Dagblaðið Vísir - DV - 13.05.2011, Blaðsíða 55

Lífsstíll | 55Helgarblað 13.–15. maí 2011
Aukahlutir fyrir jóga
Hægt er að stunda jóga án allra aukahluta eða
fylgihluta. Samt sem áður er yfirleitt best að
notast við jógadýnur og hafa handklæði við
höndina. Sumir notast við blokkir sem settar eru
t.d. undir hendur eða fætur til þess að ná betur
niður á dýnuna og þar með ná betri teygju. Til
þess er einnig hægt að nota jógabönd sem þjóna
svipuðum tilgangi. Eftir jógatímann er oft hvíld í
nokkrar mínútur og því er gott að hafa teppi við
höndina til þess að vöðvar kólni ekki um of.
Hvað þýðir jóga
Jóga á rætur sínar að rekja til Indlands og
felur í sér andlegan og líkamlegan aga
til þess að ná fram jafnvægi. Markmið
þess er fullkomið andlegt insæi og ró.
Jóga þýðir sameining á sanskrít og má
tengja það við þetta jafnvægi milli hins
andlega og hins líkamlega. Með þessu
jafnvægi á einstaklingurinn að geta náð
hámarksárangri í lífi sínu og aukið lífs-
gæði sín þannig.
Hvar er hægt að stunda jóga
Hægt er að stunda jóga nánast hvar sem er og margar
líkamsræktarstöðvar bjóða upp á ólíka tíma. Einnig er
hægt að stunda það utandyra eða jafnvel í stofunni
heima. Mikið magn er til af DVD-diskum sem hægt er
að fylgja eftir og hafa meðal annars Jillian Michaels og
Bob Harper úr The Biggest Loser gefið út slíka diska.
Einnig má fara á netið og finna þar myndbönd og
heimasíður til að styðjast við. Á Youtube er til dæmis
hægt að finna mörg myndbönd af mismunandi gerðum
jóga sem hægt er að fara eftir.
Fatnaður í jóga
Margir fatahönnuðir hafa hannað sér-
stök jógaföt en auðvitað fer klæðnaður
hvers og eins eftir því hvernig þeim
finnst þægilegast að vera. Það er
enginn einkennisklæðnaður sem þarf að
klæðast þegar farið er í jóga. Heppilegur
klæðnaður er þó t.d. gerður úr bómull
sem dregur í sig svita og vökva, en
fatnaður gerður úr gerviefnum gerir það
síður. Stella McCartney er með sérstaka
jógalínu hjá Adidas sem er sniðin fyrir
konur og erlendis er ekki óalgengt að
verslanir sérhæfi sig í jógaklæðnaði.
Kostir við iðkun jóga
Jóga er gott fyrir bæði líkama og sál. Þeir
sem stunda jóga reglulega geta fundið
fyrir auknu jafnvægi og meiri liðleika
í vöðvum og liðamótum. Jóga styrkir
vöðva og mótar þá. Þeir sem stunda það
að staðaldri segjast sofa betur og finna
að það hefur góð áhrif á andlega líðan
þeirra. Það dragi meðal annars úr streitu
og auki einbeitningu.
Hvernig á að haga sér í jóga
Hér eru nokkar gullnar reglur um það hvernig hegða
skal sér í jóga.
1. Farðu úr skónum. Það eru allir yfirleitt berfættir í jóga
2. Slökktu á símanum. Það er ekkert verra en ef sími
byrjar að hringja í miðri teygju og truflar allan hópinn.
Njóttu tímans þar sem þú þarft ekki að svara í símann.
3. Ekki rápa inn og út úr tímanum. Það truflar alla.
Notfærðu þér ef það er hlé í tímanum til þess að bregða
þér fram ef þú þarft þess nauðsynlega.
4. Ekki fara fyrr en eftir hvíldina (Savasana). Það er
bæði gott og nauðsynlegt að taka síðustu mínútur
tímans til þess að hvíla bæði líkama og sál.