Skessuhorn - 14.05.2014, Blaðsíða 22
22 MIÐVIKUDAGUR 14. MAÍ 2014
Hann lofaði fögru, sem enginn gat efnt - er atkvæði var hann að sníkja
Vísnahorn
Það stefnir víst í að yfir okkur gangi bæjar-
og sveitarstjórnarkosningar einu sinni enn.
Hætt er við að lesendabréfum fækki nokkuð í
prentmiðlunum svona fyrst eftir kosningarnar
og sömuleiðis eru sterkar líkur á að einhverj-
ar núsitjandi bæjar- eða sveitarstjórnir bíði
ósigur sem fjölmiðlarnir geta svo gert sér mat
úr svolitla stund ef lítið er um fréttir af öðru
tagi. Stephan G. Stephansson orti stuttu fyrir
aldamótin 1900 um stjórnmálamann sem beið
ósigur. Þrátt fyrir aldur sinn gætu vísurnar allt
eins átt við daginn í dag:
Hann lofaði fögru, sem enginn gat efnt,
er atkvæði var hann að sníkja -
en slympinn er þjóðviljinn, slysið er hent,
hann slapp ekki á þing til að svíkja.
En láðu ei forlög, sem fella hvern mann -
hann fékkst við sinn andstæðing rama,
sem bæði var lagnari og lygnari en hann
og lofaði alveg því sama.
Austur á landi fyrir mörgum árum urðu
þeir atburðir að kona var kosin í hreppsnefnd
sem var heldur fátítt á þeim tímum karlrembu
og kvenfyrirlitningar og hvers annars sem þið
munið eftir af neikvæðum orðum um þá tíma.
Maður hennar var dugnaðarbóndi en frekar
heimakær og lét yfirleitt sem minnst fyrir sér
fara. Um þessa atburði kvað Hjálmar Guð-
mundsson í Fagrahvammi.
Athygli honum enginn veitir
þó ötull sé hann við búskapinn.
Menn vita tæplega hvað hann heitir
hreppsefndarkonumaðurinn.
Það hefur löngum þótt kostur á sveitar-
stjórnarmönnum og ekki síst oddvitum að fara
vel með hina sameiginlegu sjóði og reyndar
öll verðmæti. Um ágætan og ógiftan oddvita
kvað Guðmundur Helgason:
Í öllu var er oddvitinn
enginn þar mun sonur
á meðan hjarir hreppurinn
ég hygg hann spari konur.
Hvað sem öllum kosningum líður kem-
ur nú vorið yfir okkur annað hvort gott eða
minna gott. Kalt eða hlýtt, þurrt eða vott. Það
þarf ekki mikið ímyndunarafl til að hugsa sér
fallega vornótt þegar menn heyra eftirfarandi
vorvísu eftir Þórmund Erlingsson:
Blundi værum sefur sær,
silfurtær er áin,
lindin hlær og grundin grær,
golan bærir stráin.
Svo gætt sé nú fyllsta jafnræðis kemur hér
önnur sem að öllum líkindum er ort aðeins
fyrr á árinu eða kannske um sumarmálin eða
svo. Bjartsýnin leynir sér ekki en nafn höf-
undarins er mér ekki kunnugt:
Yfir grund er orpið snjó,
álftir á sundi kvaka
meðan blunda bljúg í ró
blómin undir klaka.
Sveinbjörn Beinteinsson sendi góðkunn-
ingja sínum eftirfarandi vísu og verður að telja
þetta fagrar og frómar óskir:
Fagnaðsmegin fáðu hlé
fjarri hverjum stormi.
Hjá þér laufgist líkt og tré
ljóð í góðu formi.
Norður í Miðfirði mun þessi hafa orðið til og
var stundum rauluð á mínum sokkabandsárum:
Verði grýtt í götunni,
gangirðu eftir broti.
Verði skreipt á skötunni
skrepptu að Hnausakoti.
Hnausakot hefur nú verið í eyði um langa
tíð og mætti víst segja þar um eins og Bólu
Hjálmar sagði um annað eyðibýli:
Hér er sætið harmi smurt,
höldar kæti tepptir
rekkur mætur rýmdi burt
-rústin grætur eftir.
