Heima er bezt - 01.03.1982, Síða 33

Umsagnir um bækur
Kalt vatn milli
skinns og hörunds
Douglas Botting:
INNRÁSIN MIKLA.
Rvík 1981. Almenna bókafélagið.
Þetta er 9. bindi hinnar miklu styrjaldar-
sögu, sem AB gefur út. Segir hér frá innrás
Breta og Bandaríkjamanna í Normandí og
um leið upphafinu á lokaþættinum í hin-
um mikla hildarleik. Margt er hér fróðlegt
og nýstárlegt, og kemur lesandanum á
óvart svo sem hversu rammlega vestur-
strönd Frakklands var víggirt og hve
Þjóðverjar voru raunar andvaralausir er
innrásin hófst og létu blekkjast af brögð-
um bandamanna. Ef til vill er hvergi í
þessari sögu lýst meiri óhugnaði og
grimmd styrjaldarinnar en þarna í návígi
herjanna á Frakklandsströnd. Ég held
flestum hljóti að renna kalt vatn milli
skinns og hörunds við þann lestur. Annars
er þetta bindi ólæsilegra en mörg hinna
fyrri og erfiðara að átta sig á framrás sög-
unnar, valda því hinar nákvæmu frásagnir
af öllum hreyfingum innrásarherjanna.
Lesandinn villist þar líkt og í frumskógi.
Hefði verið nauðsynlegt, að hafa þar
landabréf til að létta lesturinn. Hefðu
myndirnar að ósekju mátt vera færri ef
fleiri hefðu verið kortin. En um það verð-
ur frumútgáfan ein sökuð. Björn Jónsson
hefir þýtt bókina og gert það vel.
Fundvís á fólk
Jón R. Hjálmarsson:
SÉÐ AF SJÓNARHÓLI
Selfossi 1981. Suðurlandsútgáfan.
Enn heldur Jón Hjálmarsson áfram að
birta samtalsþætti sína lesendum til
skemmtunar og fróðleiks, og sem fyrri er
hann fundvís á fólk, sem eitthvað hefir til
frásagna og getur brugðið upp myndum af
liðnum tímum og samferðamönnum, sem
yngra fólkinu er ókunnugt um, og ef til vill
eru margir hinna eldri teknir að gleyma
því, að svona var lífið í ungdæmi þeirra.
En þó svo að þjóðlífið væri hið sama,
bregðast einstaklingarnir misjafnt við því,
sem þeim mætir, og kemur þar fram ólík
skaphöfn þeirra og manndómur. En ein-
mitt af þeim sökum eru viðtalsþættirnir
svo áhugaverðir til lestrar, rétt eins og það
er ætíð fróðlegt að kynnast nýju fólki. En
Jóni Hjálmarssyni fer eins og nær öllum
þeim, sem taka saman viðtalsþætti, að
hann heldur sér eingöngu við liðinn tíma.
En væri nú ekki fróðlegt að breyta til og
velja viðtalsþætti við ungt fólk í eina bók,
svo að menn í framtíðinni geti áttað sig á
viðfangsefnum þess og hugsunum. Og satt
að segja treysti ég ekki öðrum betur en
Jóni til að gefa okkur körlunum og fram-
tíðinni fróðlegar myndir úr heimi unga
fólksins, því að hann kann þá list að laða
fram það, sem áhugavert er hver sem í
hlut á, og því eru bækur hans svo vinsælar.
í þessari nýjustu samtalsbók, hinni fjórðu
í röðinni eru 16 þættir, en þar sem hann
fyrr hefir eingöngu haldið sig við Suður-
landið, leitar hann nú víðar til fanga, og er
það til bóta. En hvernig má það vera um
kynborinn Skagfirðing, að hann skuli
hvergi ræða við fólk úr byggðum þeirra
Espólíns og Gísla Konráðssonar, en
kannske á hann eitthvað í pokahorninu
þaðan.
Allt fer vel að lokum
Guðbjörg Hermannsdóttir:
ÁST OG DAGAR
Akureyri 1981. Skjaldborg.
Guðbjörg Hermannsdóttir er þegar orðin
einn afkastamesti rithöfundur vor á léttar
skáldsögur. Fimm langar sögur á litlu
fleiri árum er út af fyrir sig afrek. Fyrsta
saga hennar var rómantísk sveitasaga, og
lofaði góðu í þeim stíl. En í síðari sögun-
um er efnið orðið fjölbreyttara
vettvangurinn víðari, og stílnum fer fram
með hverri bók. Sagan gerist bæði hér og
erlendis og er eins og nafnið bendir til
ástarsaga en inn í hana fléttað margvís-
legum atburðum. Og allt fer vel að lokum
þótt stundum syrti í álinn eins og vera ber.
Ég las hana mér til skemmtunar, og þeirri
sannfæringu, að Guðbjörgu er óhætt að
halda áfram að skrifa. Hana mun naumast
skorta lesendur.
Gamlir söguþættir
FERÐIR UM ÍSLAND A FYRRI TÍÐ.
Rvík 1981. Menningarsjóður.
Finnbogi Guðmundsson og Jóhannes
Halldórsson hafa valið hér nokkra ferða-
söguþætti frá liðnum öldum. Elstur er
þátturinn um vesturferð Þórðar kakala á
Sturlungaöld, en hinir þættirnir flestir frá
18. og 19. öld, en bókin hefst á frásögn
Eggerts Ólafssonar um Skynsemi hesta, og
fer vel á því, þar sem hesturinn var
lengstum eina farartækið, og hversu ferð-
in tókst oft mest undir hestunum komið.
Þættimir eru allir skemmtilegir og vel
sagðir, og bregða upp sönnum myndum
úr þjóðlífi voru á liðnum öldum, og einnig
mörgum mönnum, bæði þeim, sem
kunnir eru úr þjóðarsögunni og öðrum,
sem lítt er við getið, en öllum er þeim
sameiginlegt, að þá skorti hvorki þrek né
áræði, til að fara ferða sinna og kunnu að
mæta örðugleikunum á hinn rétta hátt.
Kverið er skemmtilegt og læsilegt í besta
lagi og skilur margt eftir að loknum lestri.
Brautryðjandi í
vöruflutningum
Indriði G. Þorsteinsson:
FIMMTÁN GlRAR ÁFRAM.
Rvík 1981. Almenna bókkeafélagið.
Hér segir frá Pétri á Hallgilsstöðum, hin-
um landskunna bílstjóra og braut-
ryðjanda í vöruflutningum milli Reykja-
víkur og Akureyrar. Er þetta í rauninni
fróðleg saga um hvernig sá atvinnuvegur
varð til, og við hverja örðugleika frum-
herjarnir áttu að stríða, bæði við vegleys-
ur, illviðri, ráðamenn og bankastofnanir.
Grunar mig að oft verði vitnað til minn-
inga Péturs um þau efni og upphaf og
þróun bílaaldar á íslandi. En það er ein-
ungis annar þráður bókarinnar. Hinsveg-
ar er maðurinn sjálfur, ókvalráður, ötull,
hygginn, glettinn og gamansamur. Kemur
Heimaerbezl 105