Morgunblaðið - Sunnudagur - 30.03.2014, Blaðsíða 34

34 MORGUNBLAÐIÐ SUNNUDAGUR 30.3. 2014
Matur og drykkir
1 msk ólífuolía
1 stór laukur (smátt skorinn)
6 hvítlauksgeirar (smátt skornir)
300 gr lambahakk
2 tsk sumac (og örlítið til að dreifa yfir rétt-
inn í lokin)
1 tsk cumin-duft
50 g ristaðar furuhnetur
50 g pistasíuhnetur
2 tsk harissa-mauk
1 ½ bolli kirsuberjatómatar
120 ml kjúklingasoð
4 egg
¼ bolli kóríander
salt og pipar
(Sumac og harissa fæst t.d. í Istanbul Mar-
ket í Ármúlanum)
JÓGÚRTSÓSA
½ bolli grísk jógúrt
1 ½ msk tahini
1 msk sítrónusafi
1 msk vatn
Öllu blandað saman og vatni bætt við til að þynna
sósuna örlítið.
FLJÓTLEGT KÚSKÚS
Blandið smátt skornum döðlum, aprikósum og
rauðlauk saman við soðið kúskús. Í lokin, bætið ½
– 1 krukku af fetaosti í og hrærið saman við.
Aðferð: Athugið að hægt er að útbúa þennan
rétt fyrr um daginn og geyma í nokkra klukkutíma
Steikið lauk og hvítlauk þar til þeir hafa brúnast ör-
lítið (u.þ.b. 5 mínútur). Hækkið þá hitann og brún-
ið lambahakkið í u.þ.b. 5 mínútur. Kryddið með
sumac, cumin, salti og pipar.
Lækkið hitann og bætið við harissa-maukinu og
kjúklingasoðinu. Steikið kirsuberjatómatana í 4-5
mín á annarri pönnu við háan hita þar til þeir byrja
að brúnast örlítið.
Þegar kemur að því að bera réttinn fram er
kjöthakkið látið malla í nokkrar mínútur. Búið til
litlar holur í hakkið og brjótið egg ofan í hverja
holu. Eggjahvíturnar eiga að hlaupa en rauðan á að
vera lin. Setjið tómatana ofan á hakkið (passið að
setja ekki tómatana á eggjarauðurnar sem gætu þá
sprungið). Setjið næst slettur af jógúrtsósunni út á
réttinn hér og þar og dreifið kóríanderlaufum yfir
ásamt örlitlu af sumac-kryddi til skrauts.
Berið fram með pítubrauði (eða öðru góðu ný-
bökuðu brauði) og kúskús.
É
g hef bara alltaf haft gaman af því að
elda og hantera mat og krydd, lesa
uppskriftabækur og slíkt,“ segir
Hadda Björk, spurð um áhuga
hennar á mat og matargerð. Eftir 16 ár sem
markaðsstjóri hjá erlendu lyfjafyrirtæki hér
á landi, vatt hún kvæði sínu í kross fyrir um
tveimur árum og sneri sér alfarið að rekstri
ferðaskrifstofu þeirra hjóna, looknorth.is,
sem sérhæfir sig í ljósmyndaferðum, auk
þess sem þau reka gistiþjónustu í Hrífunesi.
Hristir gesti saman með íslenskum
smáréttum og villibráð
Hadda Björk segir matseðilinn í Hrífunesi
yfirleitt ráðast af því sem henni dettur í hug
þann daginn. Hún leggur mikið upp úr ís-
lensku hráefni og það úr nærumhverfinu,
kaupir m.a. kjöt og fisk af bændum í Skaft-
ártungu, ræktar eigin kartöflur, gulrætur og
rófur, tínir ber og býr til sultur og krydd-
mauk, auk þess að baka brauð. Þau hjónin
veiða líka gæsir og svartfugl.
„Ég býð gjarnan upp á villibráðarsmakk
s.s. reyktar bringur, foie-gras úr lifrinni og
confit úr lærunum. Ég byrja oft á að hrista
fólk saman með ýmsum smáréttum, sem ég
ber fram frammi í stofu eða úti ef veður
leyfir,“ segir Hadda Björk létt í bragði.
Gestirnir borða allir saman í borðstofu þar
sem eldhúsið er líka og andrúmsloftið heim-
ilislegt. Margir spjalla líka yfir pottunum.
„Markmiðið er að gestunum líði eins og vin-
um mínum, í matarboði hjá mér,“ segir hún.
Bætir hún við að nánast undantekningalaust
myndist skemmtileg stemning við borðhaldið
þar sem fólk deilir reynslu sinn af því að
ferðast hér. „Margir vilja síðan ólmir að-
stoða við uppvaskið, en þá þarf oft að minna
pent á að fólk sé nú í fríi,“ segir hún létt.
Framandi krydd í uppáhaldi
Hadda Björk segist löngum hafa verið mikil
kryddmanneskja og leitar jafnan uppi krydd
og kryddblöndur á ferðum sínum erlendis.
Indverskir réttir eru í uppáhaldi en und-
anfarið hefur hún mikið verið að elda mið-
austurlenskt og gefur hér uppskrift að slík-
um rétti. „Ég nota matreiðslubækur meira
til að styðjast við og fá hugmyndir og þróa
gjarnan mínar eigin uppskriftir. Þennan rétt
er þó að finna í bók sem mér áskotnaðist
fyrir stuttu, Jerusalem, eftir pariðYotam
Ottolenghi og Sami Tamimi. Þeir reka æð-
islega veitingastaði í London. Viðskiptavinur
sem sendi mér hana, en hún sá að ég átti
aðra bók eftir þá félaga. Ég hef reyndar
þrisvar sinnum fengið matreiðslubækur
sendar frá viðskiptavinum – ég veit nú samt
að þeir voru ekki óánægðir með matinn
hér,“ segir hún létt í bragði að lokum.
ÞARF OFT AÐ BOLA GESTUM FRÁ UPPVASKINU
Ástríðumatseld
í Hrífunesi
FYRIR TVEIMUR ÁRUM SAGÐI HADDA BJÖRK GÍSLADÓTTIR, LAUSU STARFI SÍNU Í LYFJAGEIRANUM OG ÁKVAÐ
AÐ HELGA SIG FERÐAÞJÓNUSTUNNI. SUMARLANGT, OG NOKKRA MÁNUÐI TIL, STENDUR HÚN NÚ VAKTINA Í
GAMLA SAMKOMUHÚSINU HRÍFUNESI Í SKAFTÁRTUNGU, ÞAR SEM HÚN OG MAÐUR HENNAR, HAUKUR
SNORRASON, LJÓSMYNDARI, TAKA Á MÓTI FÓLKI. HEIMILISLEGT ANDRÚMSLOFT ER ÞAR Í HÁVEGUM HAFT.
Gunnhildur Ásta Guðmundsdóttir gunnhildur@mbl.is
Hadda í eldhúsinu, þar sem gestir fylgjast oft með og spjalla.
Oft er glatt á hjalla við borðhaldið.
Hadda eldar m.a. holulæri fyrir gesti.
Miðausturlenskt
lambahakk