Fréttablaðið - 29.03.2003, Page 28

28 29. mars 2003 LAUGARDAGUR
MYNDASÖGUR Eins og oft vill verða í
myndasöguheimum hafa nær allir
beittustu pennarnir á myndasögu-
markaðinum verið ráðnir af stóru
útgáfunum, Marvel og DC Comics,
til þess að skrifa um ofurhetjurnar.
Þannig var Brian Michael Bend-
is ráðinn til þess að byrja upp á nýtt
með Kóngulóarmanninn í seríunni
„Spiderman Unlimited“ auk þess
sem hann semur nýjustu ævintýri
Daredevil í Marvel Knights-serí-
unni, sem ætluð er eldri lesendum.
Íslandsvininum Grant Morrison
var úthlutað að skrifa nýjar sögur
um X-Menn og fékk góðfúslegt
leyfi til þess að brjóta allar fyrri
reglur er höfundum voru settar.
Þar sem allir beittustu pennar
síðustu ára eru komnir í „þægilegri
stöður“ hefur myndast pláss á
markaðnum fyrir nýja höfunda.
Svartir sem tilraunadýr
Ein blaðasería sem hefur valdið
miklum usla og jafnvel reiði innan
myndasögugeirans er „Truth: Red,
White and Black“. Sagan byggir á
ævintýrinu um Kaftein Ameríku,
sem fékk ofurhetjukrafta sína eftir
að hafa verið sprautaður með dul-
arfullri mixtúru sem bandarískir
vísindamenn bjuggu til í von um að
búa til „hinn fullkomna hermann“.
Kafteinn Ameríka kemur þó
hvergi við sögu því hún gerist
löngu áður en nálarstungan örlaga-
ríka átti sér stað. Nánar tiltekið á
því tímabili er vísindamennirnir
voru að prófa sig áfram með for-
múluna góðu. Sagan gerist árið
1940, á þeim dögum þegar svartir
þurftu enn að berjast með kjafti og
klóm fyrir mannréttindum sínum.
Bandaríkin dragast inn í stríðið eft-
ir árásina á Perluhöfn og ríkis-
stjórnin gefur vísindamönnum
grænt ljós á að nota svarta her-
menn sem tilraunadýr í rannsókn-
um sínum. Myndasagan hefur vak-
ið reiði fyrir að draga upp heldur
ljóta mynd af bandarískum yfir-
völdum á tímum seinni heimsstyrj-
aldarinnar.
Sagan er skrifuð af Robert
Morales og teiknuð af Kyle Baker.
Bókin, sem safnar saman blöðunum
sex, kemur út í júní.
Síðasti karlmaðurinn
Blaðaserían „Y: The Last Man“,
sem gefin er út af Vertigo, hefur
fengið mikið lof gagnrýnenda. Sag-
an er vísindaskáldsaga, alveg
ótengd öllum ofurhetjum, og segir
frá því þegar öll karlkyns dýr jarð-
arinnar deyja á sömu mínútu á und-
arlegan hátt, nema tvö. Atvinnulaus
ástsjúkur sonur þingkonu, sem
stundar að losna úr hlekkjum eins
og Houdini, og apinn hans eru þeir
einu sem lifa af. Skiljanlega breyt-
ist heimsmyndin verulega og allt er
í uppnámi.
Hann slæst í lið með vísinda-
konu og leyniþjónustukonu sem
ráðin er af nýsettum forseta Banda-
ríkjanna til þess að vernda eina
gangandi sæðisbanka þjóðarinnar.
Vísindakonan hafði stundað ólög-
legar tilraunir með klónun og kenn-
ir sér um hvernig fór þar sem
ósköpin dundu yfir karlþjóðina á
sömu mínútu og hún var að fæða
fyrsta klónaða barnið. Sagan er
skrifuð af Brian K. Vaughan og
teiknuð af Pia Guerra. Fyrsta bók-
in, „Unmanned“, er þegar komin út.
