Morgunblaðið - 09.10.2009, Page 21

Fréttir 21ERLENT
MORGUNBLAÐIÐ FÖSTUDAGUR 9. OKTÓBER 2009
FRÉTTASKÝRING
Eftir Boga Þór Arason
bogi@mbl.is
ENGINN er hafinn yfir lögin, ekki
einu sinni forsætisráðherrann. Þetta
er niðurstaða stjórnlagadómstóls
Ítalíu, sem úrskurðaði í fyrradag að
lög, sem veittu Silvio Berlusconi for-
sætisráðherra friðhelgi frá ákæru á
meðan hann gegnir embættinu,
stönguðust á við stjórnarskrár-
ákvæði um að allir væru jafnir fyrir
lögunum.
Úrskurður dómstólsins er mikið
áfall fyrir forsætisráðherrann, sem á
nú yfir höfði sér allt að ellefu sak-
sóknir fyrir spillingu, m.a. mútu-
greiðslur, skattsvik og jafnvel tengsl
við ítölsku mafíuna. Berlusconi lét þó
engan bilbug á sér finna, kvaðst ekki
ætla að láta af embætti og boða til
þingkosninga. Hann sagði að úr-
skurður dómstólsins væri af pólitísk-
um rótum runninn, þar sem ellefu af
fimmtán dómurum hans væru
vinstrimenn.
Stjórnarandstaðan veik
Ítölsk dagblöð sögðu í gær að með
úrskurðinum hefði hafist pólitískt
stríð milli Berlusconis og Giorgio
Napolitano, forseta Ítalíu, sem hefur
heitið því að standa vörð um stjórnar-
skrána.
Stjórn Berlusconis hafði fært þau
rök fyrir lögunum um friðhelgi for-
sætisráðherrans að hann gæti ekki
stjórnað landinu ef vinstrisinnaðir
dómarar fengju að „hundelta“ hann á
meðan hann gegndi embættinu. Nú
þegar Berlusconi hefur verið sviptur
friðhelginni hlýtur að vera erfitt fyrir
stjórnina að falla frá þessum rökum
og halda því fram að Berlusconi geti
stjórnað landinu næstu misserin eins
og ekkert hafi í skorist.
Leiðtogar stærsta stjórnar-
andstöðuflokksins, Lýðræðisflokks-
ins, höfðu hvatt Berlusconi til að
segja af sér ef lögunum yrði hnekkt
en hermt er að þeir prísi sig nú sæla
að forsætisráðherrann ætli ekki að
boða til þingkosninga þegar í stað.
Stjórnarandstaðan á þinginu er veik
og sundruð og ólíklegt er hún geti
gert Berlusconi skráveifu á næstu
mánuðum.
Skoðanakannanir benda til þess að
stuðningurinn við forsætisráð-
herrann hafi minnkað á einu ári úr
63% í 47%. Þrátt fyrir þetta fylgistap
geta fáir leiðtogar í Evrópu státað af
svo miklum stuðningi í kreppunni
sem ríkt hefur í álfunni.
Reynir Fini að mynda stjórn?
Auk efnahagskreppunnar er
fylgistapið rakið til frétta um kvenna-
mál forsætisráðherrans, m.a. um að
hann hafi verið í tygjum við átján ára
stúlku, en það varð til þess að eigin-
kona hans sótti um skilnað. Forsætis-
ráðherrann er einnig sagður hafa
fengið vændiskonur til fylgilags við
sig og hann hefur ekki neitað því en
sagt að hann hafi aldrei „eytt einni
evru í kynlífsþjónustu“.
Berlusconi hefur notfært sér um-
burðarlyndi Ítala í þessum efnum en
ólíklegt er að þeir verði eins fljótir að
fyrirgefa honum telji þeir hann hafa
gerst sekan um spillingu og jafnvel
tengsl við mafíuna. Viðbúið er því að
réttarhöld yfir honum verði til þess
að hann missi fylgi á næstu mán-
uðum.
Þar sem stjórnarandstaðan er veik
stafar Berlusconi meiri hætta af
bandamönnum sínum. Þeir hafa
áhyggjur af yfirvofandi réttarhöldum
en mikilvægasti bandamaðurinn,
Umberto Bossi, leiðtogi Norður-
sambandsins, og fleiri hafa lýst yfir
stuðningi við forsætisráðherrann.
Hugsanlegt er þó að hægrisinnaðir
bandamenn Berlusconis fái sig full-
sadda á hneykslismálunum og rísi
upp gegn honum. Vangaveltur eru
um að Gianfranco Fini, fyrrverandi
nýfasisti og nú flokksbróðir Berlus-
conis, reyni að mynda breiða sam-
steypustjórn hægri- og vinstrimanna
með stuðningi viðskiptajöfra á borð
við Luca Cordero di Montezemolo,
stjórnarformann Fiat og Ferrari.
Gera vopnabræðurnir uppreisn?
Berlusconi stafar meiri hætta af banda-
mönnum sínum en stjórnarandstöðunni
Reuters
Enginn bilbugur „Réttarhöldin verða skrípaleikur. Lengi lifi Ítalía! Lengi
lifi Berlusconi!“ sagði Berlusconi eftir að hann var sviptur friðhelginni.
