Skessuhorn - 16.11.2016, Side 12

MIÐVIKUDAGUR 16. NÓVEMBER 201612
Fasteignaverð hefur hækkað um-
talsvert á undanförnum mánuðum
og árum. Lítið framboð er af eign-
um til sölu miðað við eftirspurn og
þá sérstaklega af minni eignum. Þá
er leigumarkaðurinn flestum erfið-
ur. Verst er ástandið í Reykjavík þar
sem ferðafólki er leigður hluti þess
húsnæðis sem almenningi hér á landi
stæði annars til boða. Við þessar að-
stæður nær markaður ekki jafnvægi
fyrr en leigu- eða söluverð fer yfir
byggingarkostnað. Víðast hvar utan
höfuðborgarsvæðisins er talsvert í að
það verði. Hér á Vesturlandi hefur
leiguverð rokið upp á liðnum miss-
erum, en þrátt fyrir það er eftir-
spurnin mikil og margir um hverja
íbúð sem auglýst er til leigu. Þetta
eru fasteignasalar á Vesturlandi sem
Skessuhorn hefur rætt við sammála
um. Þeir verða varir við straum fólks
af höfuðborgarsvæðinu sem sækist
eftir ódýrari eignum í jaðarbyggðum
höfuðborgarsvæðisins. Við heyrðum
hljóðið í þremur fasteignasölum og
forvitnuðumst um stöðuna á fast-
eignamarkaði í landshlutanum.
Seljendamarkaður á
Akranesi
Daníel Rúnar Elíasson hjá fasteigna-
sölunni Hákoti á Akranesi segir að
skortur sé á eignum í öllum flokkum
íbúðarhúsnæðis, hvort sem um sé að
ræða fjölbýlishús, sérhæðir eða sér-
býli. „Að vísu er nú að rísa ný blokk
við Asparskóga á Akranesi, þar sem
tólf íbúðir verða tilbúnar til afhend-
ingar á næsta ári. Það hjálpar eitt-
hvað,“ segir hann. Daníel segir að
nú sé svokallaður seljendamarkað-
ur. „Það eru fleiri kaupendur og þar
af leiðandi fæst betra verð fyrir eign-
ina. Það sem breyst hefur á síðustu
árum er að við erum að fá fleira fólk
annars staðar að, fólk sem hefur til
dæmis selt á Stór-Reykjavíkursvæð-
inu og flytur hingað. Þetta er fólk á
öllum aldri, bæði barnafólk og eldra
fólk. Maður sér miklar breytingar á
þessu,“ útskýrir Daníel.
Leiguverð hækkað mikið
Daníel segir þá sem hafa hugsað sér
til hreyfings á fasteignamarkaði fylgj-
ast vel með, þó sumir setji eignir sín-
ar ekki á sölu. „Þó að þeir séu með
sölueign, þá sjá þeir kannski ekkert
á markaðnum sem hentar. Svo fara
öll hjól í gang þegar þeir sjá eitthvað.
Sumir eru jafnvel búnir að láta meta
hjá sér eignina en bíða með að setja
á sölu þar til þeir sjá eitthvað sem þá
langar í og eru þá kannski með sölu-
lega eign sjálfir. En okkur vantar
meira af eignum, því leigumarkaður-
inn er alveg sprunginn líka. Það þarf
að byggja meira,“ segir Daníel Rún-
ar. Hann bætir því við að einhverjir
hafi náð að skapa sér færi á að kom-
ast út af leigumarkaðinum enda hafi
leiguverð hækkað mjög mikið og
er meðalleiguverð á Akranesi í dag
í kringum 150 þúsund. Eftirspurn-
in eftir atvinnuhúsnæði er minni en
eftir íbúðarhúsnæði og segir Daníel
að fáir séu að leita eftir stórum fjár-
festingum á þeim markaði. Þá séu
fáar eignir sem henti fyrir einstak-
linga og aðra sem sækjast eftir minni
eignum. „Það er einhver eftirspurn
eftir slíku en kannski ekki til það sem
fólk er að leita að. Það er til dæm-
is mikil vöntun hér á geymsluhús-
næði og slíku. 30 - 60 fermetra rými
eins og fólk kaupir gjarnan á höfuð-
borgarsvæðinu og á þá bílskúr eða
geymslu úti í bæ.“
Nauðsynlegt að
byggja meira
Daníel segir að eftirspurn sé eftir
öllum tegundum eigna á húsnæð-
ismarkaðinum en lítið framboð sé
í hverjum flokki miðað við stærð
markaðarins. „Ef fólk er með sér-
stakar óskir, þá getum við kannski
bara bent á eina til tvær eignir
og stundum enga. Eins ef fólk er
að leita að nýlegri blokkaríbúð,
þriggja eða fjögurra herbergja. Þá
segjum við bara pass.“ Þessi staða
á fasteignamarkaðinum hefur leitt
til þess að íbúðaverð hefur hækkað
mikið undanfarin ár. Segir Daní-
el að í sumum tilfellum hafi verð
hækkað um 20 til 30% frá hruni.
„Eða jafnvel meira í einhverjum
tilfellum eins og gagnvart þessum
blokkaríbúðum.“ Hann segir það
þó vera óvissuþátt hvort búast megi
við áframhaldandi hækkun á verði.
