Bændablaðið - 10.01.2013, Side 25

25Bændablaðið | Fimmtudagur 10. janúar 2013
Vélabásinn
Sundlaug Húsavíkur er við
Laugabrekku 2 á Húsavík og
var vígð með viðhöfn 6. ágúst
árið 1960. Ekki er ólíklegt að
Húsvíkingar hafi verið farnir að
bíða með nokkurri óþolinmæði
eftir þeim degi því framkvæmdir
við laugina tóku rúm níu ár.
Fyrsta skóflustunga að henni var
tekin 21. júlí árið 1951. Í kringum
síðustu aldamót var ráðist í
framkvæmdir við laugina, en þá
var búningsaðstaða stækkuð og
heitum pottum bætt við.
Sundlaug Húsavíkur er 16,67
metra löng og auk hennar er lítil
barnalaug með hærra hitastigi.
Tveir heitir pottar eru við laugina,
annar þeirra nuddpottur. Þá eru tvær
rennibrautir í lauginni, eimbað og
sólbaðsaðstaða.
Aðsókn í sundlaugina er árlega
um 76.000 heimsóknir en rétt er
að geta þess að þá er skólasund
grunnskólabarna tekið með í
reikninginn. Reglulega hefur verið
boðið upp á sundnámskeið fyrir
fullorðna og hafa þau verið afar
vinsæl.
Vetraropnun Sundlaugar
Húsavíkur er frá 6.45-9.30 og
frá 16-21 á virkum dögum en frá
10-15 um helgar. Á sumrin er laugin
opin frá 6.45-21 á virkum dögum
og frá 10-18 um helgar. Frekari
upplýsingar má fá í síma 464-
6190 eða með því að senda póst á
netfangið sundlaug@nordurthing.is.
Sundlaug Húsavíkur
Laugar landsins
Nýr fjórhjóladrifinn Honda CRV:
Með frábærum skriðvarnarbúnaði
Í byrjun hvers árs keppast
bílaumboðin um að frumsýna
nýjustu árgerðirnar og oft eru
fyrirsagnir í auglýsingunum
uppsettar þannig að um
stórbreytingar sé að ræða frá
fyrri árgerðum. Um næstu helgi
frumsýnir Bernhard Vatna-
görðum nýjustu framleiðslu-
línuna af Honda CR-V. Ég fékk
um síðustu helgi að taka forskot
á aðra og prófaði bílinn. Þessi
Honda CR-V er mikið breyttur
frá CR-V bílnum sem ég prófaði
hér í Bændablaðinu í mars 2010.
Það er óhætt að segja að hér sé
á ferðinni mikil nýjung og er nýi
CR-V-inn fullur af nýjungum sem
ég hef ekki prófað áður. Fyrst ber
að nefna drifið, en nýi Honda CR-V
tekur nú af stað með öllum fjórum
hjólunum, sem gefur bílnum mun
betra viðbragð úr kyrrstöðu.
Frábær skriðvarnarbúnaður
Í bílnum er ný tegund af skriðvörn.
Ef bíllinn rennur mikið til á mikilli
ferð, t.d. þegar maður kemur út úr
beygju og gefur mikið í, þá réttir
hann sig sjálfkrafa af. Venjulega
vilja bílar oft halda áfram að renna
út á hlið þó að reynt sé að rétta
þá af, sem stundum er kallað að
yfirstýra.
Á bílaplani í mikilli hálku
prófaði ég viðbragð, bremsur
og skriðvarnarbúnaðinn. Hálkan
var svo mikil að ég stóð varla í
lappirnar þegar ég fór út til að taka
mynd af bílnum þarna á svellinu.
Nýi útbúnaðurinn frá Honda
hindrar yfirstýringu, sem virkar
þannig að bíllinn bremsar sjálfkrafa
á öðru framhjólinu og réttir þannig
bílinn af. Þennan búnað margreyndi
ég í mikilli hálku og í hvert skipti
sem bíllinn ætlaði í yfirstýringu
voru völdin tekin af mér. Sjaldan
hef ég verið jafn hissa og í hvert
skipti varð ég hrifnari og hrifnari
af þessum búnaði, sem ég spái að
verði staðalbúnaður í öllum bílum í
framtíðinni. Ýmsar aðrar nýjungar
eru í 2013-árgerðinni af Honda
CR-V.
