Skólavarðan - 01.09.2002, Blaðsíða 27

Íslensk náttúra er full af ólýsanlegri orku sem flæðir
óheft til þeirra sem eru móttækilegir fyrir henni.
Dreymir okkur ekki öll um kvöldsól, hlýja golu,
kyrrð, gróðurilm, fuglasöng og lækjarnið? Þvílík end-
urnýjun á sálinni þegar maður nær að upplifa þessar
aðstæður.
Ég var svo lánsöm að eiga sannkallaðan dýrðardag á
Borgafirði eystra í sumar. Þessi litli byggðakjarni sem
ber heitið Bakkagerði er alveg við hafið en einnig um-
kringdur einum fegurstu fjöllum Íslands, Dyrfjöllum,
þar sem er vinsælt göngusvæði. Í bæjarfélaginu er
margt skemmtilegt að sjá, svo sem gamalt uppgert hús
nýtt sem sumarhús og steiniðjuna Álfastein sem er
þekkt. Kringum byggðina eru einnig margir staðir
sem gaman er að ganga á, fara
um ríðandi, akandi eða á báti.
Sólin skein, blár himinn, hit-
inn var yfir 20 ° C og gróðurinn
á sínu fegursta blómaskeiði þeg-
ar við settum upp tjaldið og
komum okkur fyrir. Nokkrir
aðrir ferðamenn, íslenskir sem
erlendir, höfðu einnig valið þennan sælureit þar sem
tjaldstæðið er í boði sveitarfélagsins og hreinlætisað-
staða bæði með heitu og köldu vatni. Börnin léku sér
á túninu og voru fljót að finna nálæga skurði, kletta
og annað sem heillar ungt ævintýrafólk. Eftir að hafa
grillað og gætt sér á íslensku fjallalambi með öllu til-
heyrandi hélt fjölskyldan í kvöldgöngu um staðinn.
Fyrst var gengið yfir hæð með skemmtilegum klettum
og komið niður sjávarmegin. Þar var girðing með
fjölda hesta með hnakkfarið á bakinu eftir að hafa
þjónað mannskepnunni fyrr um daginn. Við gerðum
okkur í hugarlund alla þá skemmtilegu staði þarna í
nágrenninu sem gaman væri að fara á ríðandi, til
dæmis Loðmundarfjörð og Höfn. Eftir að hafa strok-
ið hestunum og fengið svolít-
inn ilm af þeim á fingurna
héldum við áfram göngu með-
fram fjörunni. Þar nutu börnin
þess að klifra yfir stórgrýtið og
horfa á lífríkið í sjónum en við
eldri héldum okkur við götuna
sem liggur meðfram strönd-
inni og er alsett steinum í öll-
um regnbogans litum. Þegar
komið var að höfninni lá leiðin að nýlegu fuglaskoð-
unarhúsi. Þar settumst við niður, horfðum á fjölbreytt
fuglalífið fyrir utan og flettum upp í þeim fuglabókum
sem þarna voru og ætlaðar gestum og gangandi.
Börnin reyndu að greina hettumáfa frá sílamáfum auk
þess að læra heiti á fleiri fuglum. Á heimleiðinni
gengum við framhjá einu búðinni á staðnum, félags-
heimilinu og horfðum á bæjarbúa taka lífinu með ró
fyrir utan hús sín í kvöldblíðunni. Dagurinn var á
enda, við komum okkur fyrir í pokunum í tjaldinu og
nutum þess að sofna út frá kyrrðinni og ómi náttúr-
unnar.
Þessi hringferð okkar um landið með dvölinni á
Borgarfirði skilaði börnum mínum miklum áhuga og
fræðslu um það fuglalíf sem hér er og fjölbreytni sem
er að finna í íslensku grjóti. Það er mikil gæfa að eiga
þess kost að ferðast um Ísland og upplifa það á þenn-
an hátt og endurnýja sjálfan sig til að takast á við dag-
legt líf. Það er skemmtilegt og eykur víðsýni að ferð-
ast erlendis og koma í stórar og fallegar borgir en þá
orku sem býr í íslenskri náttúru er hvergi annars stað-
ar að finna. Það er ósk mín að á Íslandi verði áfram
dreifbýli, óbyggðir og ósnortin náttúra sem afkom-
endur mínir fái að njóta um ókomnar aldir.
Ég hvet kennara, foreldra og alla þá sem koma að
skóla- og uppeldisstörfum til að kenna erfingjum
okkar að njóta og virða það dýrmæta land sem okkur
hefur verið gefið.
Guðrún Snorradóttir
Höfundur er náms- og starfsráðgjafi í
Lindaskóla, Kópavogi
Smiðshöggið
30
Íslensk náttúra er
full af orku
Það er mikil gæfa að eiga
þess kost að ferðast um Ís-
land og upplifa það á þennan
hátt og endurnýja sjálfan sig
til að takast á við daglegt líf.