Sumir menn eru það sem kallað er beturvit-
ar og telja sig alltaf vita betur en aðra. Vafa-
laust er það alltaf með réttu. Um einn slíkan
kvað Jón Bergmann:
Aldrei var svo ráðið ráð,
rætt eða fært í letur
alvara eða hnyttið háð
að Helgi vissi ei betur.
Einu sinni var það íþrótt stráka að þekkja
bifreiðategundir og árgerðir á löngu færi.
Ekki er ég viss um að það gengi eins vel nú.
Maður nokkur hafði sett Benz merki framan á
bifreið sína sem að öðru leyti var austantjald-
sættuð og varð það tilefni þessarar vísu Ólafs
Gunnarssonar frá Borgum:
Margvíslegt manna gaman
mætti teikna á kort.
Bíllinn er Bens að framan,
bakhlutinn Lada sport.
Mörg og breytileg eru örlög okkar mannanna
og hefur svo lengi verið. Íslendingasögurnar segja
okkur nokkuð um örlög sumra forfeðra okk-
ar sem voru engu blíðari eða flækjuminni á þeim
tímum. Þorsteinn Erlingsson orti um þá hluti:
Meinleg örlög margan hrjá
mann og ræna dögum.
Sá er löngum endir á
Íslendingasögum.
Margir hafa lagt út í heiminn fullir bjart-
sýni og vonar en rekið sig illilega á að heimur-
inn er ekki alltaf eins blíður og menn vonuðu.
Stefán Rósantsson í Gilhaga orti:
Vörumst bræður heiminn hér
hann er gæðatregur.
Sauðargæru undir er,
úlfur hræðilegur.
Því miður er það svo að ekki hafa allir nægi-
legt af öllu, hvorki hérlendis né annarsstaðar.
Í mörgum tilfellum má kenna það rangri for-
gangsröðun. Annaðhvort stjórnvalda eða þá
þeirra eigin. Tæplega getur þó verið um að
ræða alvarlega kreppu meðan verulegu magni
matvæla er hent vegna þess að þau standast
ekki einhverjar ímyndaðar kröfur. Það eru líka
gömul sannindi að sulturinn er besta krydd-
ið og þann fróðleik batt Ólafur Gunnarsson í
stuðla með þessum orðum:
Þeir sem hafa allsnægtir og auð
eta mat í salarkynnum fínum
en ég hef aldrei smakkað betra brauð
en bita sem ég át úr vasa mínum.
Sitt af hverju er það sem mönnunum eða
öllu heldur hinum ýmsu sértrúarflokkum hef-
ur dottið í hug að væri syndsamlegt og er þá
vitnað óspart í hinar ýmsu greinar Biblíunnar
til staðfestingar. Um háttalag frelsarans forð-
um tíð hafði Sveinbjörn Beinteinsson þetta að
segja:
Aldrei kom hann inná bar
eða lék með konum
en forðum þegar veislan var
vínið kom frá honum.
Þetta blessað líf fer semsagt allavega með
okkur og sumir fá meira af þessari en aðrir af
annari grein gæðanna. Ætli niðurstaðan sé
ekki eitthvað á þessa leið:
Það ei brást við þetta líf,
þar um skást má segja:
Fæðast, bjástra, faðma víf,
fölna, þjást og deyja.
Með þökk fyrir lesturinn,
Dagbjartur Dagbjartsson
Hrísum, 320 Reykholt
S 435 1189 og 849 2715
dd@simnet.is
Efnt hefur verið til samstarfs milli
Dalabyggðar og Ungmenna-
sambands Dalamanna og Norð-
ur-Breiðfirðinga, UDN, um
starf íþrótta- og tómstundafull-
trúa. Nýlega var ráðinn í starfið
Guðni Albert Kristjánsson og mun
hann samhliða einnig verða fram-
kvæmdastjóri UDN. Um er að
ræða 50% starf. Í starfið var ráð-
ið frá og með 1. júní næstkomandi
en Guðni hefur reyndar séð um
knattspyrnuæfingar lengst af frá
því hann flutti í Búðardal í ágúst
á síðasta ári. Guðni segir að áhugi
fyrir frjálsum íþróttum sé einnig
talverður á svæðinu og hann á von
á því að einnig verði frjálsíþrótta-
æfingar í sumar. Guðni er Borg-
nesingur að uppruna og er grafísk-
ur hönnuður að mennt. Hann býst
ekki við að starfa mikið á þeim vett-
vangi núna eftir að hann er fluttur
í Búðardal, en það bíði þó að huga
að og bæta vefsíðuna hjá UDN.