Afar hljóðlátur
Þegar ég settist inn í bílinn og ýtti
á starttakkann (lyklalaust aðgengi,
enginn „sviss“) hélt ég í fyrstu að ég
hefði verið látinn hafa bensínbílinn
því ég heyrði varla í vélinni, en eftir
að hafa lækkað nánast alveg niður
í útvarpinu heyrði ég kunnuglegt
dísilvélarhljóð. Greinilega vel
hljóðeinangraður vélasalurinn.
Á malarvegi er sáralítið
malarvega hljóð þótt á hægum
hraða er fjöðrunin full stíf, en sé
ekið hraðar finnur maður að bíllinn
liggur vel á malarvegi og er mjög
stöðugur.
Góð bakkmyndavél
Fyrst fór ég smá hring innanbæjar
og var ég mjög ánægður með lipurð
bílsins, en bakkmyndavélin er mjög
góð bæði í dagsbirtu og myrkri og
hjálpar manni við að bakka í þröng
bílastæði borgarinnar.
Eftir um 20 km akstur sagði
eyðslumælirinn mér að ég væri
að eyða 11,3 lítrum á hundraðið í
innanbæjar akstrinum. Á framhornum
bílsins eru aukaljós og þegar maður
beygir meira en 10 gráður kviknar ljós
á því horni sem beygt er um og lýsir
til hliðar í beygjuakstursstefnuna.
Þetta fannst mér sérstaklega gott
þegar ég var að snúa við þar sem
algjört myrkur var.
Næst var haldið út fyrir bæinn,
en eftir þann akstur sagði tölvan að
ég hefði verið að eyða 7,5 lítrum
í langkeyrslunni. Eftir blandaðan
akstur í 150 km var eyðsla mín 9,7
lítrar á hundraðið, en meðalhraðinn
var 31 km og aksturstíminn 4
klukkutímar og 56 mínútur.
Speglar eru almennt stórir og
góðir á Honda-bílum og það er
einnig svo með CR-V, bæði hliðar-
og baksýnisspegill inni í bílnum.
Mælaborðið í bílnum er frekar
stórt og sést vel á alla mæla,
sérstaklega hraðamælinn (sem kemur
sér vel fyrir mig persónulega þar sem
ég er farinn að sjá illa næst mér). Á
90 km hraða samkvæmt hraðamæli
segir GPS-tækið mitt að bíllinn sé á
84, en á 50 km hraða eru mælirinn
og GPS-tækið sammála.
Rúmgóður
Þó svo að Honda CR-V virki ekki
stór að utan er hann mjög rúmgóður
að innan fyrir farþega bæði fram í
og aftur í bílnum. Farangursrými er
mikið og með einu handfangi leggjast
sætin niður. Til að opna afturhlerann
er ýtt á takka inni í bílnum eða á
fjarstýringunni af bílnum og þá
opnast afturhlerinn rólega.
Ég var í alla staði ánægður með
bílinn og væri alveg til í að vera
með svona bíl sem fjölskyldubíl.
Honda CR-V er fáanlegur í fjórum
mismunandi útgáfum, en bíllinn
sem ég prófaði var Honda CR-V
Executive diesel 155 hestöfl og
sjálfskiptur.
Vélaprófanir
hlj@bondi.is
Hjörtur L. Jónsson
Lengd: 4.570 mm
Breidd: 1.820 mm
Hæð 1.685 mm
Þyngd:
frá 1.627 kg
upp í 1.806 kg
Helstu mál:
Verðið er mismunandi eftir því hvaða búnaður
er í bílunum, en er frá 5.890.000 til 7.990.000
kr. Vélar eru tvær disíl 155 hestöfl 2199 cc og
1997 cc bensín 155 hestöfl.
Mælaborðið í bílnum er frekar stórt og sést vel á alla mæla, sérstaklega
hraðamælinn.
Farangursrými er mikið og með einu
handfangi leggjast sætin niður.
Myndir / HLJ
Bakkmyndavélin er mjög góð bæði í dagsbirtu og myrkri.