Bændablaðið - 23.05.2013, Blaðsíða 44

44 Bændablaðið | Fimmtudagur 23. maí 2013
Á dögunum þegar ég skoðaði
úrslit alþingis kosninganna sá ég
mótorhjóla manninum til sárrar
gremju að nú er enginn mótorhjóla-
maður á þingi, Siv hætt, Árni
Johnsen náði ekki kjöri og Bjarni
Benediktsson búinn að selja hjólið
sitt. Í staðinn voru komnir a.m.k.
fjórir eigendur dráttarvéla. Þetta
þýðir bara að ég verð að reyna að
laga mig að breyttu umhverfi á
Alþingi og skrifa meira um traktora.
Fyrir nokkru sá ég auglýst að
Vélaborg Landbúnaður hefði tekið
við umboði fyrir Zetor. Ég renndi
við, skoðaði sýningareintak af
Zetor Proxima Power 120 sem er
117 hestöfl og fékk að taka smá
„montrúnt“ á vélinni.
Kúplingstakki er í gírstönginni og
þarf því ekki að stíga á kúplinguna
þegar skipt er um gír (þetta hefði
verið gott að hafa á traktorunum þar
sem ég var 10 ára lágvaxinn gutti í
sveit og ég þurfti alltaf að renna mér
úr sætinu til að kúpla). Útsýni er gott
út úr vélinni en með moksturstækin
í efstu stöðu þarf maður aðeins að
halla sér fram til að sjá upp. Hægt er
að vera með vélina bæði handskipta
um þrjú þrep í hverjum gír eða að
ýta á takka í mælaborðinu og láta
vélbúnaðinn sjá um þrepin þrjú
sjálfvirkt.
Stýrið er hægt að hækka, lækka og
halla fram og aftur. Mér fannst vélin
fara ótrúlega hratt og í mælaborðinu
sá ég að hraðinn var tæplega 40,
en þar eru ýmsar stillingar, m.a.
hraðamælir, glussarennslismælir,
tímaklukka og fleira.
Lítill hávaði
Ég var hissa á hversu lítið heyrðist
í vélinni inn í stýrishúsið, en þar
hjálpar sennilega mest að pústið nær
þokkalega upp fyrir húsið. Sæti með
öryggisbelti er fyrir einn farþega og
er góð miðstöð inni í vélinni með
loftkælingu, sem ætti að koma sér vel
á heitum heyskapardögum.
Með innbyggða loftdælu
Aftan á vélinni eru hefðbundin tæki,
glussaúrtök ein sex, auka krókur sem
er í góðri festingu. Ekki man ég eftir
neinni annari dráttarvél en Zetor sem
lengi hefur verið með innbyggða
loftdælu til að pumpa í dekk, en
slangan í hana er í verkfærakassanum
inni í vélinni.
Með fjögurra ára ábyrgð
Það sem Zetor hefur fram yfir aðra er
að á öllum vélbúnaði Zetor er fjögurra
ára ábyrgð frá verksmiðju. Í spjalli við
Magnús Sigurðsson, sölumann hjá VB
Landbúnaði, sagði hann mér að fluttar
hefðu verið inn tvær vélar af Zetor á
sérstöku tilboðsverði og að önnur hefði
selst strax.
Zetor vélar eru fáanlegar í
mörgum stærðum og er ódýrasta
vélin frá 4.600.000, en vélin sem ég
skoðaði kostar 8.490.000. Vilji menn
ýtarlegri upplýsingar um Zetor vil ég
benda á umboðið eða heimasíðu VB
Landbúnaðar á vefslóðinni www.vbl.
is.
Í blaðaviðtali við einn af þessum
fjórum „traktoraþingmönnum“ sem
nefndir voru hér í byrjun las ég
að viðkomandi væri ekki hrifinn
af Zetor, en þingmaðurinn ætti að
endurskoða þá afstöðu því Zetor
er með fjögurra ára ábyrgð (út
kjörtímabilið) en þingsætið er ekki
tryggt að sama skapi í fjögur ár.
hlj@bondi.is
Vélabásinn
Hjörtur L. Jónsson
Zetor Proxima Power 120:
Með fjögurra ára ábyrgð – út kjörtímabilið
Zetor Proxima Power 120. Myndir / HLJ
Loftdælan góða á sínum stað eins
og venjulega í Zetor.
Gormurinn í þrítenginu stoppar slátt á klöfunum, mæliglas sýnir magn
glussa á forðabúri.
Allar nauðsynlegar upplýsingar má
sjá í mælaborði.
Laugar landsins
Sundlaugin í Þorlákshöfn
Sundlaugin í Þorlákshöfn er hluti
Íþróttamiðstöðvar Þorlákshafnar
og stendur við Hafnarberg 41.
Laugin var tekin í notkun árið
1981 en endurbyggð á árunum
2007 og 2008 og tekin að nýju í
notkun fyrir unglingalandsmót
UMFÍ þann 31. júlí 2008.
Á útisvæði er 25 metra sundlaug,
tveir heitir pottar, tvær rennibrautir
og vaðlaug. Á innisvæði er stór
innilaug sérhönnuð fyrir yngstu
kynslóðina, hún er grunn, heit og
með fullt af leiktækjum. Innilaugin
hefur notið mikilla vinsælda sökum
þess að hún er ævintýraland fyrir
yngri kynslóðina. Einnig er hún
mjög vinsæl hjá allra yngsta fólkinu
sökum þess að hún er þægilega heit.
Um 50 þúsund gestir sóttu laugina
heim í fyrra.
Sundlaugin í Þorlákshöfn er opin
frá klukkan 07.00 til 21.00 á virkum
dögum. Um helgar er laugin opin
frá klukkan 10.00 til 18.00. Nánari
upplýsingar má fá með því að hringja
í síma 480-3890 eða með því að senda
tölvupóst á ragnar@olfus.is.