Fréttablaðið - 22.03.2008, Blaðsíða 20
22 22. mars 2008 LAUGARDAGUR
Konurödd og
einmanaleiki
FÖSTUDAGUR, 14. MARS.
Á hverjum degi sakna ég konunnar
minnar, barnabarnanna, strákanna
minna, og vina minna, vinkvenna,
vinnufélaga og nágranna. Nú sé ég
fyrir endann á útivistinni. Á
fimmtudaginn, skírdag, legg ég af
stað heim til Íslands. Ég er búinn að
vera einsetumaður hérna í Prag í
hátt í tvo mánuði.
Stundum sakna ég þó konunnar
minnar svo mikið að áður en ég veit
af er ég búinn að hringja í hana
alveg að ástæðulausu, eins og í
morgun. Tilgangurinn er enginn
annar en að heyra röddina hennar.
„Halló,“ segir hún þegar frú Sól-
veig er loksins búin að grafa gems-
ann úr pússi sínu.
„Hvar ertu?“ segi ég.
„Ég er í Europris að athuga hvort
ég finn hérna kerti fyrir páskana.“
„Segðu eitthvað meira,“segi ég.
„Af hverju ertu að hringja?“ spyr
hún þá. „Er ekki allt í lagi?“
„Bara til að heyra í þér röddina,“
segi ég.
Þá hlær hún og segir: „Röddin í
mér er bara svona.“
„Já, ég er voða feginn að hún
skuli vera svona,“ segi ég. „Heyri
ég ekki í þér í kvöld á skæpinu?“
„Jú, jú,“ segir hún. „Bara eins og
venjulega.“
Og svo geng ég glaður að mínu
verki og frú Sólveig heldur áfram
að leita að páskaskreytingum í Euro-
pris og hristir höfuðið yfir að eiga
svona einkennilegan mann.
Tölvupóstur lekur út
af ríkisstjórnarfundi
MÁNUDAGUR, 17. MARS.
Ég fékk heilmikla launalækkun í
morgun. Krónan veiktist um 6% og
síðan hún var við hvað besta heilsu
í fyrrasumar hefur hún lækkað
25%.
Mér sýnist að efnahagsmálum
þjóðarinnar sé stjórnað af mönnum
sem hafa ekki hundsvit á efnahags-
málum.
Sem rithöfundur fæ ég greidd
vinnulaun fyrir árið 2007 á árinu
2008 – án vaxta og verðtryggingar.
Þetta eru langbestu rekstrarlán
sem bókaútgefendum standa til
boða. Ókeypis rekstrarfé.
Af misgripum hefur lent inni í
tölvunni minni einhver tölvupóstur
frá einhverri Jósefínu til einhvers
innmúraðs stráks á Mogganum þar
sem getur að líta það sem talað var
á ríkissstjórnarfundinum í morg-
un:
- Hey, strákar, nú er allt í pati.
- Konan mín segir að það sé að
koma kreppa.
- Hvað er fjármálaráðherrann að
gera núna?
- Hann er eiginlega alveg hættur
botna í fjármálunum og farinn að
skipa héraðsdómara í staðinn. Það
minnir hann á hrútasýningar.
- Hvað er Bíbí að gera?
- Hann er að skoða rafbyssur?
- Hvað er Össur að gera?
- Hann er að skoða jarðhita á
Súmötru á daginn og svo bloggar
hann á nóttinni.
- Hvað er utanríkisráðherrann að
gera?
- Hún er í Afganistan að máta
kvenfatnað og tala fyrir friði.
- Hvað er seðlabankastjórinn að
gera?
- Hann er að reyna að girða upp
um stuttbuxnadeildina og hækka
vexti.
- Af hverju er engin stóriðju-
framkvæmd í gangi? Drífum í
þessu.
- En hvað með umhverfismálin?
- Já, hvað með þau?
- Ég meina eiginlega hvað með
umhverfisráðherrann?
- Já, hvað með hana. Ég veit ekki
betur en það standi sprenglært
kvenfólk í röðum og jafnvel karl-
menn sem gætu vel hugsað sér að
verða umhverfisráðherrar þótt
þeir þurfi að samþykkja smástór-
iðju annað slagið. Það eru ekki allt-
af jólin.
- Ókei. En þeir eru með eitthvað
vaxtamúður í Seðlabankanum.