Áhuginn er lúmskt
mikill
Eins og áður segir flutti Guðni
Albert í Búðardal í ágúst á síð-
asta sumri ásamt unnustu sinni
Jóhönnu Lind Brynjólfsdóttur
og þau voru þá nýbúin að eignast
frumburðinn, Söru Rós. „Þetta er
rólegt og gott að búa hérna, stutt
í vinnuna og allt. Ég var í fæðing-
arorlofi þegar ég kom og tók þá
fljótlega við fótboltaæfingunum.
Ég var búinn að vinna talsvert við
mannvirkjagerð, aðallega við að
reisa stálgrindahús, þannig að ég
réð mig í húsasmíðar hérna. Það
voru reyndar bara þrír dagar til að
byrja með sem mér var lofuð vinna
en ég er í smíðavinnunni ennþá og
býst við að ég verði í smíðunum
áfram í sumar með 50% starfinu
hjá UDN og Dalabyggð.“ Spurð-
ur um íþróttaáhugann í Dölun-
um segir Guðni að hann sé lúmskt
mikill. „Það hafa samtals verið um
40 manns sem hafa mætt á fót-
boltaæfingarnar, en kjarninn er
svona um þrjátíu. Stærsti hópurinn
eru grunnskólanemar og ungt fólk
um tvítugt. Svo kemur talsvert bil
í okkur nokkra kalla í bumbubolta.
Aldursbilið er ansi breitt,“ segir
Guðni og brosir.
Kosning um lit
á búningunum
Guðni segir að ekki náist í keppnis-
lið nema þá til að keppa við ná-
grannana á Hólmavík, sem UDN
hafi verið í vinasamskiptum við.
Stundum sé líka efnt til keppni
og samskipta við Kormák á
Hvammstanga, íþróttahóp í Vest-
ur-Húnavatnssýslu. „Hérna voru
starfandi mörg ungmennafélög á
árum áður. Núna sameinast fólk
úr þessum félögum á æfingum hjá
UDN. Þetta eru t.d. Ólafur Pá í
Búðardal og Laxárdal, Æskan í
Suður-Dölum, Stjarnan í Saur-
bænum, Dögun á Fellsströnd-
inni og Afturelding á Reykhólum.
Mér sýnist að oft komi upp spurs-
mál um hvaða búning eigi að nota
þegar þessi félög keppa sameig-
inlega. Þess vegna er ætlunin að
efna til kosninga á netinu um lit
á búningi UDN,“ segir Guðni og
brosir. Aðspurður segir hann að
hann viti reyndar ekki alveg með
búningalitinn hjá öllum félögun-
um, en sá blái hjá Ólafi Pá og guli
hjá Stjörnunni hafi verið áberandi
hingað til. Það eru búningamálin
og aðeins betri áhöld sem verða
eitt af fyrstu verkefnunum. Ann-
ar finnst mér þetta spennandi og
skemmtilegt starf sem ég er að
taka að mér og talsverð áskorun
fyrir mig,“ segir Guðni. Æfing-
arnar hjá UDN verða í sumar á
íþróttavellinum í Búðardal, vænt-
anlega tvö kvöld í viku.
þá
Aldursbilið svolítið breitt hjá þeim sem mæta á æfingarnar
Spjallað við nýráðinn íþrótta- og tómstundafulltrúa í Dalabyggð
Guðni Albert Kristjánsson nýr íþrótta- og tómstundafulltrúi í Dölunum.