Fréttablaðið - 15.04.2008, Blaðsíða 24
● lh hestar 15. APRÍL 2008 ÞRIÐJUDAGUR4
Þegar líður að vori taka eldishest-
ar oft upp á ýmsum óknyttum
í útreiðartúrum. Það er einmitt
í apríl og maí sem við heyrum
sögur af fólki sem hefur dottið af
baki vegna þess að hestur tók á
rás, óbeðinn, eða hljóp út undan
sér. Þetta á sér eðlilegar skýring-
ar. Innistöðuhestar sem fá mikið
og gott fóður þurfa mikla hreyf-
ingu. Ef þeir fá hana ekki hleðst
upp í þeim spenna, og jafnvel
sjónhræðsla, sem getur brotist út
með áðurnefndum hætti. Besta
ráðið við þessu er að ríða meira
út. Einnig er gott að leyfa hest-
unum að vera úti í gerði góða
stund áður en farið er á bak. Loks
ætti að gæta þess að gefa ekki of
kraftmikið fóður!
Annað sem gott er að hafa í huga
á vorin, er að taka skaflaskeifurn-
ar undan sem fyrst. Þegar daginn
lengir og eldið eykst í hrossunum
verða þau oft ærslafengin og pirr-
uð. Þau verða órólegri í stíunum
og áflogasamari þegar þeim er
hleypt út. Náttúran segir líka til
sín á þessum árstíma, hryssurnar
byrja í hestalátum. Við þessar að-
stæður eykst slysahætta af völd-
um skafla til muna. Það er því góð
regla að setja sléttjárnin undir
eins snemma og kostur er.
Þeir sem ætla að ferðast á hross-
um sínum í sumar ættu nú að
huga að þjálfun þeirra. Höfum
við verið nógu dugleg að ríða út í
vetur? Ekki var tíðin svo skemmti-
leg. En það er ennþá tími til
stefnu. Þeir sem eru vanir að ferð-
ast þekkja muninn á því að vera
með þjálfuð hross og óþjálfuð.
Lítið þjálfaður hestur getur hrein-
lega gefist upp í lengri ferðum,
auk þess sem slík áreynsla fer illa
með hann. Það er því rétt að nota
tímann vel: Ríða út með tvo og
þrjá til reiðar, fara í rekstra, – og
hafa gaman að lífinu.
Að síðustu er rétt að minna á að
það vorar ekki alltaf vel. Hryssu-
eigendur ættu að hafa í huga að
hryssa sem leidd er í lok apríl eða
maí kastar í apríl eða maí. Fylsuga
þarf gott og kraftmikið fóður til
að mjólka vel. Ekkert fóður kemur
í stað grænna grasa.
Hafrar & bygg
Notkun svokallaðra reiðdýna er nú á
undanhaldi eftir að hafa verið tískubóla
í tæpan áratug. Sala þeirra hefur dregist
saman og fólk velur frekar að sitja í hnakk.
Fyrstur til að ríða gæðingi í reiðdýnu í
keppni var Eyjólfur Ísólfsson á Roða frá Vík
á LM1974 á Vindheimamelum. Sigurbjörn
Bárðarson reið aftur á vaðið á LM1998 á
Markúsi frá Langholtsparti. Hann reið í dýnu
sem hann hannaði í samstarfi við Jón Sig-
urðsson söðlasmið. Hún fékk nafnið Didda-
dýnan og er framleidd ennþá. Fleiri framleið-
endur settu svipaðar dýnur á markað, en nú
hefur sala reiðdýna dregist mjög saman.
TÍSKUBÓLA
Allnokkur umræða varð í lok síðustu aldar
um kosti og galla hnakka af ýmsum gerðum.
Töldu margir að svokallaðir spaðahnakkar
væru stórskaðlegir en virkislausar reið-
dýnur mjög hestvænar. Segja má að í fram-
haldinu hafi æði gripið um sig. Allir vildu
ríða í dýnu. Nú eru flestir komnir í hnakka
aftur, að vísu ekki spaðahnakka. Dýnan var
tískubóla. Það góða sem af þessu hlaust var
að knapar uppgötvuðu áhrif ólíkra hnakka á
hreyfimöguleika hrossa, og að sami hnakkur
passar ekki öllum hrossum.
Sigurbjörn er þó enn talsmaður Diddadýn-
unnar. Hann telur kosti hennar ótvíræða:
Hún sé mjög hestvæn og gefi hrossunum
svigrúm til að hreyfa sig þvingunarlaust.