- Þjónar Seðlabankinn einhverj-
um tilgangi nema sem verndaður
vinnustaður?
- Nei. Ekki svo ég viti.
- Það heyrir þá undir heilbrigðis-
ráðherrann en ekki mig að láta geð-
lækna gera úttekt á Seðlabankan-
um og loka svo sjoppunni. Og svo
vil ég ekki heyra neitt röfl um þetta
meira. Ég þarf að skreppa til
útlandsins á morgun til hitta John
Cleese og sannfæra útlendinga um
að íslensku bankarnir séu pottþétt-
ir.
- Svo er víst blaðamannafundur
núna á eftir og þá verða allir að
vera samtaka um að segja að það
þurfi ekkert að gera og enginn að
gera neitt eða fikta í neinu og allir
að fara bara varlega. Ókei?
- Yessssirí! Ókídókí. Fáum við þá
að halda áfram að vera ráðherrar?
- Bara vera kúl og pirraðir, þá
þreytast þessir guttar á að spyrja,
enda fer þetta allt einhvern veginn.
Treystið mér. Ég er búinn að vera
innilokaður í ráðuneytum síðan ég
var barn. Og í ráðuneytum fer allt
einhvern veginn að lokum og ef
maður gerir ekki neitt verður
manni ekki kennt um það.
- Og Össur þú heldur grjótheldur
kjafti.
Fundi slitið.
Á heimleið
FIMMTUDAGUR, 20. MARS.
Fór snemma á fætur. Pakkaði niður.
Tek leigubíl klukkan hálfellefu út á
flugvöll, til Kaupmannahafnar og
þaðan heim, kem um miðnætti. Í
dag er dagur franskrar tungu og ég
er að stauta í bók á frönsku.
Fyrsta takmarkið mitt þegar ég
byrjaði að læra frönsku fyrir rúmu
ári var að verða sæmilega læs.
Næsta takmark er að verða orðinn
þokkalega frönskumælandi áður en
árinu 2009 lýkur. Þá langar mig líka
til að geta verið farinn að bjarga
mér á kínversku.
Það er svo margt fróðlegt og
spennandi að ævin er fullstutt til að
gera því öllu verðug skil.
Hér lýkur sem sagt dagbókar-
færslum þessa vikuna, en svo að
lesendur mínir sjái að ég hef ekki
verið alveg aðgerðarlaus í Prag
undanfarnar vikur langar mig að
leyfa þeim að lesa uppkast að fyrsta
kaflanum í nýju bókinni minni.
Bókin heitir
BRÆÐUR OG SYSTUR
- DJELEM, DJELEM!
og er skáldsaga um glæp. Sögu-
efnið eru nýbúar á Íslandi, innflytj-
endur og rasismi. Og uppkastið að
fyrsta kaflanum sem hér fer á eftir
heitir:
Eldur af himnum
Eldurinn sem umlukti fólkið kom
af himnum ofan.
Það sá Mummi leigubílstjóri með
sínum eigin augum.
Þetta var fyrsta kraftaverkið
sem Mummi hafði séð á ævi sinni.
Það kom honum gersamlega í opna
skjöldu. Hann var 36 ára gamall
leigubílstjóri í Reykjavík og hét
fullu nafni Mohamet Ben Salah
Khelifi, alltaf kallaður Mummi.
Hann var fæddur í Túnis en hafði
búið á Íslandi í 14 ár og var íslensk-
ur ríkisborgari.
Ekkert var fjær huga hans á
þessari stundu, á venjulegu fimmtu-
dagskvöldi í snjómuggu og tregum
viðskiptum, en að Guð væri í þann
veginn að birtast bílstjóra númer
80 af stöðinni og sýna honum
kraftaverk.
Og ekkert smá kraftaverk –-
heldur kraftaverk af þessari stærð-
argráðu?
Ljúf er sú rödd sem rekka dregur föðurtúna til
Í dagbók Þráins Bertelssonar er fjallað um konurödd og einmanaleika, heimkomu úr útlegðinni, ráðherrastóla í pólitískum einangrunar-
búðum, myndarlega launalækkun og loks eru birtir tölvupóstar Jósefínu sem svipta innmúraðri hulunni af síðasta ríkisstjórnarfundi.
KÆRA DAGBÓK
Þráinn Bertelsson skrifar