Skessuhorn - 14.02.2018, Blaðsíða 12
MIÐVIKUDAGUR 14. FEbRúAR 201812
Nýverið voru auglýstar til umsókn-
ar tólf fjölbýlishúsalóðir og átta par-
og raðhúsalóðir í Skógarhverfi 1 og
2 á Akranesi, til byggingar á samtals
178 íbúðum. Alls bárust 44 umsóknir
sem náðu til sex rað- og parhúsalóða
og átta fjölbýlishúsalóða. Þar að auki
eru rúmlega 200 íbúðir í byggingu á
Akranesi nú þegar og 130 íbúðir til
viðbótar bætast við þegar byggingar-
réttur á fjórum lóðum á Dalbrautar-
reit verður boðinn út í næsta mán-
uði. Skessuhorn ræddi við Sigurð Pál
Harðarson, sviðsstjóra skipulags- og
umhverfissviðs Akraneskaupstaðar,
um lóðaframboð og uppbyggingu í
bæjarfélaginu.
„Við höfum alltaf unnið að skipu-
lagi óháð öðrum þáttum og reynt að
hafa góða rýmd og fjölbreytni í úr-
vali á lóðum,“ segir Sigurður og bæt-
ir því við að ásókn í lóðir hafi farið
vaxandi undanfarin misseri. „Það sem
hefur verið að gerast hér á Akranesi
undanfarið er að fasteignaverð hefur
verið að hækka. Þá er fýsilegra fyrir
verktaka að byggja. Við finnum fyr-
ir ákveðnum ruðningsáhrifum frá
höfuðborgarsvæðinu,“ segir hann en
nefnir að enn fremur séu innviðir
þegar til staðar á Akranesi. „Hér eru
góðir skólar sem gott orð fer af og al-
mennt er gott fyrir barnafjölskyldur
að vera á Akranesi. Síðan er kannski
betra eins og staðan er í dag að keyra
á milli Akraness og Reykjavíkur til
og frá vinnu en milli Reykjavíkur og
Selfoss til dæmis. Það er engin heiði
hér á milli og fólk verður síður veð-
urteppt. Þá er gjaldtaka væntanlega
að hætta í Hvalfjarðargöngum og þá
er sá sálfræðilegi þröskuldur úr sög-
unni. Ég tel því að Akranes standi vel
að vígi sem vænlegur búsetukostur,“
segir Sigurður.
Fer að vanta par-
og raðhúsalóðir
Undanfarið segir hann helstu við-
fangsefni á skipulags- og umhverfis-
sviði hafa verið skipulagning íbúða-
hverfa. Fyrst nefnir hann endur-
skipulagningu lóða í Skógarhverfi 1
og 2, bæði fjölbýli og par- og rað-
húsalóðir. „Það eru þær lóðir sem við
vorum að auglýsa um daginn. Þegar
skipulagið var endurskoðað mynd-
uðust bæði nýjar lóðir og breytingar
urðu á par- og raðhúsalóðum. Áður
var gert ráð fyrir mörgum par- og
raðhúsum á tveimur hæðum en við
settum þau í eina hæð,“ segir Sig-
urður Páll. „Af þeim átta par- og rað-
húsalóðum sem auglýst voru til út-
hlutunar um daginn var sótt um sex
lóðir. Þær sem standa eftir eru ein-
mitt tveggja hæða raðhúsin,“ bætir
hann við. „Það er ljóst eftir þessa síð-
ustu auglýsingu að það fer að vanta
par- og raðhúsalóðir. Við þurfum að
huga að framhaldinu í Skógarhverfi
2 hvað það varðar,“ segir hann.
Þá segir Sigurður að sú breyting
hafi jafnframt orðið á Skógahverfi 1
að fjölbýlishús hafi verið skipulögð
við Asparskóga beggja vegna göt-
unnar. „Áður hafði verið gert ráð
fyrir þeim öðrum megin og á þrem-
ur hæðum. Við lækkuðum húsin nið-
ur í tvær hæðir en höldum bygginga-
magninu með því að hafa byggðina
beggja vegna götunnar,“ segir hann.
Byggingarréttur
boðinn út í mars
Sigurður upplýsir að í marsmánuði
verði boðinn út byggingarréttur á
hluta af Dalbrautarreit, samtals um
130 íbúðir af þeim 220 sem gert er
ráð fyrir á reitnum. „Um er að ræða
fjórar fjölbýlishúsalóðir, það er að
segja Dalbraut 4 og 6 annars vegar
og Þjóðbraut 3 og 5 hins vegar. Þar
er einnig gert ráð fyrir aðstöðu fyrir
félagsstarf aldraðra,“ segir Sigurður
Páll. „Síðan erum við búin að vera
í skipulagsvinnu á Sementsreitn-
um. Henni er lokið og þar er gert
ráð fyrir um 350 íbúðum, eins og
svæðið er hugsað í dag. Ég geri ráð
fyrir því að byrjað verði að úthluta
lóðum við Suðurgötu. Síðan verð-
ur hugað að því hvernig framhald-
ið verður,“ segir hann. „Sá munur
er hins vegar á þessum tveimur reit-
um að Dalbraut er klár til uppbygg-
ingar. Þar þarf ekki að fara í neina
gatnagerð en hins vegar er töluverð
vinna framundan við að gera lóð-
ir Sementsreitsins byggingarhæfar.
Hreinlega gæti verið að við bjóðum
út ákveðin svæði til uppbygging-
ar í heild sinni, en við gætum líka
farið aðra leið. Þessi mál erum við
að ræða í rólegheitunum um þessar
mundir,“ segir Sigurður Páll.