Diddi stendur með dýnunni
Sigurbjörn telur kosti Didda dýnunnar ótvíræða. MYND/JENS EINARSSON
Einar Öder Magnússon hefur
verið ráðinn landsliðseinvald-
ur fyrir Norðurlandamótið í
hestaíþróttum 2008. Áhersla
verður lögð á að örva ung-
menni til dáða.
Einar Öder hefur verið viðloð-
andi íslenska landsliðið í hesta-
íþróttum í meira en tvo ára-
tugi, ýmist sem keppandi eða
liðstjóri. Hann hefur hreppt níu
gull á Norðurlandamótum, fleiri
en nokkur annar íslenskur knapi.
Við spurðum Einar hverjar yrðu
helstu áherslur hans í vali á lið-
inu.
„Það verður lögð áhersla á að
örva ungmenni og upprennandi
knapa til að taka þátt. Það eru
að koma upp mjög sterkir ungir
knapar í Evrópu. Við megum ekki
sofna á verðinum. Norðurlanda-
mótin eru sterk mót, ekki mikið
síðri en heimsmeistaramótin. En
þau er minni í sniðum og ekki
eins mikil harka komin í keppn-
ina. Þau eru því mjög ákjósanleg-
ur vettvangur fyrir unga knapa
sem vilja öðlast keppnisreynslu á
erlendri grundu.“
STÖKKPALLUR INN Á HM
- Er eitthvað öðruvísi að keppa í
útlöndum?
„Þetta eru gjörólíkar aðstæður.
Í fyrsta lagi er loftslag allt annað,
mun heitara. Í öðru lagi þurfa
keppendur að beygja sig undir
aga sem tilheyrir því að vera
í landsliði. Í þriðja lagi ertu á
ókunnum stað. Það er margt nýtt
sem ber fyrir sjónir. Það er ein-
faldlega miklu meira mál að
hugsa um sjálfan sig og hestinn á
stóru móti í útlöndum.“
- Eru einhverjir knapar og
hestar sem þú hefur augastað á,
hafa einhverjir knapar meldað
sig?
„Nei, þetta er svo nýtilkomið.
Það eru allmargir íslenskir
knapar starfandi á Norður-
löndunum. Þeir hafa oftast skipað
nokkur sæti í liðinu. Ég vil undir-
strika það aftur að NM er nánast
skyldumæting fyrir þá. Norður-
landamótin eru góður stökkpallur
inn á HM. Þar fá menn reynslu og
kynningu á hestana.“ Einar Öder
biður alla knapa, sérstaklega í
ungmennaflokki, sem hafa áhuga
á að spreyta sig á Norðurlanda-
móti að hafa samband við sig.
Einar Öder landsliðseinvaldur
Einar Öder Magnússon er þaulreyndur landsliðsmaður. Hér er hann að lýsa keppni í
Smala í Meistaradeild VÍS. MYND/JENS EINARSSON
Goði frá Þóroddsstöðum jafnaði sköpulagseinkunn
föður síns, Gára frá Auðsholtshjáleigu, síðastliðið
sumar er hann hlaut 8,91 fyrir byggingu. Aðeins
eitt kynbótahross skákar þeim feðgum, en það er
hryssan Diva frá Gategården í Svíþjóð. Hún er
með 9,02 fyrir byggingu. Goði er sammæðra stór-
körlunum Hami, Þyrni og Þóroddi frá Þórodds-
stöðum, sem allir eru með hæst dæmdu íslenskum
stóðhestum. Þyrnir og Þóroddur hafa báðir slegið
heimsmet í aðaleinkunn stóðhesta, 8,60 og 8,74.
Goði mun keppa í flokki fimm vetra stóðhesta
í vor. Margir bíða spenntir eftir þessum fola. Ef
hann reynist eins mikill reiðhestur og bræður
hans eru góðar líkur á að hann verði sá þriðji til
að komast í „heimsmetabókina“. Daníel Jónsson er
þjálfari Goða, en hann sýndi þá Þyrni og Þórodd
fyrir kynbótadómi. Hann segir að Goði sé rúmur
á öllum gangi og sérstaklega sé skeiðið mikið og
gott. „Hann er rosalega skrefstór, gleypir alveg
veginn á skeiðinu. Hann gæti fengið toppeinkunn
ef sprettur heppnast vel,“ segir Daníel Jónsson.
Gleypir veginn á skeiðinu
Goði frá Þóroddsstöðum hlaut 8,91 fyrir byggingu síðastliðið sumar.