Vampírur í leiðangri
Kvikmyndaframleiðendur í
Hollywood hafa þegar tryggt sér
réttinn á sögunni „30 Days of
Night“ sem er hrollvekja eftir
Steve Niles, teiknuð af Ben Temple-
smith. Sagan segir frá því er hópur
vampíra ákveður að flytjast til
smábæjar í Alaska þar sem sólin
sest í þrjátíu daga. Þær girða bæinn
af frá umheiminum, klippa á alla
samskiptamöguleika og ætla að
halda 30 daga veislu þar sem eng-
inn þarf að óttast sólarljósið. Útlit
bókarinnar er glæsilegt og minnir
um margt á Batman-söguna „Ark-
ham Asylum“ sem Grant Morrison
skrifaði á sínum tíma. Bókin er
komin í búðir.
„Fables“ er ný athyglisverð sería
frá Vertigo. Í sögunni búa allar
þekktustu sögupersónur ævintýr-
anna í New York-borg dagsins í dag.
Fríða og Dýrið eiga í vandræðum í
einkalífi sínu, Mjallhvít er einkarit-
ari hjá ævintýrakónginum sem
stjórnar samtökum skáldsagnaper-
sóna í raunveruleikanum, Jói hefur
ekki fundið baunagras í hundruð
ára og stóri ljóti úlfurinn er orðinn
að rannsóknarlögreglumanni sem
rannsakar morðið á systur Mjall-
hvítar. Sagan er eftir Bill Willing-
ham og teiknuð af Lan Medina.
Fyrsta bókin, „Fables: Legends In
Exile“, sem safnar saman fyrstu
sex blöðunum, er komin út.
Tilraunastarfsemi
á ofurhetjum
Það hefur tíðkast frá upphafi of-
urhetjanna í myndasögum á fjórða
áratugnum að leita stöðugt nýrra
leiða til þess að kveikja neista í
gömlum glæðum.
Áhuginn á Súpermann hefur far-
ið minnkandi í gegnum árin enda
engin kvikmynd sem fær minnstu
krakkana til þess að vilja hneppa á
sig rauðu skikkjunni. Það hefur
gengið mjög erfiðlega að koma
nýrri mynd um hetjuna í fram-
leiðslu og virðast hugmyndasmiðir
hjá DC Comics frekar ætla að gera
tilraunir til þess að höfða til eldri
lesenda á komandi ævintýrum hetj-
unnar.
Ein saga sem er á leiðinni fjall-
ar um það hvað hefði gerst ef geim-
flaugin sem bar ungabarnið Kal-El
frá plánetunni Krypton hefði lent í
Úkraínu árið 1950 í stað Kansas í
Bandaríkjunum? Súpermann er al-
inn upp með kommúnismanum og
berst fyrir jafnrétti allra manna.
Höfundur sögunnar er Mark Miller,
sem gerði sínar bestu sögur með
The Authority. Fyrsta blaðið af
þremur kemur út í apríl og búast
má við bókinni fyrir áramót.
Fleiri ofurhetjusögur
Af öðrum athyglisverðum ofur-
hetjusögum sem eru væntanlegar á
markaðinn má nefna tilraun til þess
að færa hinn 50 ára gamla ofur-
hetjuhóp Justice Society of Amer-
ica nær nútímanum í átta blaða
seríu. Þar er stórskotalið að skrifa.
Brian Azzarello, James Robinson
og Pulitzer-verðlaunahafinn Mich-
ael Chabon, sem þreytir frumraun
sína í myndasögugerð.
Endurkoma gleymdu ofurhetj-
unnar Rawhide Kid frá sjötta ára-
tugnum hlýtur svo að teljast til tíð-
inda þar sem hetjan kemur út úr
skápnum í nýrri blaðaseríu. Hann
er þar með fyrsta samkynhneigða
ofurhetja Marvel.
Bókin „Rawhide Kid: Slap
Leather“ kemur út í júní.
