Fréttablaðið - 03.01.2004, Blaðsíða 18

18 3. janúar 2004 LAUGARDAGUR
Framhaldsmyndir settu sterkan svip á bíóárið 2003 en þannig lauk Matrix-þríleiknum með tvöföldum skammti á árinu og glæsilegur
lokakafli Hringadróttinssögu innsiglaði árið. Blóðug endurkoma Quentins Tarantino með Kill Bill setur sitt mark á annála ársins sem var
þegar vel er að gáð öllu hrottalegra en gengur og gerist.
Blóðugt ár framhaldsmynda
Bíóárið 2003 einkenndist af risa-stórum og fokdýrum fram-
haldsmyndum sem fylgdu í kjölfar
mynda sem hafa rakað saman hund-
ruðum milljóna í miðasölunni und-
anfarin ár.
Þannig lauk Matrix-þríleiknum
með tvöföldum skammti, þriðja
myndin um Tortímandann leit dags-
ins ljós og þriðja og væntanlega síð-
asta American Pie myndin dúkkaði
upp. Sagan um stökkbreyttu X-
mennina hélt áfram, Martin
Lawrence og Will Smith gerðu út á
gamla velgengni í Bad Boys 2 og
Englarnir hans Kalla, þær Lucy Liu,
Drew Barrymore og Cameron Diaz,
brugðu sér aftur í latexið og létu öll-
um illum látum. Tölvugellan Lara
Croft blandaði sér einnig í slaginn í
Tomb Raider 2 og síðast en ekki síst
lokaði Peter Jackson þríleiknum um
Hringadróttinssögu með glæsibrag
í lok ársins með The Return of the
King.
Ládautt á öruggum miðum
Það var því ekki mikið verið að
taka sénsa í ár en þrátt fyrir það
brugðust þessi krosstré mörg hver.
Harðir aðdáendur The Matrix urðu
til að mynda fyrir umtalsverðum
vonbrigðum með sögulokin og eru
flestir þeirrar skoðunar að fyrsta
myndin standi sterkari sem heild en
þríleikurinn allur.
Þriðja myndin um Tortímandann
bauð upp á nægan hasar og spreng-
ingar en stóð fyrri myndunum langt
að baki og aðalleikarinn Arnold
Schwarzenegger snýr varla aftur
sem vélmenni úr framtíðinni þar
sem hann hefur snúið sér alfarið að
pólitík og glímir nú við bágan fjár-
hag Kaliforníuríkis. Tomb Raider 2
náði ekki tilætluðum árangri enda
virkaði Lara Croft ansi þreytt og lit-
laus og Angelina Jolie, með allan
sinn kynþokka, gat ekkert gert til að
bjarga því.
Það eru því í raun bara X-Men 2
og The Return of the King sem stóð-
ust væntingar aðdáenda sinna í
framhaldsmyndadeildinni. Þriðja
Lord of the Rings myndin þykir ein-
faldlega toppa allt sem áður hefur
sést í bíó og þráður annarrar X-Men
myndarinnar er spunninn skynsam-
lega úr myndasögufyrirmyndinni og það er því gott útlit fyrir að saga
þeirra stökkbreyttu á hvíta tjaldinu
sé ekki öll sögð enn.
Árið sem Tarantino sneri aftur
„Það liggur við að það megi
segja að Lord of the Rings sé fyrsta
trílógían sem heppnast algerlega en
síðasta myndin virðist vera best og
þannig á þetta að vera. Ólíkt Matrix,
sem kláraðist líka á árinu,“ segir
Hugleikur Dagsson kvikmynda-
gagnrýnandi. „Matrix Reloaded og
Revolutions eru svipaðar og
Episode I og II í Star Wars. Þar eru
frummyndirnar klassík en fram-
haldsmyndirnar annaðhvort viðun-
andi viðbót, sem skemmtun, eða
eitthvað leiðinlegt. Fyrir mér voru
Matrix-myndir ársins viðunandi
afþreying en ekkert meira.“
Hugleikur er hins vegar hæst-
ánægður með langþráða endur-
komu Quentins Tarantino. „Með Kill
Bill er afþreyingarmenningunni ýtt
upp á æðra plan með nákvæmlega
réttri blöndu af list og „explota-
tion“. Ég var líka mjög sáttur við
Elephant eftir Gus van Sant. Hon-
um tókst að tækla þetta skotæði í
bandarískum skólum án þess að
vera að predika um hvað sé að í
Bandaríkjunum og tókst þannig að
sýna einhvers konar raunveru-
leika.“
Ofbeldismyndir á stríðstímum
Franska myndin Irréversible
gekk fram af mörgum með rudda-
legum ofbeldisatriðum en Hugleik-
ur telur hana hiklaust með bestu
myndum síðasta árs. „Ég keypti
Irréversible á DVD um leið og hún
kom út. Hún er rosalega áhrifarík
og ég er ekki enn búinn að þora að
horfa á hana aftur. Ég geri það ein-
hvern tíma þegar ég er mjög örugg-
ur með sjálfan mig. Ég tek annars
eftir því að flestar myndirnar sem
ég vel á topp 10 eru ógeðslega blóð-
ugar og hrottalegar en veit ekki
hvort það segir meira um mig eða
tímana sem við búum á. Það er þó
staðreynd að þegar það er stríð í
heiminum, ekki síst áberandi stríð,
verða hryllingsmyndirnar hrotta-
legri. Það er bara þannig.“
Innrás ofurhetjanna
Hugleikur er annálaður mynda-
sögunörd og fylgist því vel með
ferðalögum gamalla ofurhetja úr
hasarblöðum á filmu en það sér ekki
fyrir endann á þeim hreppaflutn-
ingum.