„Á meðan þetta spilast eins og það
er, þegar lítið er til og margir að
kaupa, þá hækkar verðið. Á ný-
byggingum sést að það er munur á
verði á nýjum eignum og gömlum,
það hjálpar gömlu íbúðunum að
hækka í verði. Ég vil hvetja verk-
taka til þess að gera eitthvað í því
að byggja, því það vantar sárlega
íbúðir. Það þarf að byggja til að
það geti myndast eðlilegt ástand á
markaði, enda þarf að vera ákveð-
ið magn á markaði til að fólk hafi
val,“ segir Daníel Rúnar Elíasson
að endingu.
Stykkishólmur
sker sig úr
Á Snæfellsnesi vantar einna helst
fasteignir í Stykkishólmi. Að sögn
Péturs Kristinssonar hjá Fast-
eignasölu Snæfellsness er staðan á
fasteignamarkaðinum ágæt á Snæ-
fellsnesinu en tveggja til þriggja
herbergja íbúðir eru vinsælastar til
kaups. „Það vantar einna helst litl-
ar íbúðir hér í Stykkishólmi. Það
vantar reyndar allt en það er mest í
þessum stærðarflokki. Dýrari hús-
in eru tregari í sölu,“ segir Pétur
í samtali við Skessuhorn. Hann
segir eftirspurnina í Stykkishólmi
vera mikið meiri en verið hefur.
„Það er eitthvað um að fólk hætti
við að selja því það finnur ekkert
annað sem því líst á, það er ekki til.
En það er verið að byggja í Hólm-
inum og meira er í farvatninu.“
Fasteignaverð hefur hækkað líkt
og víða um landið en einna helst
í Stykkishólmi. „Stykkishólmur er
öðruvísi en hinir staðirnir á Snæ-
fellsnesi. Þar er fjölbreyttara at-
vinnulíf og mikið að gera í ferða-
þjónustunni,“ segir Pétur.
Staðan á leigumarkaði á Snæ-
fellsnesi er svipuð og annars stað-
ar, leiguverð hefur hækkað og fáar
íbúðir eru í boði. Hann segist búast
við því að ástandið verði óbreytt á
fasteignamarkaðinum. „Ég sé ekk-
ert annað en að þetta verði svona,
nema það verði byggt. Það er nóg
að gera hjá öllum og allir vilja vera
hér.“
Borgar sig ekki
enn að byggja
Ingi Tryggvason á Fasteignasölu
Inga Tryggvasonar í Borgarnesi
segir einhvern skort vera á mark-
aðinum í Borgarnesi enda hafi
oft verið fleiri fasteignir á sölu en
núna, sérstaklega af minni eignum.
„Það er lítið til af eignum í fjölbýli.
Þær hafa verið að tínast út en lítið
hefur komið inn í staðinn. Það var
lítil hreyfing á markaðinum í tölu-
verðan tíma en þetta fór aftur af
stað á síðasta ári og sú þróun hefur
haldið áfram. Undanfarna mánuði
hefur því töluvert verið að seljast
en ekki mikið komið inn á móti,“
segir Ingi í samtali við Skessu-
horn. Hann telur skýringuna vera
þá að fólki sem er að kaupa sína
fyrstu eign fari fjölgandi en lítið
hefur verið um það á undanförn-
um árum.
Ingi segir þó hreyfingu hafa ver-
ið á öllum markaðinum, ekki bara
á minni eignunum. „Það hefur líka
farið af stærri eignunum en lítið er
að koma inn af þeim minni. Við
eigum alltaf eitthvað til af þessum
stærri eignum en þær seljast ekki
jafn hratt og hinar. Það er samt
töluvert minna til sölu en oft hefur
verið.“ Hann segir leigumarkaðinn
í Borgarbyggð vera erfiðan. Skort-
ur sé á leiguhúsnæði alls staðar í
sveitarfélaginu og þá sérstaklega í
Borgarnesi. Þrátt fyrir það sé ekk-
ert af íbúðum í byggingu núna.
„Fasteignaverð hefur hækkað eitt-
hvað en allt of lítið, þetta er ekki
sambærileg þróun og hefur verið
til dæmis á höfuðborgarsvæðinu.
Þetta hefur ekki náð þeim tölum
hér sem það var í þegar fasteigna-
verð var sem hæst og á töluvert í
að ná því. Skýringin á því að menn
byggja ekki hérna er líklega sú að
menn ná ekki upp í byggingar-
kostnaðinn eins og markaðurinn
er hér í dag.“ grþ
Mikil eftirspurn eftir minni fasteignum á Vesturlandi
Daníel Rúnar Elíasson hjá Fasteignasölunni Hákoti segir að sárlega vanti íbúðir á Akranesi og hvetur verktaka til þess að gera eitthvað í því að byggja. Hér er mynd úr
safni frá reisingu fjögurra íbúða gistihúss við Suðurgötu 33.
Mestur er skorturinn í Stykkishólmi og einkum eftir smærri eignum. Síðasta sumar var reist parhús og er drónamynd þessi
síðan þá. Ljósm. sá.
Lítið er byggt í Borgarnesi og enn er nokkuð í land að fasteignaverð nái bygg-
ingarkostnaði.