Morgunblaðið - 07.06.2008, Side 25

úr bæjarlífinu
MORGUNBLAÐIÐ LAUGARDAGUR 7. JÚNÍ 2008 25
Einmunatíð hefur verið í Húnaþingi í vor, svo
elstu menn muna varla annan eins maímán-
uð, tún eru að spretta, og gæti sláttur hafist
um miðjan mánuð hjá kúabændum, en sauð-
fjárbændur beita flestir sín tún fram í júní.
Sauðburður virðist hafa gengið vel, að sögn
ráðunauts RHS. Ýmislegt hrjáir þó sauð-
fjárbændur hér, mikil hækkun áburðar og
annarra aðfanga, ótti við afleiðingar mat-
vælafrumvarps landbúnaðarráðherra og nú
síðast riðugreining í Hrútafirði. Sú staðreynd
mun krefja sauðfjárbændur Miðfjarðarhólfi
um nýja starfshætti í samskiptum og um-
gengni með búfé, vélar og tæki og um marg-
víslegra samstarf en áður var. Miðfjarð-
arhólf, sem nær yfir austanverðan
Hrútafjörð, Miðfjörð og hluta Fitjárdals, tel-
ur 11–12 þúsund vetrarfóðraðar kindur og er
undirstaða afkomu fjölmargra bænda á svæð-
inu.
  
Veiðifélag Miðfirðinga hefur boðið til útleigu
veiðirétt í vatnasvæði Miðfjarðarár frá og
með sumrinu 2009. Í útboðslýsingu eru m.a.
þær nýjungar, að skylt verður að sleppa öll-
um stórlaxi og einnig skylt að sleppa öllum
laxi eftir 10. sept. Einnig verður áin eingöngu
leigð fyrir fluguveiði. Stöngum verður fjölgað
í tólf á besta tíma en einungis byrjað með sex
stangir. Meðallaxveiði frá 1974 er 1.243 laxar
og mesta veiði 2.581 laxar 1977 en minnsta
veiði 433 laxar 2001. Félagið Lax–á ehf. hefur
verið með ána á leigu í 9 ár en ekki náðust
samningar um framhaldsleigu. Tilboð eiga að
berast fyrir 7. júní og mun stjórn félagsins
þá þegar fara yfir umsóknir.
  
Heilbrigðisstofnun Hvammstanga á sér
marga velunnara. Í árbyrjun 2007 voru stofn-
uð Hagsmunasamtök HSH, sem hefur að
markmiði að kaupa búnað og tæki til heil-
brigðsþjónustu fyrir söfnunar- og gjafafé sem
berst. Á fyrsta starfsári samtakanna söfn-
uðust um tuttugu milljónir króna og hefur
þegar verið keyptur búnaður fyrir um tólf
milljónir króna. Kvenfélögin hafa einnig stað-
ið sterkt við bakið á HSH, nú á dögunum gaf
Kvenfélagið Björk stórt fiskabúr til að gleðja
vistfólk og var því valinn staður á hvíld-
arsvæði fólks, svo það mætti gleðja augu sín
við síkvikult líf nýrra íbúa.
  
Mikill áhugi er á að efla ferðaþjónustu hér-
aðsins, aukin uppbygging er í Selasetri Ís-
lands, sem er í hinu virðulega húsi Sigurðar
Pálmasonar á Hvammstanga. Aðsókn var góð
á fyrsta starfsári og miklar væntingar
bundnar við komandi ferðamannavertíð. Á
Illugastöðum á Vatnsnesi hafa ábúendur gert
góða aðstöðu til selaskoðunar, byggt þar upp
þjónustuhús og leyfa þau gestum að skoða
fallegt og mjög áhugavert íbúðarhús, frá um
1930.
Á Gauksmýri er unnið að uppsetningu sýn-
ingar um íslenska hrafninn; þar á staðnum er
einnig áhugavert fuglaskoðunarhús við
Gauksmýrartjörn, sem er endurheimt vot-
lendi. Nýr framkvæmdastjóri við Grettistak
hefur margt á prjónum fyrir sumarið og
áframhaldandi uppbyggingu, m.a. sýningar í
Grettisbóli á Laugarbakka, en þar hefur
hann sjálfur aðstöðu í sumar.
HVAMMSTANGI
Karl Ásgeir Sigurgeirsson fréttaritari
FÓLK sem borðar lítið salt á frek-
ar á hættu að deyja úr hjartasjúk-
dómum en þeir, sem innbyrða
passlega eða of mikið af salti mið-
að við það sem ráðlagt er. Þetta
sýnir ný bandarísk rannsókn sem
vefmiðill Berlingske Tidende
greinir frá.
Mataræði og lífsstíll 8.700
Bandaríkjamanna var skráður og
borinn saman við sjúkdóma og
andlát í hópnum. Í ljós kom að dán-
artíðnin var 24% hærri hjá hópnum
sem neytti minnst af salti en hjá
meðaltalinu.
Mest áberandi var munurinn á
dánartíðni þeirra sem þjáðust af
hjarta- og æðasjúkdómum. Í þeirra
hópi hefðu menn frekar búist við
hærri dánartíðni hjá þeim sem
borðuðu mest salt, þar sem salt-
neysla hefur áhrif á blóðþrýsting.
Hins vegar kom í ljós að þeir
hjartasjúklingar sem sneyddu hvað
mest hjá salti voru í 80% meiri
hættu á að deyja úr hjartasjúk-
dómum en aðrir. Í tölunum er tek-
ið tillit til annarra áhrifaþátta, s.s.
reykinga, háþrýstings og syk-
ursýki.
Ekki ástæða til að vera
mjög hræddur við saltið
Að sögn danska næringarsér-
fræðingsins Susanne Gjedsted Bü-
gel sem hefur skoðað rannsóknina,
innbyrðir hópurinn sem um ræðir
nánast ekkert salt, en bæði klór og
natríum, sem í því er að finna eru
lífsnauðsynleg manninum. Hún
bendir enn fremur á að sami hópur
er léttari en meðaltalið. Að auki
neytir hann lítils kalíums, sem
einnig getur valdið hjartasjúkdóm-
um.
Bügel segir almennt ekki ástæðu
til að vera mjög hræddur við salt.
Ekki skaði að draga úr saltneysl-
unni en erfitt sé að benda á ávinn-
ing af slíku fyrir fullfrískt fólk.
Margar rannsóknir hafi hins vegar
sýnt fram á að hægt sé að lækka
blóðþrýsting með því að minnka
við sig salt. Og samkvæmt fréttinni
er enginn vafi á fylgninni milli há-
þrýstings og hjartasjúkdóma.
Of lítið salt
hættulegra
en of mikið
vinbudin.is
E
N
N
E
M
M
/
S
ÍA
/
N
M
33
16
1