Fréttablaðið - 15.01.2008, Blaðsíða 26
● lh hestar 15. JANÚAR 2008 ÞRIÐJUDAGUR6
Meistaradeild í hestaíþróttum
hefur verið starfrækt í nokkur ár
í Ölfushöllinni á Ingólfshvoli. Um
er að ræða röð móta sem dreifist á
vetrarmánuðina.
Hin kunna sjónvarpskona Brynja
Þorgeirsdóttir mun sjá um að
koma Meistaradeild VÍS á skjáinn í
Ríkis sjónvarpinu í vetur. Þættirnir
verða sýndir að loknu hverju móti
deildarinnar, sem verða sjö talsins
og haldin með tveggja vikna milli-
bili. Í þáttunum verður fjallað um
undirbúning keppninnar, keppnina
sjálfa og umræður eftir hvert mót.
Fyrsta mótið fer fram fimmtudag-
inn 31. janúar í Ölfushöllinni og
verður keppt í fjórgangi.
Margir af fremstu knöp-
um landsins etja kappi í deild-
inni líkt og undanfarin ár. Má þar
nefna sigurvegarana frá í fyrra
og hittifyrra, Viðar Ingólfsson
og Atla Guðmundsson, en einnig
eru á meðal keppenda Sigurbjörn
Bárðar son, Hinrik Bragason,
Hulda Gústafs dóttir, Sigurður V.
Matthías son, Sigurður Sigurðarson
og Þorvaldur Árni Þorvaldsson.
Keppendur eru tuttugu og fjórir og
fyrir utan að keppa hver við annan
taka allir þátt í liðakeppni undir
merkjum sex fyrirtækja. Þau eru
Blend, Frumherji, IB ehf., Málning
hf., Skúfslækur og Top Reiter.
Það er Örn Karlsson, eigandi
og staðarhaldari Ölfushallarinn-
ar, sem er höfundur Meistara-
deildarinnar. Hann hefur meðal
annars þróað nýjar keppnis-
greinar sem hafa náð vinsæld-
um, Smala, þar sem reynir á hraða
og fimi hests og knapa, og gæð-
ingafimi, sem er sambland af fimi-
æfingum og gangtegundakeppni.
Að öðru leyti er keppt í hefðbundn-
um greinum hestaíþrótta.
Brynja í Meistaradeild VÍS
Brynja Þorgeirsdóttir, sjónvarpskona á RÚV. MYND/JENS EINARSSON
Enginn bilbugur er á hestamönnum á
landsbyggðinni, þrátt fyrir misjafnt gengi
í kauphöllinni í Reykjavík. Hrossabændur,
félagasamtök og einstaklingar líta greini-
lega björtum augum til framtíðarinnar.
Á Varmalæk í Skagafirði er nú að rísa 1.100
fermetra hesthús og reiðhöll og gert er ráð
fyrir að hún verði komin undir þak í mars á
þessu ári. Húsið er byggt úr steinsteyptum
einingum frá Loftorku en þakið er frá Lím-
tré.
Á Varmalæk búa þau Björn Sveinsson og
Magnea K. Guðmundsdóttir. Þar hefur lengi
verið rekin hestatengd ferðaþjónusta, en
einnig er bærinn þekktur fyrir góð hross sem
þaðan hafa komið. Má þar nefna stóðhestinn
Mökk frá Varmalæk, sem er einn af farsæl-
ustu stóðhestum í ræktun íslenskra hrossa.
Hann var seldur til Svíþjóðar ungur að árum.
Frægasti gæðingurinn sem alið hefur aldur
sinn á Varmalæk er þó án efa Hrímnir frá
Hrafnagili í Eyjafirði, en hann féll síðastliðið
haust.
Magnea segir að markmiðið með byggingu
hússins sé að efla enn frekar þann rekstur
sem fyrir er á Varmalæk, ferðaþjónustuna og
hrossaræktina, og skapa aðstöðu fyrir öfluga
hestamiðstöð. „Í húsinu verður reiðhöll og
pláss fyrir 20 reiðhross. Skammt frá húsinu
er hringvöllur og næst á dagskrá er að útbúa
það sem við kjósum að kalla þjálfunarlaug, en
þar verður aðstaða til að láta hross synda, en
við höfum einnig í hyggju að nýta laugina með
fjölbreyttari hætti. Það er nóg af heitu vatni á
Varmalæk og upplagt að nýta sér það.“
Varmalækur er einn af mörgum bæjum
á Íslandi þar sem ábúendur hafa lagt niður
hefðbundinn búskap og snúið sér alfarið að
hrossabúskap. „Já, við erum ekki með neinn
annan búskap, bara nokkrar kindur sem við
köllum „spariféð“ okkar,“ segir Magnea.
