Morgunblaðið - Sunnudagur - 14.10.2012, Side 32

32 MORGUNBLAÐIÐ SUNNUDAGUR 14.10. 2012
Matur og drykkir
I
lmurinn af nýbökuðu brauði tekur á móti manni þegar
gengið er inn hjá Salt eldhúsi í bakhúsi við Laugaveg.
Þar ræður Auður Ögn Árnadóttir ríkjum og tekur á
móti konunum sem eru að streyma inn til að læra að
baka franskar makkarónur, þann stórkostlega sæta bita.
Konurnar, þar með talin undirrituð, setja á sig svuntu og
er síðan vísað til borðs. Námskeiðið byrjar á huggulegri
stund, nýbökuðu brauði og áleggi sem Auður er búin að út-
búa, þar með töldu fersku pestói og sítrónusmjöri (lemon
curd). Auður kynnir verkefni dagsins og útdeilir upp-
skriftum. Þarna fer enginn svangur til vinnu og líka ljóst
að það þarf orku til að baka franskar makkarónur því í tali
Auðar kemur skýrt fram að þetta sé mikil nákvæmisvinna.
Til dæmis er líklegra að makkarónubaksturinn mistakist í
rigningu! Þennan dag hellirignir og það dregur aðeins úr
mannskapnum en Auður kann ráð til að vega upp á móti
þessu. „Bakstur er vísindi,“ segir hún og makkarónubakstur
er ekki bara vísindi heldur líka tækni. „Makkarónukökur
eru mjög miklar dívur,“ segir hún og eru það orð að sönnu.
Mikið er lagt upp úr stemningunni og umhverfið er fal-
legt og hægt að segja sem svo að allt umhverfið bjóði upp
á góða upplifun.
Kennslueldhús sælkerans
Í spjalli að námskeiðinu loknu útskýrir Auður hverju hún
vilji ná fram með þessum námskeiðum. „Ég er að reyna að
ná fram þessari sælkeraupplifun. Ég kalla þetta kennslueld-
hús sælkerans. Hingað getur fólk komið til að læra eitthvað
nýtt. Ég legg mikið upp úr því að það sé heildar sælkera-
upplifun að koma hingað hvað varðar bragð, lykt, sjón og
heyrn. Ég vil að þetta allt vinni saman,“ segir hún en til
dæmis er verið að spila frönsk lög á þessu námskeiði, sem
eykur enn á upplifunina.
„Mér finnst líka gaman að reyna að ná fram þeirri
stemningu að fólki finnist það vera að koma í heimsókn til
mín,“ segir hún og það er ástæða þess að hún er til dæmis
ekki með stórt ljósaskilti utan á húsnæðinu.
Blaðakona kom á námskeiðið án þess að þekkja neinn en
leið strax sem hluta af hópnum. Allir fóru að spjalla saman
og stemningin var afslöppuð. „Þetta er það sem gerist
hérna. Til dæmis var indverskt námskeið hérna um daginn.
Á því voru þrjú pör en að öðru leyti þekktist fólkið ekki.
Þar kynntist fólk á námskeiðinu og ætlaði hópurinn að
stofna Facebook-hóp til að halda utan um þetta og skiptast
á uppskriftum og ráðum. Það myndast oftar en ekki
skemmtileg stemning hérna, þó að fólk komi og þekki eng-
an. Stundum þarf ég aðeins að ýta undir þetta, spyr: Viltu
smakka? Og gef til kynna að það megi labba á milli,“ segir
Auður en jafnan eru 12 manns í hópi á matreiðslunám-
skeiðunum hennar.
Sjálf kennir hún á makkarónunámskeiðinu því hún er
lærð á því sviði. Á önnur námskeið fær hún til sín gesta-
kokka. Til dæmis kenndi kokkur af Gandhi á indverska
námskeiðinu og Gulli á Grillmarkaðnum sá um taílenska
matargerðarnámskeiðið sem var í vikunni. Ennfremur hefur
til dæmis verið haldið námskeið í ostagerð og makkarón-
unámskeiðin hafa verið mörg og sérstaklega vinsæl. Fram-
undan er eftirréttanámskeið, námskeið í nepalskri mat-
argerð og ítalskt matreiðslunámskeið en hægt er að
fylgjast með dagskránni á www.salteldhus.is og undir Salt
eldhús á Facebook.
„Ég legg áherslu á það í öllum námskeiðum að þú gerir
sjálfur allt frá grunni og kennarinn er bara til aðstoðar.
Það er allt öðruvísi að horfa bara á einhvern gera eitthvað,
að koma á sýnikennslu í matreiðslu er bara eins og að
horfa á sjónvarp. Mér finnst ofboðslega gaman að taka á
móti fólki og gefa því að borða og gera það í rétta um-
hverfinu, með lifandi blóm í vasa, kerti, réttu músíkina og
fallegt umhverfi, búa til einhverja stemningu,“ segir hún en
frá því að Salt eldhús var opnað um mánaðamótin maí, júní
hefur verið vinsælt hjá vinnufélögum að koma til hennar í
hvataferðir og hópefli. „Starfsmennirnir elda saman og svo
setjumst við niður og borðum saman. Öll matreiðslunám-
skeiðin enda á veislu,“ segir hún.
Það er nú engin tilviljun að þetta sé allt svona smekklegt
hjá Auði en hún er búin að reka stílistaþjónustuna Tilefni
ehf. í nokkur ár. „Svo villtist ég fyrir tilviljun á svona nám-
skeið erlendis, reyndar í aðeins hrárra umhverfi, en þarna
var fullt af ókunnugu fólki að elda saman og svo var sest
niður að borða. Ég hélt áfram að eltast við þetta í útlönd-
um og var alltaf að bíða eftir því að einhver kæmi með
þetta hingað heim. Svo hugsaði ég: Af hverju geri ég þetta
bara ekki sjálf? Og ákvað að slá til.“
Makkarónuuppskrift Auðar er leyndarmál að sinni en
hún deilir hinsvegar tveimur kremuppskriftum sem eru
hennar eigin en Auður hefur verið að þróa krem með
minna sykurmagni en tíðkast til að vega upp á móti sætum
kökunum.
Auður leggur áherslu á að
vera með flotta ofna og elda-
vélar en heldur sig við heima-
eldhúsgræjur svo fólk geti
leikið eftir heima það sem
það lærir á námskeiðunum.
FRANSKAR MAKKARÓNUR
Dívur
bakstursins
Svona pakka fá þátt-
takendur á makka-
rónunámskeiðinu
með sér heim.
SALT ELDHÚS ER NÝR ÁFANGASTAÐUR Í HEIMI SÆLKERANS Í REYKJAVÍK. ÞAR ER
AUÐUR ÖGN ÁRNADÓTTIR VIÐ STJÓRNVÖLINN OG KENNIR ALLT UM LEYND-
ARDÓMA BAKSTURS Á FRÖNSKUM MAKKARÓNUM. BAKSTURINN ER VÍSINDI OG
TÆKNI ÞAR SEM NÁKVÆMNI ER FYRIR ÖLLU.
Texti: Inga Rún Sigurðardóttir ingarun@mbl.is
Myndir: Árni Sæberg saeberg@mbl.is