„Mér fannst The Hulk frábær.
Hún er eiginlega meiri varúlfa-
mynd en ofurhetjumynd en þannig
er Hulk einmitt sjálfur. Hvað útlitið
varðar er The Hulk þó ein sú
myndasögulegasta en annars er
þetta fyrst og fremst freudísk flug-
eldasýning af bestu gerð. X-Men 2
var líka frábær en það er fyrst og
fremst leikstjóranum Brian Singer
að þakka. Daredevil var svo bara
ömurleg. Þar var allt tekið fyrir
sem skiptir máli fyrir Daredevil en
því var öllu klúðrað. Þessi leikstjóri
gerði líka Simon Birch eftir bók
sem mér skilst að sé svört kómedía
en myndin er endalaust væmin. Það
virðist því vera höfundareinkenni
hans að taka svala, svarta hluti fyr-
ir og breyta þeim í vellu. Svo sló
myndin í gegn og hvað þá, fær hann
að gera framhald? Ég vona ekki.“
Þegar allt kemur til alls er Hug-
leikur þó nokkuð sáttur við fram-
haldsmyndaárið mikla 2003 og gerir
sér vonir um að árið 2004 verði jafn-
vel betra. „Annars hef ég ekki verið
jafn duglegur að gagnrýna á þessu
ári og oft áður þannig að ég komst
hjá því að sjá rosalega mikið af rusl-
inu en er ánægðastur með óháðar
myndir eins og City of God, Sweet
Sixteen og Cabin Fever sem var
alveg frábær.“
thorarinn@frettabladid.is
OPIÐ Í DAG
FISKBÚÐIN VÖR • Höfðabakka 1
Sími 587 5070
Hrogn & lifur
og línuýsa
ÞÓRARINN ÞÓRARINSSON
Tíu bestu myndir ársins 2003
1. Kill Bill vol. 1
2. The Lord of the Rings: The Return of
the King
3. 28 Days Later
4. Mystic River
5. Bowling For Columbine
6. Nói albínói
7. Lilya 4-Ever
8. Finding Nemo
9. The Pirates of the Carribean
10. The Hulk
Fimm verstu myndir ársins 2003
A Man Apart
Daredevil
Johnny English
Legally Blonde 2
Tomb Raider 2
BIRGIR ÖRN STEINARSSON
Tíu bestu myndir ársins 2003
1. The Lord of the Rings:
The Return of the King
2. The Pianist
3. Kill Bill vol. 1
4. Bowling for Columbine
5. Punch Drunk Love
6. Finding Nemo
7. City of God
8. Nói albínói
9. El Crimen de Padre Amaro
10. Mystic River
Fimm verstu myndir ársins 2003
Daredevil
Dreamcatcher
The Emperor’s Club
Chicago
Fálkar
ÞRÁINN BERTELSSON
Tíu bestu myndir ársins 2003
1. City of God
2. Master and Commander
3. Lilya 4-ever
4. Lord of the Rings - Return of the King
5. Kill Bill Vol. 1
6. Bowling for Columbine
7. The Pianist
8. Mystic River
9. Finding Nemo
10. The Pirates of the Carribean
HUGLEIKUR DAGSSON
Tíu bestu myndir ársins 2003
1. The Lord of the Rings:
The Return of the King
2. City of God
3. Elephant
4. Kill Bill vol. 1
5. Irréversible
6. Spirited Away
7. Cabin Fever
8. Thirteen
9. The Hulk
10. X-Men2
Fimm verstu myndir ársins 2003
Chigaco
Legally Blond 2
Wonderland
Daredevil
Dreamcatcher
NÓI ALBÍNÓI
Gagnrýnendum Fréttablaðsins ber saman um að mynd Dags Kára
Péturssonar sé á meðal tíu bestu kvikmynda nýliðins árs.
DAREDEVIL
Er mikill töffari í samnefndum myndasögum en innreið hans á
hvíta tjaldið olli umtalsverðum vonbrigðum. Græni berserkurinn
Hulk og stökkbreyttu X-mennirnir héldu hins vegar heiðri
teiknimyndasagnanna á lofti árið 2003.
UMA THURMAN
Hjó mann og annan og nokkra tugi til í Kill
Bill í fyrra og markaði þar með endurkomu
Quentins Tarantino og blóðþyrstir
aðdáendur leikstjórans bíða seinni hluta
myndarinnar í ofvæni en Kill Bill vol. 2 er
væntanleg í bíó í mars.
HUGLEIKUR DAGSSON
Segir óvenju mikið um hrottafengnar og
blóðugar myndir á Topp 10 lista sínum
fyrir árið 2003 og er ekki frá því að
stríðsbrölt í raunveruleikanum hafi
magnað ofbeldi og hrylling í bíó.