Gerðir kirkjuþings - 1984, Blaðsíða 27
19
ingar með fundarboði til kirkjuþings.
7. gr.
Um framlagningu, meðferð og afgreiðslu mála á kirkjuþingi, skipan þingnefnda, umræður og
fundarsköp skal setja reglur í þingsköpum kirkjuþings.
III. kafli.
Um viðfangsefni og kjör Kirkjuráðs.
8. gr.
Kirkjuráð fer með framkvæmd sameiginlegra mála þjóðkirkjunnar.
Helstu verkefni Kirkjuráðs eru:
Að framkvæma eða fylgja eftir ályktunum og samþykktum kirkjuþings.
Að fjalla um og fylgja eftir erindum, sem vísað er til þess af hálfu biskups, Alþingis, ráðherra og
hinna ýmsu stofnana eða starfsmanna þjóðkirkjunnar.
Að undirbúa ásamt biskupi fundi kirkjuþings.
Að vera biskupi til ráðuneytis um starfsmannahald þjóðkirkjunnar og setningu erindisbréfa, ef óskað
er.
Að sinna að öðru leyti því, sem lög og reglur kveða á um.
9. gr.
Kirkjuráð getur átt frumkvæði að samningu lagafrumvarpa og setningu stjórnvaldsreglna um kirkju-
leg málefni. Það lætur í té umsagnir um slík mál, sem Alþingi eða ráðherra vísar til þess.
10. gr.
Kirkjuráð hefur með höndum umsjá og stjórn Kristnisjóðs. Það semur árlega fjárhagsáætlun fyrir
Kristnisjóð og sendir kirkjumálaráðuneytinu til samþykkis. Kirkjuráð lætur gera reikninga Kristnisjóðs
fyrir hvert almanaksár og leggur þá fram á næsta kirkjuþingi. Kirkjuráð ber ábyrgð á reikningshaldi
Kristnisjóðs gagnvart kirkjuþingi og stjórnvöldum. Reikningsleg endurskoðun skal framkvæmd af ríkis-
endurskoðun.
11. gr.
Kirkjuráð hefur forræði og forsjá Skálholtsstaðar skv. lögum nr. 32/1963 og fer með málefni Skál-
holtsskóla samkvæmt ákvæðum laga nr. 31/1977.
12. gr.
Kirkjuráð þjóðkirkjunnar er skipað fimm mönnum, biskupi, tveimur guðfræðingum og tveimur leik-
mönnum, sem kirkjuþing kýs. Jafnmargir varamenn eru kosnir af kirkjuþingi með sama hætti.
Kirkjuráðsmenn eru kjörnir á fyrsta kirkjuþingi að aflokinni kosningu til kirkjuþings til fjögurra ára
og gildir umboð þeirra, þar til nýtt Kirkjuráð hefur verið kosið af kirkjuþingi.
Kjöri kirkjuráðsmanna skal þannig háttað, að fulltrúar á kirkjuþingi, er hafa atkvæðisrétt, rita á
sérstakan kjörseðil nöfn tveggja guðfræðinga og tveggja leikmanna. Teljast þeir rétt kjörnir, sem flest
atkvæði fá. Hljóti tveir eða fleiri jafnmörg atkvæði, skal kjósa aftur og þá aðeins milli þeirra, sem jafn
mörg atkvæði hlutu. Fáist ekki úrslit með þessum hætti, ræður hlutkesti. Varamenn skulu kjörnir með
sama hætti, þegar kjöri aðalmanna er lokið.
Að jafnaði skal gengið til kosninga, eftir að síðustu umræðu um skýrslu Kirkjuráðs er lokið.