Uppbygging á Varmalæk
Verð á spónum hefur rokið upp úr öllu valdi síðastlið-
in misseri og eru spænir orðnir verulegur kostnaðar-
liður í hestahaldi.
Guðmundur Böðvarsson á Syðra-Seli í Hruna-
mannahreppi hefur brugðist við þessu með eigin
húsráði, ef svo má að orði komast. Hann einfaldlega
viðar að sér pappír frá nágrönnum sínum og rífur
hann svo niður í höndunum og notar síðan rifrildið
í undirburð.
„Ég geri þetta nú bara til þess að hafa eitthvað
að gera. Ég er hættur búskap og heilsan ekki upp á
marga fiska,“ segir Guðmundur. „Það er svo óhemju-
mikið af pappír sem berst inn á öll heimili í dag. En
ég fæ líka dagblöð úr versluninni á Flúðum og síðan
kemur vinur minn Sigurður Sigmundsson með papp-
ír til mín. Ég er með fimm til sex folöld í stíu og nota
þetta undir þau, en moka undan þeim á hverjum degi.
Pappírinn þurrkar mjög vel og ég þarf engan spæni
meðan ég hef pappírinn,“ segir Guðmundur.
Hann neitar því þó ekki að vissulega væri gott að
hafa handhæga vél til að tæta niður pappírinn. Mörg
heimili og fyrirtæki gætu framleitt mikið af „rifr-
ildi“ með svoleiðis tæki. Er þeirri hugmynd hér með
komið á framfæri.
Rifrildi undir folöldin
Guðmundur setur einn kassa á dag af pappírsrifrildi undir sex
folöld og þarf engan spæni. MYND/JENS EINARSSON
Hertar kröfur til
kynbótarhrossa
Ákveðin hafa verið einkunna-
lágmörk kynbótahrossa fyrir
Landsmót 2008. Kröfurnar
hafa verið hertar talsvert frá
því fyrir Landsmót 2006, eða
um fimm stig í hverjum flokki
einstaklingssýndra kynbóta-
hrossa. Einnig hafa lágmörk af-
kvæmasýndra stóðhesta verið
hækkuð um tvö stig í aðalein-
kunn í kynbótamati. Engar kyn-
bótahryssur verða sýndar með
afkvæmum á Landsmóti 2008.
Á síðastliðnu ári var tekin sú
ákvörðun í fagráði hrossarækt-
ar að leggja þær af.
Lágmörk einstaklingssýndra
kynbótahrossa:
Stóðhestar 4 vetra 8,00.
Stóðhestar 5 vetra 8,15.
Stóðhestar 6 vetra 8,25.
Stóðhestar 7 vetra og eldri 8,30.
Hryssur 4 vetra 7,90.
Hryssur 5 vetra 8,05.
Hryssur 6 vetra 8,15.
Hryssur 7 vetra og eldri 8,20.
Lágmörk fyrir afkvæmasýnda
stóðhesta eru:
Heiðursverðlaun: 118 stig í kyn-
bótamati og 50 dæmd afkvæmi
eða fleiri.
Fyrstu verðlaun: 118 stig í kynbóta-
mati og 15 dæmd afkvæmi eða
fleiri/eða: 113 stig í kynbótamati
og 30 dæmd afkvæmi eða fleiri.
Björn Sveinsson og Magnea K. Guðmundsdóttir á skagfirskum gæðingum.
FRÉTTAMIÐLAR:
www.eidfaxi.is
www.hestafrettir.is
www.847.is
www.horse.is
STOFNANIR:
www.feif.org
www.lhhestar.is
www.holar.is
www.worldfengur.is
www.tamningamenn.is
www.fhb.is
HROSSABÚ SÝNISHORN:
www.blesastadir.is
www.dalur.is
www.hest.is
www.fet.is
www.flagbjarnarholt.is
Hestamenn á netinu