlegra skrifstofueininga.