Niðurrif á áætlun
Sem kunnugt er stendur niður-
rif á byggingum og búnaði Sem-
entsverksmiðjunnar sálugu yfir um
þessar mundir. Því er lóðaúthlutun
á svæðinu ekkert alveg að bresta á.
„Niðurrifið gengur ágætlega, verk-
ið er á áætlun og vonandi geng-
ur það bara áfram samkvæmt áætl-
un,“ segir Sigurður Páll. „Niður-
rifið verður klárað með þeim und-
antekningum að mannvirkin sem
Sementsverksmiðjan er með til árs-
ins 2028 verða auðvitað ekki snert.
Annað verður að mestu leyti farið
næsta haust, fyrir utan strompinn,“
segir hann og brosir. „Það á eftir að
taka ákvörðun um hvað verður um
hann. En staðan er einfaldlega sú
að ef menn ætla að rífa hann á ann-
að borð þá er rétt að gera það núna.
Það þarf bara að komast að niður-
stöðu um hvað menn vilja gera,“
segir hann.
Fólksfjölgun gerist
í bylgjum
Flestar íbúðir sem byggðar hafa
verið undanfarin misseri hafa selst
fljótlega eftir að þær eru sett-
ar á sölu. Þær íbúðir sem nú eru
í byggingu á Akranesi, sótt var
um í Skógarhverfi á dögunum
og verða auglýstar á Dalbrautar-
reit í næsta mánuði, eru um 550
talsins. Það gæti þýtt fólksfjölgun
upp á 1300 til 1500 manns í bæj-
arfélaginu þegar flutt hefur verið
inn í þær allar. Akurnesingar yrðu
því fleiri en 8.500 talsins. Sigurður
vill hins vegar fara varlega í að spá
um fólksfjölgun. „Það er oft þann-
ig að fólksfjölgun gerist í bylgjum.
Það er mikil eftirspurn eftir hús-
næði, mikið byggt á tímabili en
síðan getur allt verið stopp í tölu-
verðan tíma þar á eftir. Sjaldan er
uppbyggingin jöfn og stígandi,
allavega á þeim stöðum sem ég hef
verið,“ segir Sigurður. Hann bæt-
ir því að þó töluvert sé í byggingu
af íbúðarhúsnæði á Akranesi um
þessar mundir og meira í pípunum
sé ekki þar með sagt að flutt verði
inn í allar íbúðir um leið. „Við
eigum auðvitað eftir að sjá hvern-
ig gengur að koma út lóðunum á
bæði Dalbrautarreit og Sements-
reit. Þó nægt framboð sé af lóð-
um, sem betur fer, þá er ekki þar
með sagt að þær byggist allar.“
Fimleikahús
boðið út í mars
En það er fleira í undirbúningi hjá
skipulagsyfirvöldum á Akranesi.
Sigurður Páll upplýsir að nú sé ver-
ið að undirbúa útboð í byggingu
fimleikahúss við Vesturgötu. „Í
mars munum við bjóða út byggingu
fimleikahúss. Það er ein stærsta
framkvæmd ársins, en húsið verður
um 1600 fermetrar að stærð,“ segir
hann. „Þá er skipulagsvinna í gangi
vegna fyrirhugaðrar uppbygg-
ingar á íþróttasvæðinu við Jaðar-
sbakka. Þar er, eins og áður hef-
ur komið fram, gert ráð fyrir bún-
ingsherbergjum og geymslum fyr-
ir útiíþróttasvæði, nýju íþróttahúsi
og innisundlaug þar sem núverandi
íþróttasalur er staðsettur. Þetta er
allt saman í vinnslu og stefnan er
að byrja hönnunarvinnu á næsta
ári,“ segir Sigurður Páll.
„Að lokum má geta þess að út-
boð vegna gatnagerðar er á döf-
inni. Í því felst að setja nýtt hring-
torg á gatnamót Esjubrautar og
Kalmansbrautar. Samhliða því er
áætlað að yfirleggja Esjubraut-
ina frá hringtorginu að Þjóðbraut
og laga gatnamót Esjubrautar og
Smiðjuvalla. Sú lagfæring hefur
ekki verið útfærð enn,“ segir hann.
„Það er ýmislegt í pípunum og að
mörgu að huga,“ segir Sigurður
Páll Harðarson að endingu.
kgk
Margar íbúðir í byggingu á Akranesi og frekari uppbygging framundan
„Tel að Akranes standi vel að vígi sem vænlegur búsetukostur“
Sigurður Páll Harðarson.
Ljósm. úr safni.
Skógarhverfi á Akranesi. Alls bárust 44 umsóknir í sex par- og raðhúsalóðir og átta fjölbýlishúsalóðir þegar auglýst var eftir
umsóknum á dögunum.
Byggingarréttur á fjórum lóðum á Dalbrautarreit verður boðinn út í mars. Um er að ræða fjölbýlishúsalóðir við Dalbraut 4 og
6 annars vegar og Þjóðbraut 3 og 5 hins vegar. Teikning: Teiknistofa Gylfa Guðjónssonar.
Horft í átt að skorsteini Sementsverksmiðjunnar síðastliðið haust frá gatna-
mótum Suðurgötu og Mánabrautar. Næst í mynd er hluti þeirra lóða sem fyrst
verður úthlutað á Sementsreitnum, en það verður þó ekki alveg á næstunni.
Teikning af fyrirhuguðu 1600 fermetra fimleikahúsi við Vesturgötu á Akranesi.
Stefnt er að því að bjóða byggingu þess út í marsmánuði.