Morgunblaðið - 05.02.2007, Qupperneq 15

MORGUNBLAÐIÐ MÁNUDAGUR 5. FEBRÚAR 2007 15
VESTURLAND
Stykkishólmi – Tveir athafnamenn
í Stykkishólmi, þeir Símon Sturlu-
son, fyrrum trillukarl, og Stefán
Björgvinsson vörubílstjóri, hafa
aukið umsvif sín á undanförnu
mánuðum, meira en þeir reiknuðu
með þegar þeir hittust sl. vor og
ræddu möguleika þess að skapa
sér vinnu. Í haust reistu þeir 600
fermetra iðnaðarskemmu sem þeir
skiptu niður í sjö hluta og eru þeir
allir seldir. Þeir eru nú byrjaðir að
reisa aðra skemmu á svipuðum
nótum og hafa þegar ráðstafað
flestum hlutunum í þeirri skemmu.
Fljótir að hugsa
„Þetta hefur gengið miklu betur
hjá okkur Stefáni en við áttum von
á,“ segir Símon Sturluson. „Fyrir
tæpu ári seldi ég hluta minn í sam-
eiginlegri sjávarauðlind lands-
manna, en ég gerði út krókabát.
Þá var ég allt í einu kominn með
mikla peninga í hendur og ég hafði
áhuga á að nota aurana til að láta
þá koma mér að gagni og sam-
félaginu. Um svipað leyti hitti ég
Stefán og spurði hvort við gætum
ekki gert eitthvað skemmtilegt
saman. Út úr því spjalli kom að við
fórum að líta í ýmsar áttir í leit að
verkefnum til að skapa okkur
vinnu,“ segir Símon.
„Við Stefán erum fljótir að
hugsa þegar við förum af stað.
Nokkrum dögum síðar ákváðum
við að fara að byggja skemmu. Við
ætluðum við okkur að eiga hvor
sinn hlutann sjálfir og selja hina.
Við renndum blint í sjóinn í byrjun
en í ljós kom að eftirspurnin eftir
svona húsnæði var mjög mikil. Við
höfum selt allt húsnæðið og þann
1. febrúar tókum við skóflustungu
að nýrri skemmu. Strax í byrjun
eru flest bilin í nýja húsnæðinu
lofuð og það eykur bjartsýnina hjá
okkur félögum,“ segir Símon. Iðn-
aðarskemmurnar eru finnsk stál-
grindarhús sem H. Hauksson flyt-
ur inn. Hvor skemman er um 600
fermetrar að stærð.
Þeir félagar segja verð á hús-
næðinu sem þeir eru að selja vera
mjög sanngjarnt.
„Hér er ekkert lóðabrask og því
allt önnur verðlagning en þekkist á
höfuðborgarsvæðinu,“ segir Símon
og heldur áfram: „Hér í Hólminum
þurfum við ekkert að greiða fyrir
lóðirnar sem skiptir miklu máli. Á
þann hátt stuðlar bæjarstjórn að
uppbyggingu á staðnum.“
Þeir segja það einkum eigendur
smábáta sem hafi keypt af þeim
húsnæði. Það hefur verið mikil
vöntun á húsnæði af þessari stærð
í Stykkishólmi.
„Ég var áður einn á sjó á mínum
bát, en nú erum við fjórir sem höf-
um vinnu við að byggja skemm-
urnar. Ég er ánægður með það,“
segir Símon.
Aðspurðir sögðu þeir að þeir
hefðu áhuga á að halda áfram að
byggja húsnæði. Þeir létu ekki
staðar numið strax. „Það er verið
að skipuleggja fallegar sjávarlóðir
í Víkurlandi, með stórkostlegu út-
sýni yfir Breiðafjarðareyjar. Ætli
við lítum ekki þangað næst,“ segir
Símon Sturluson með bros á vör.
Eitt starf úti á sjó verður að
fjórum byggingarstörfum í landi
Morgunblaðið/Gunnlaugur Árnason
Framkvæmdamenn. Stefán Björgvinsson og Símon Sturluson fyrir framan bláa skemmuna sem þeir hafa reist.
Mikil þörf er á
iðnaðarhúsnæði
í Stykkishólmi
TEKIN hefur verið í notkun ný
myndgreiningardeild á Sjúkrahúsi
Akraness og heilsugæslustöðinni á
staðnum. Fjölmenni var viðstatt há-
tíðlega athöfn þar sem félagasamtök,
stofnanir, fyrirtæki og einstaklingar
á Akranesi og í nágrenni afhentu
stofnununni tölvusneiðmyndatæki að
gjöf. Kemur það sér einkar vel fyrir
sjúkrahúsið, er frábær viðbót við
tækjabúnað þess og styrkir almennt
stofnunina sem þó er annars mjög
vel búin, bæði hvað varðar þekkingu,
þjálfun starfsmanna og búnað.
Á undanförnum mánuðum hafa
vistarverur verið endurskipulagðar
og rými deildarinnar aukið. Rönt-
gentæki hafa verið endurnýjuð og ný
ómskoðunarstofa að auki tekin í
notkun. Allt starfsumhverfi mynd-
greiningardeildar er með þessum
breytingum orðið stafrænt og hefð-
bundnar röntgenfilmur heyra nú
sögunni til.
Guðjón S. Brjánsson fram-
kvæmdastjóri segir að í áranna rás
hafi stuðningur ýmissa félagasam-
taka og einstaklinga við sjúkrahúsið
verið stórfelldur en hér sé um að
ræða langstærstu einstöku gjöfina í
sögu SHA. Beiðnum um kaup á slík-
um búnað hafi ítrekað verið hafnað af
heilbrigðisráðuneyti.
