Tölvumál - 01.10.2012, Blaðsíða 19

19
um 70-80% af notendum vefsins en frá því í október s.l. hefur
vefurinn fengið heimsóknir frá yfir 60 löndum. Kennarar í Danmörku
nota vefinn talsvert í kennslu og hef ég fengið marga tölvupósta frá
kennurum og foreldrum þaðan þar sem ánægju er lýst með vefinn.
Næstu skref eru að halda áfram að leita leiða til að bæta við fleiri
leikjum og fleiri tungumálum á paxel123.com. Á allra næstu vikum
kemur einn leikur af paxel123.com á Apps og vonandi eiga fleiri
leikir af vefnum eftir að rata í spjaldtölvur. Þá mun það skýrast mjög
fljótlega hvort paxel123.com taki þátt í stóru ESB samstarfsverkefni
ásamt SAFT og Rannsóknarstofu um mannlegt atferli. Verkefninu
verður stýrt af þýskri systurstofnun SAFT og mun fjalla um þróun
og prófun á gæðaefni fyrir börn á internetinu.
Á þessu rúmlega eina og hálfa ári sem liðið er frá því að fyrsti
styrkur fékkst hefur paxel123.com þróast hraðar og orðið mun
stærra verkefni en lagt var af stað með í byrjun. Þetta er búið að
vera mjög skemmtilegt verkefni enda hef ég notið þeirra forréttinda
að hafa í kringum mig frábært lið fólks sem hefur lagt á sig mikla
og oft óeigingjarna vinnu til að gera vefinn að því sem hann er í
dag. Það er ómetanlegt því þótt styrkir séu nauðsynlegir verkefninu
þá væri paxel123.com ekki svona vel heppnað verkefni án þessa
fólks og fyrir það ber að þakka. Ég hlakka til að halda þessu
verkefni áfram, þetta er draumur sem hefur ræst og hefur veitt mér
dýrmæta reynslu. Í svona verkefni er mikilvægt að gefast ekki upp
því þegar sótt er um styrki koma fleiri nei en já en trúin á verkefnið
allan tímann hefur gert paxel123.com að veruleika.
Að endingu datt ég niður á það að gera námsleikjasíðu sem væri
ókeypis, með engum auglýsingum og engum upplýsingum yrði safnað
um notendur því mér finnst mikilvægt að börn geti leikið og lært á netinu
í öruggu umhverfi.