Skinfaxi - 01.03.2012, Blaðsíða 14

14 SKINFAXI – tímarit Ungmennafélags Íslands
Ungmennasamband
Vestur-Skaftafellssýslu
hélt árlegt innanhússmót
sitt á Kirkjubæjarklaustri
25.–26. febrúar sl. Um 65
keppendur voru skráðir til
leiks og kepptu í fimm aldurs-
flokkum á aldrinum 8–18 ára og í fullorð-
insflokki. Að sögn Ragnheiðar Högnadótt-
ur, formanns USVS, tókst mótið í alla staði
mjög vel.
„Við höldum alltaf tvö innanfélagsmót
á ári, annað innanhúss á Klaustri og utan-
hússmótið í Vík. Þar eru aðstæður frábær-
ar eftir að gerður var völlur með gerviefn-
um í tengslum við Unglingalandsmótið
sem haldið var hér 2005,” sagði Ragnheið-
ur í samtali við Skinfaxa.
Framkvæmdastjóri í 50%
starfi hjá sambandinu
Hún sagði uppgang í starfinu innan USVS
en framkvæmdastjóri tók til starfa þann 1.
mars sl. Hann heitir Kjartan Kárason og er
í 50% starfi hjá Ungmennasambandinu og
á móti í 50% starfi sem íþrótta- og tóm-
stundafulltrúi hjá Mýrdalshreppi.
„Við erum búin að stefna að þessu um
tíma, að ráða framkvæmdastjóra í starf til
okkar og það er loksins orðið að veruleika.
Um tíma var framkvæmdastjóri í 20% starfi
en við lögðum það niður fyrir tveimur árum.
Fjárhagurinn var ekki góður á þeim tíma
en við spýttum í lófana og söfnuðum í
sjóð til að geta farið í starfið af krafti og
ráðið framkvæmdastjóra. Þetta er orðið að
veruleika og mun skila sér í enn beittara
og betra starfi. Ég er bjartsýn og spennt á
framhaldið en svo erum við ennfremur að
leggja lokahönd á nýja heimasíðu,” sagði
Ragnheiður.
Nýi völlurinn mikil lyfti-
stöng fyrir íþróttastarfið
Ragnheiður sagði líka að tilkoma íþrótta-
vallarins hefði klárlega lyft íþróttastarfinu
í Vík og nágrenni í hærri hæðir.
„Völlurinn hefur gefið okkur tækifæri til
að halda hér mót sem við vorum ekki áður
í stakk búin til að halda og svo hafa komið
hingað árlega íþróttahópar á vorin til
æfinga og keppni. Í fyrrasumar héldum
við meistaramót í frjálsum íþróttum og
bikarkeppni fyrir tveimur árum. Völlurinn
hefur því tvímælalaust verið mikil lyfti-
stöng fyrir íþróttastarfið hér á svæðinu,”
sagði Ragnheiður Högnadóttir, formaður
USVS, í samtalinu við Skinfaxa.
Myndirnar hér á síðunni voru teknar á innan-
hússmóti USVS sem haldið var á Kirkjubæjar-
klaustri 25.–26. febrúar sl.
Ragnheiður Högnadóttir, formaður USVS:
Bjartsýn og spennt á framhaldið