Bændablaðið - 23.05.2013, Side 11

Bændablaðið | Fimmtudagur 23. maí 2013 11
Megnið af rúlluplasti sem
fyrirtækið Búvís fékk sent til
landsins varð fyrir tjóni í hafi.
Um 8.000 rúllur af plasti voru
í sendingunni og skemmdist
stærstur hluti þess þó að
skemmdirnar séu mismiklar.
Þegar er búið að panta nýtt
plast í stað þess sem skemmdist
og bændur ættu ekki að þurfa
að hafa áhyggjur af því að
standa uppi plastlausir í upphafi
heyskapar. Þá hyggst fyrirtækið
selja hluta af plastinu sem varð
fyrir tjóni með afslætti.
„Það sem gerðist var að veður
var afar slæmt, ölduhæð mikil og
plastið fór hreinlega bara af stað
í lestinni. Það var þar á brettum
ásamt áburði og öðru sem var verið
að flytja til landsins fyrir okkur og
það verður bara að segjast að það
var ekki gengið frá þessum farmi
til sjóflutninga í Atlantshafi,“ segir
Einar Guðmundsson hjá Búvís.
Þegar er búið að panta nýtt plast
í stað þess sem skemmdist og á
Einar von á því að það komi til
landsins í fyrstu viku júnímánaðar.
Því ætti það að sleppa enda
stærstur hluti markaðar Búvís á
Norðurlandi þar sem talsvert er í
að hægt verði að hefja slátt.
„Það sér á þessu, sumt af þessu
er ónýtt en annað er hægt að
nota,“ segir Einar og bætir við að
tryggingar bæti tjónið að fullu.
Skemmda plastið verður selt
með mismunandi afslætti eftir því
hvernig ástandið á því er en Einar
segir að gefinn verði allt upp í 70
prósenta afsláttur. Þá bendir Einar
þeim bændum sem þegar hafa
pantað plast hjá Búvís á að þeir
geti breytt pöntunum sínum og
fengið plast sem varð fyrir tjóni
með afslætti, hafi þeir áhuga á
slíku. /fr
Rúlluplast skemmdist í hafi