Ítalir hafa sýnt Silvio Berlusconi
umburðarlyndi í deilunum um
kvennamál hans, en ólíklegt er
að þeir verði eins umburðarlyndir
verði hann sóttur til saka um
spillingu og tengsl við mafíuna.
Í HNOTSKURN
» Ítalskir fjölmiðlar teljalitlar líkur á að Berlusconi
verði dæmdur sekur um spill-
ingu, m.a. vegna þess að dóms-
kerfið sé mjög seinvirkt og lík-
legt sé að sök fyrnist.
VINCENT van Gogh var ekki að-
eins einn af merkustu listmálurum
veraldarsögunnar heldur einnig
ritsnjall með afbrigðum, að sögn
fræðimanna sem hafa rannsakað
gríðarstórt safn bréfa hans.
Bréfin eru nú til sýnis á Van
Gogh-safninu í Amsterdam og sýn-
ingin stendur til 3. janúar. Einnig
er hægt að skoða málverk sem list-
málarinn nefndi í bréfum sínum og
eru sjaldan til sýnis.
Alls hafa 902 bréf, sem Van Gogh
skrifaði eða fékk, verið birt í sex
bindum og á netinu. Útgáfan er af-
rakstur fimmtán ára rannsóknar
hollenskra fræðimanna.
„Margir segja að þetta séu bók-
menntir og ég er þeim sammála,“
sagði Hans Luijten, fræðimaður við
Van Gogh-safnið. „Hann var mjög
vel ritfær, kunni að nota stílbrigði.
Þegar maður byrjar að lesa bréfin
er ekki hægt að leggja bókina frá
sér.“
Bréfin leiða einnig í ljós að Van
Gogh var margbrotnari persónu-
leiki en margir hafa talið. „Ég tel
að bréfin eyðileggi goðsögnina um
hann,“ sagði Luijten. „Hann var
ekki brjálaður snillingur, snauður
og smáður.“ bogi@mbl.is
Reuters
Ritsnilld Bréf Van Gogh sýna að
hann var ekki brjálaður snillingur.
Van Gogh
var líka
ritsnjall
Bréf listmálarans
sýnd í Amsterdam
PALESTÍNSKIR piltar í dýragarði í Gazaborg
ríða hér ösnum með svartar rendur sem málaðar
voru á þá til að þeir líktust sebrahestum.
Eigandi dýragarðsins, Mohammed Bargouthi,
sagði að rendurnar hefðu verið málaðar á asn-
ana til að gleðja börn sem hefðu aldrei séð sebra-
hesta. Of dýrt væri að kaupa ekta sebrahest og
smygla honum til Gazasvæðisins um göng undir
landamærunum að Egyptalandi.
Reuters
SKEMMTA SÉR Á ÖSNUM Í DULARGERVI
DAVID Cameron, leiðtogi breskra
íhaldsmanna, ávarpaði í gær síðasta
flokksþing þeirra fyrir næstu þing-
kosningar og kvaðst vera tilbúinn að
„leiða bresku þjóðina í gegnum erf-
iða tíma“ sem væru framundan.
Ef marka má nýjustu kannanir er
fylgi Íhaldsflokksins um 43% og
Verkamannaflokksins 29% og útlit
er því fyrir að Cameron verði næsti
forsætisráðherra Bretlands. Kann-
anirnar benda til þess að þrátt fyrir
óvinsældir stjórnar Gordons
Browns forsætisráðherra sé stuðn-
ingurinn við íhaldsmenn ekki nógu
mikill til að þeir geti verið öruggir
um að fá nægan þingmeirihluta í
kosningum sem eiga að fara fram
ekki síðar en í júní á næsta ári. Í
ræðunni reyndi Cameron því að
sannfæra Breta um að hann og
íhaldsmenn væru tilbúnir að taka
við stjórnartaumunum eftir að hafa
verið í stjórnarandstöðu í 13 ár.
Ólíkt fjármálaráðherraefni íhalds-
manna, sem boðaði stórfelldar sparn-
aðaraðgerðir í ræðu á flokksþinginu,
fjallaði Cameron ekki um efnahags-
stefnu sína í smáatriðum og lagði
ekki fram nýjar tillögur. Cameron sló
þess í stað á bjartsýnislegri strengi
og lagði áherslu á hugmyndafræði
sína, hét því meðal annars að draga
úr ríkisafskiptum og hvetja fólk til að
axla meiri samfélagslega ábyrgð.
bogi@mbl.is
Kveðst tilbúinn að
standast prófraunina
Cameron bjartsýnn á síðasta flokksþinginu fyrir kosningar
EINN af hverjum fimm Evrópu-
búum verður fyrir hávaðatruflun-
um að næturlagi sem geta reynst
heilsuspillandi að mati Alþjóðaheil-
brigðismálastofnunarinnar (WHO)
sem hefur sett fram nýjar viðmið-
unarreglur vegna hljóðmengunar
að næturlagi í Evrópu. Slík mengun
hafi slæm áhrif á heilsuna rétt eins
og loftmengun eða eiturefni og geti
valdið háum blóðþrýstingi og
hjartaáföllum. Hljóðmengun sé tal-
in óhjákvæmilegur hluti borgarlífs
og hafi því ekki verið hamin eins og
aðrir áhættuþættir. 40 desibel eru
að mati stofnunarinnar hæfilegur
hávaði og jafnast á við rólegt íbúð-
arhverfi. jmv@mbl.is
Hávaði valdi
heilsubresti