Skinfaxi - 01.12.2001, Blaðsíða 18

Ágústa, Bryndís og Preyja
frjálsíþróttakonur
Efnilegar frjálsíþróttakonur
Innan frjálsíþróttadeildar Selfoss æfa
þrjár ungar og geysilega efnilegar stúl-
kur. Agústa Tryggvadóttir er þeirra elst,
þá kemur Bryndís Eva Óskarsdóttir og
svo Freyja Amble Gísladóttir. Þær hafa
allar hampað íslandsmeistaratitlum í
sínum aldursflokki og setja markið
hátt. Valdimar Kristófersson hitti þess-
ar hressu stelpur að máli í íþróttahús-
inu á Selfossi en þær voru þá nýkomn-
ar úr prófi.
Freyja er 15 ára en það eru ekki nema tvö ár síðan hún fór að æfa
frjálsar af krafti. „Ég æfði sund í fjögur ár en snéri mér síðan
alfarið að frjálsum fyrir tveimur árum. Ég æfi mest 800m hlaup en
er einnig í 400m og 1500m.”
Bryndís er 16 ára. „Ég byrjaði að æfa frjálsar þegar ég var 9 ára. Ég
er aðallega í grindahlaupi, hástökki, þrístökki, langstökki og
aðeins í spretthlaupunum."
Agústa er 18 ára. „Það eru sex ár síðan ég byrjaði
í frjálsum. Ég var einnig í fótbolta á sínum tíma
en æfingaálagið var orðið of mikið svo ég hætti í
fótboltanum. Ég er mikið í sjöþraut og síðan hef
ég einnig einbeitt mér að þrístökki og hástökki."
Hvernig æfir maður eiginlega fyrir stökk- og
hlaupagreinarnar - ekki fer maður bara út og
hleypur eða er stökkvandi allan liðlangan
daginn? „Nei, alls ekki," segja þær hlæjandi.
„Þetta eru fjölbreyttar æfingar sem maður þarf að taka. Það þarf
t.d. að gera styrktaræfingar sem eru margar og fjölbreyttar, það
þarf að æfa þolið og svo skiptir tæknin miklu máli," segir Freyja.
Nú eru frjálsar einstaklingsíþrótt. Haldið þið hópinn og æfið
mikið saman? „Það er misjafnt. Ég og Agústa æfum mikið saman
því við æfum svipaðar greinar en Freyja er meira í hlaupunum og
æfir því aðeins öðruvísi en við. Við höfum heldur ekki alveg jafn
gaman af því að hlaupa eins og Freyja, þannig að við látum hana
um það," segir Bryndís brosandi.
Hvetjið þið hvor aðra mikið þegar þið eruð að æfa saman? „Já,
við reynum það. Við æfum yfirleitt eftir mjög svipuðu prógrammi
og erum þá að gera sömu æfingarnar. Það verður því aðeins meiri
metnaður í manni fyrir vikið og við reynum að hvetja hvor aðra til
að gera betur." Segir Ágústa.
Nú voru þið allar að koma úr prófum, en hvernig gengur að
sameina skólann og íþróttimar? „Það gengur bara nokkuð vel en
getur þó stundum verið dálítið strembið þegar við erum að æfa
mikið. En því meira sem maður æfir því betur skipuleggur maður
sig þannig að íþróttirnar taka ekki frá né bitna á skólanum," segir
Bryndís og Ágústa bætir við. „Námið hjá mér hefur verið að
þyngjast í vetur og ég veit ekki alveg hvernig þetta hefði verið ef
við hefðum verið með þjálfara það sem af er vetri."
Já, þið eruð þjáfaralausar þessa stundina? „Já, það hefur gengið
eitthvað erfiðlega að fá frjálsíþróttaþjálfara en það er vonandi að
það breytist jafnvel fyrir jólin," segir Freyja.
Þetta setur mark sitt á æfingarnar hjá ykkur? „Jú, það gerir það.
Þetta háir okkur náttúrulega mikið og við getum ekki æft að sama
krafti og áður. Það vantar einhvern til að halda uppi aganum og
keyra mann áfram. Ég hef þó reynt að halda mér við með því að
æfa körfubolta," segir Ágústa og Freyja bætir því við að hún sé á
fullu í styrktaræfingum.
En eru frjálsar ekki meiri sumaríþrótt en vetrar? „Nei, ekkert
frekar. Þær eru fyrirferðameiri yfir sumartímann en við æfum
samt af krafti yfir veturinn enda er mikið af mótum innanhúss sem
byrja fljótlega eftir jól," segir Bryndís.
Nú kepptuð þið allar á Landsmótinu á Egilsstöðum í sumar.
Hvernig var það? „Alveg æðislega gaman," svara þær í kór. „Ég
hef farið þrisvar en í fyrsta skiptið sem ég fór tók ég bara þátt í
æskuhlaupinu. Þetta er alltaf jafn gaman og stemmningin og að
hafa alla þessa áhorfendur gerir þetta alveg ógleymanlegt," segir
Ágústa og Freyja er henni sammála og bætir
við. „Þá var aðstaðan á Egilsstöðum alveg
frábær og hjálpaði manni til að ná góðum
árangri. Svo er þetta líka gaman vegna þess að
fjölskyldan notar tækifærið og fer í gott frí.
Þetta er sannkallað fjölskyldumót."
Og það hefur ekki eyðilagt fyrir ykkur að þið
eruð í HSK sem fór með sigur af hólmi? „Nei,
það var ekki leiðinlegt og frábært að vinna
mótið. Því miður unnum við ekki frjálsar en
við hjálpuðum til í heildarstigakeppninni," segir Bryndís.
Ágústa og Bryndís kepptu á móti hvor annarri í lOOm grind á
landsmótinu. Er ekki dálítið erfitt að vera að æfa saman og að
keppa svo á móti hvor annarri á mótum? „Nei, alls ekki. Það er
a.m.k. enginn rígur á milli okkar. Við reynum að fremsta megni að
styðja hvor aðra, en auðvitað er metnaður í okkur og við reynum
að sigra hvor aðra þegar komið er í mót," segir Ágústa.
Þannig að þið verðið ekkert sárar út í hvor aðra eftir mót? „Nei,
nei, a.m.k. er það ekkert langvarandi. Það er þó stundum ágætt að
það sé dálítið langt á milli móta." Segir Bryndís glottandi.
Freyja lenti í 5. sæti bæði í 800m og 1500m hlaupi á landsmótinu
þrátt fyrir ungan aldur, en skyldi talan 5 vera í einhverju
uppáhaldi hjá henni? „Já, ég var búinn að ákveða það fyrirfram
að lenda í 5. sæti," segir hún með stríðnistón og heldur áfram.
„Nei, alls ekki. Ég var mjög sátt við þennan árangur og ég bætti
mig mjög mikið á mótinu eða um 15 sekúndur í 1500m hlaupinu."
Innanhússmótin byrja síðan af krafti eftir áramót og það verður
gaman að fylgjast með þeim stúlkum í vetur og í framtíðinni.
Þannig að þið verðið
ekkert sárar út í hvor aðra
eftir mót? „Nei, nei,
a.m.k. er það ekkert
langvarandi. Það er þó
stundum ágætt að það sé
dálítið langt á milli móta."
Segir Bryndís glottandi.