Nýjar seríur stórhöfunda
Á árinu eru væntanlegar nýjar
ofurhetjulausar sögur frá stórhöf-
undunum Grant Morrison, Warren
Ellis, Neil Gaiman og Alan Moore.
Margir af stærstu höfundum Vest-
urlanda hafa oft dáðst að frönsku
myndasögumenningunni þar sem
blaðaseríur eru varla til og allt er
gefið út beint í bókum.
Þannig kemur nýjasta saga
Warren Ellis, höfundar hinnar frá-
bæru seríu „Transmetropolitan“,
beint út á bók. Hún heitir „Orbiter“,
er 104 blaðsíður og fjallar um það
þegar geimflaugin „Verture“ hrap-
ar til jarðar eftir að hafa verið týnd
í 10 ár. Áhöfnin er horfin að undan-
skildum einum stýrimanni sem hef-
ur tapað glórunni. Miklar breyting-
ar hafa verið gerðar á flauginni og
hópur vísindamanna er fenginn til
þess að rannsaka málið. Bókin kem-
ur í búðir í lok apríl.
Það kemur skemmtilega á óvart
að ný bók í Sandman-seríunni eftir
Neil Gaiman er væntanleg í sept-
ember. Lítið er vitað um söguþráð-
inn en í bókinni, sem heitir
„Endless Nights“, verða sjö
smásögur.
Í kringum útgáfu myndarinnar
„League of ExtraOrdinary
Gentlemen“ í júlí, sem skartar Sean
Connery í aðalhlutverki, gefur höf-
undurinn Alan Moore út bók númer
tvö. Að þessu sinni lenda 19. aldar
bókmenntahetjurnar í því að verja
jörðina frá innrás marsbúanna.
Eins og áður eru tilvitnanir í bók-
menntaheiminn nánast á hverri
síðu. Í myndinni hefur bandarísk-
um bókmenntapersónum verið
bætt við hópinn. Búist því við að sjá
Tom Sawyer í hópi með Kaftein
Nemó, Allan Quatermain, Dr.
Jekyll, Minu Harker og Ósýnilega
manninum í bíó.
Síðast en ekki síst má búast við
því að hin frábæra sería Grant
Morrison, „The Filth“, skili sér í
bækur á árinu. Eins og aðdáendur
„The Invisibles“ vita er ímyndunar-
afl hans ótrúlegt, meira að segja á
mælikvarða myndasagna. Með
þessari nýju seríu hefur honum aft-
ur tekist að skapa undarlegan heim,
ólíkan öllu því sem sést hefur í
myndasögum áður. Blöðin verða
þrettán talsins og lýkur röðinni á
seinni hluta ársins. Búist því við
bókinni fyrir jól.
Njótið vel.
biggi@frettabladid.is
Hvernig verður
myndasöguárið 2003?
Ofurhetjurnar hafa verið nær allsráðandi í myndasöguútgáfu síðustu mánaða í kjölfar vinsælda kvikmyndanna. Nú stefnir í breytingu
þar á. Fjöldi athyglisverða myndasagna er kominn út eða kemur út á þessu ári. Hér verður staldrað við nokkrar þeirra.
COMRADE OF STEEL
Væntanleg er afar athyglisvert Súpermann-ævintýri. Í því lendir geimflaug hetjunnar í
Úkraínu í stað Kansas og Súpermann elst upp í Sovétríkjunum á tímum Kalda stríðsins.
Y: THE LAST MAN
Sagan er vísindaskáldsaga, alveg ótengd
öllum ofurhetjum, og segir frá því þegar
öll karlkyns dýr jarðarinnar, nema tvö,
deyja á sömu mínútu á undarlegan hátt.
30 DAYS OF NIGHT
Vampírur gera sig heimakæra í smábæ í
Alaska þar sem sólin sest í heila þrjátíu
daga. Íbúar eru ekki á eitt sáttir.