Sá búnaður sem áhugamannahóp-
ur um kaup á tölvusneiðmyndatæki
fyrir SHA hefur nú safnað fyrir og
fært SHA að gjöf kostar um 20 millj-
ónir kr. Var öllum þeim fjölda sem að
þessari gjöf kom innilega þakkaður
höfðingsskapurinn.
Hátt á annað hundrað inniliggj-
andi sjúklingar eru árlega fluttir með
sjúkrabílum til Reykjavíkur í rann-
sóknir í tölvusneiðmyndatæki og til
viðbótar fara nær 500 Vestlendingar
í rannsóknir af þessu tagi á einka-
reknum stofum í Reykjavík með
greiðsluþátttöku Tryggingastofnun-
ar ríkisins. Í mörgum tilvikum er um
verulega veikt og lasburða fólk að
ræða og ferðalög því íþyngjandi.
Segir Guðjón að nú sé hægt að veita
þessa þjónustu með um 15 mínútna
fyrirvara hér heima en áður hafi það
tekið a.m.k. þrjá klukkutíma með
undirbúningi sjúklings, bið og
myndatöku í Reykjavík.
Til þæginda fyrir sjúklinga
„Þetta sparar tíma og kostnað
vegna sjúkraflutninga og er ekki síst
til mikilla þæginda fyrir skjólstæð-
inga okkar. Það er líka augljóst
reikningsdæmi að hér er um hag-
kvæma þjónustu að ræða þar sem nú
er stofnun í eigu almennings að taka
að sér aukin, kostnaðarsöm verkefni
sem áður voru að verulegum hluta
keypt af einkareknum stofum á
þessu sviði. Í okkar tilviki hefur þessi
viðbótarþjónusta sáralítinn stofn-
kostnað í för með sér,“ segir Guðjón.
„Reksturskostnaður hins nýja sneið-
myndatækis er aftur á móti talsverð-
ur og við gerum að sjálfsögðu ráð
fyrir að heilbrigðisyfirvöld séu
reiðubúin að greiða SHA fyrir sneið-
myndatökur með sama hætti og
Tryggingastofnun hefur umyrða-
laust greitt einkaaðilum en það ligg-
ur þó alls ekki ljóst fyrir á þessu stigi
þótt ótrúlegt megi virðast.“
Guðjón Brjánsson segir að mynd-
greiningardeildin sé nú að fullu kom-
in í svokallað stafrænt umhverfi og
gerður hafi verið samningur við
Landspítala – háskólasjúkrahús um
varðveislu gagna en það er mjög þýð-
ingarmikill þáttur að vel sé búið um
þá hnúta. Þá er einnig komið á sam-
starf við sérfæðinga á Landspítala
um úrlestur mynda og það geta þeir
gert, hvort heldur sem er hér á Akra-
nesi eða á Landspítalanum vegna
þessarar tækni. Það skref sem stigið
er hér með tryggu og öruggu fjar-
sambandi til flutnings gagna er í
samræmi við áætlanir heilbrigðisyf-
irvalda um heilbrigðisnet fyrir alla
landsmenn
Sjúkrahúsið og heilsugæslustöðin
á Akranesi eru skilgreind sem vakt-
sjúkrahús með viðbúnað til móttöku
bráðveikra og slasaðra allan sólar-
hringinn.
Þjónar um 20.000 manns
Á því landsvæði sem Sjúkrahúsið
og heilsugæslustöðin á Akranesi
þjóna einkum búa um 20.000 manns.
Mörg dæmi koma upp árlega þar
sem sjúklingum eða slösuðum er
strax vísað annað þar sem mynd-
greiningarþjónusta er miklum tak-
mörkum háð. Þá mun flutningur staf-
rænna gagna leiða til þess, að læknir
þarf ekki alltaf að vera á staðnum við
úrlestur mynda sem aftur leiðir til
aukinna notkunarmöguleika og stöð-
ugri þjónustu. Að auki bætist við
flutningur með sjúkrabíl til Reykja-
víkur og til baka sem hefur í för með
sér álag og óþægindi fyrir sjúklinga.
Með tilkomu tölvusneiðmynda-
tækis á SHA dregur mjög úr flutn-
ingum í þessu skyni til Reykjavíkur
og verða þeir úr sögunni að mestu
leyti. Meðferð sjúklinga verður
þægilegri og öruggari, nýting tíma
markvissari af hálfu fagfólks og
flutningskostnaður óverulegur. Talið
er að 450 aðrir íbúar af Vesturlandi
fari í tölvusneiðmyndarannsóknir til
Reykjavíkur á ári hverju. Gera má
því ráð fyrir að myndgreiningarþjón-
usta með sneiðmyndatækni á Akra-
nesi verði í miklum mæli nýtt af
starfandi læknum á öllu Vesturlandi.
Stóraukin þjónusta við sjúklinga
Ljósmynd/Jón Á. Gunnlaugsson
Sjúkrahús Akra-
ness fær góða gjöf
Í HNOTSKURN
» Sneiðmyndatækið er veg-legasta gjöf, sem SHA hef-
ur fengið um dagana.
» Tækið mun verða til aðstórbæta þjónustu við
sjúklinga.
» Á þjónustusvæði SHA búaum 20.000 manns.
Rausnarleg gjöf Fjölmenni var viðstatt hátíðlega athöfn þar sem félaga-
samtök, stofnanir, fyrirtæki og einstaklingar á Akranesi og í nágrenni af-
hentu stofnunni tölvusneiðmyndatæki að gjöf.
Afhending Jósef H. Þorgeirsson afhendir Guðjóni Brjánssyni gjafabréfið.