Bændablaðið - 23.05.2013, Qupperneq 18

18 Bændablaðið | Fimmtudagur 23. maí 2013
Ferðafélagið Fjörðungur á þrjá skála á Gjögraskaga:
Aðsókn í skálana fer ört vaxandi
Bókanir í skála Ferðafélagsins
Fjörðungs á Gjögraskaga hafa
farið hægt vaxandi á undanförnum
misserum en nú í ár má segja að
hafi orðið sprenging; helmingi
fleiri hafa bókað gistingu í
skálunum það sem af er ári en
á sama tíma í fyrra. Skálarnir
sem um ræðir eru að Látrum, í
Keflavík og á Þönglabakka.
Tvöfalt fleiri á ferðinni en í fyrra
Anna Bára Bergvinsdóttir, bóndi
á Áshóli í Grýtubakkahreppi, er
formaður Ferðafélagsins Fjörðungs.
Hún segir að aukin ásókn skíðafólks
sé helsta ástæða þess að nýting
skálanna sé eins góð og raun beri
vitni. Skálarnir voru á árum áður
skipbrotsmannaskýli sem hreppurinn
fékk afhent til eignar en félagið var
svo endurreist í kjölfar þess og stóð
að uppbyggingu skálanna. Mikil
vinna hefur verið lögð í endurbætur
við húsin að Þönglabakka og í
Keflavík og einnig voru byggðir
við þau myndarlegir sólpallar. Að
Látrum var reist nýtt og glæsilegt
hús alveg frá grunni og við það er
góður pallur. Frá því félagið hóf að
reka skálana hafa bókanir farið hægt
vaxandi þangað til nú að þær eru nær
500, sem eru tvöfalt fleiri en á sama
tíma í fyrra.
„Það sem mestu skiptir er að
fjallaskíðamennska er að sækja
mjög í sig veðrið, hingað kemur
í auknum mæli fólk sem stundar
slíka skíðamennsku og það er að
verða til öflug fjallaskíðamennska í
utanverðum Eyjafirði, bæði austan
og vestan megin,“ segir Anna Bára,
en skíðafólkið er gjarnan á ferðinni
síðla vetrar eða snemma vors.
Jafnan mikil umferð að sumarlagi
Ferðafélagið Fjörðungur var endur-
reist árið 2006 og var í kjölfarið
hafist handa við endurbætur á
skálunum tveimur í Fjörðum, að
Þönglabakka og í Keflavík. „Við
gerðum pall í kringum skálann á
Keflavík og það stækkar hann heil-
mikið, en það er mikið verk enn eftir
óunnið þar og bíður næstu ára,“ segir
Anna Bára. Verulegar endurbætur
voru hins vegar gerðar á skálanum í
Þönglabakka. Þá var gamalt skýli að
Látrum rifið og þess í stað reistur nýr
og glæsilegur skáli með góðum palli.
Anna Bára segir að jafnan sé
mikið um ferðafólk á svæðinu að
sumrinu og það sé afar vinsælt til
gönguferða, enda kjósi fleiri að verja
hluta af sumarleyfi sínu úti í náttúru
landsins. „Það er langt síðan fólk
uppgötvaði hversu gríðarlega fallegt
þetta svæði er og kjörið til göngu-
ferða. Straumurinn hefur vaxið ár frá
ári,“ segir hún. Skálarnir eru því vel
nýttir yfir hásumarið. Þá hafa þeir
verið notaðir á haustin í tengslum
við göngur en verið svo til ónotaðir
að vetrinum þar til nú hin síðari ár.
Hluti af töfraljóma svæðisins að
fara sjóleiðina
„Eftirspurn eftir gistingu í skálunum
hefur aukist, sérstaklega síðastliðin
tvö ár, en nú það sem af er þessu
ári sjáum við umtalsverða aukningu
og um það bil helmingi fleiri hafa
gist í skálunum það sem af er ári en
á sama tíma í fyrra. Það er auðvi-
tað ánægjulegt,“ segir Anna Bára,
en félagið hefur ekki auglýst neitt,
„þetta spyrst bara út og afspurnin er
greinilega góð,“ segir hún. „Fólk sem
hingað hefur komið hefur verið mjög
ánægt. Það þykir t.d. svolítið sér-
stakt að á Látrum háttar þannig til að
menn ganga upp á fjall og renna sér
niður á móts við ólgandi hafið. Það er
sérlega glæsilegt og þykir frekar sér-
stakt, menn eru alveg himinlifandi og
eiginlega bara dolfallnir yfir þessu,“
segir hún. Aðgengi að svæðinu er svo
sérkapítuli, en farið er sjóleiðina á
staðinn og er það hluti af töfraljóm-
anum yfir svæðinu.
Ánægð með hversu vel gengur
Íslendingar eru í meirihluta ferða-
fólks en Anna Bára segir að erlendum
ferðamönnum fari þó fjölgandi.
Félagið fær lítilsháttar tekjur vegna
gistigjalds og segir hún að þær fari í
viðhald, enda alltaf hægt að laga og
bæta. „Það eru alltaf næg verkefni
fyrir hendi,“ segir hún. „Við erum
mjög ánægð með hversu vel gengur,
að aðsókn fari vaxandi og eins er
félagið öflugt og hefur á að skipa
góðu og hæfileikaríku fólki.“ Anna
Bára segir að vel gangi að afla styrkja
til verkefna sem fyrir liggi og fyrir
það séu félagsmenn þakklátir.
/MÞÞ