Skessuhorn - 21.11.2018, Blaðsíða 18

MIÐVIKUDAGUR 21. NÓVEMBER 201818
Síðastliðinn fimmtudag voru tíu ár
liðin frá því vefsíðan mömmur.is fór
fyrst í lofið en það er Skagakonan
Hjördís Dögg Grímarsdóttir sem
stendur bakvið síðuna. Á heimasíð-
unni má finna skemmtilegar skref
fyrir skref hugmyndir að því hvern-
ig hægt er að gera hinar ýmsu veit-
ingar fyrir ólík tilefni. Blaðamað-
ur Skessuhorns heimsótti Hjördísi
rétt fyrir helgi og fékk að heyra að-
eins frá því hvernig þessi tími hef-
ur verið. Hjördís var að undirbúa
skreytingu á brúðartertu þegar við
settumst niður í nýja eldhúsinu sem
hún lét fyrirtækið Parka útbúa sér-
staklega fyrir mömmur.is, sjálft
mömmueldhúsið.
Kökuævintýrið
„Það má segja að vísir af þessu
ævintýri hafi byrjað fyrir um 13
árum, þegar eldri sonur minn varð
árs gamall. Mig langaði að gera
eftirminnilega afmælisveislu með
Bangsímon þema en allar veiting-
arnar tengdust þemanu á einn eða
annan hátt. Á þessum tíma var ekki
algengt að sjá þematengdar veit-
ingar í afmælisveislum. Kökurnar
vöktu mikla lukku og hugsaði ég
með mér; því ekki að leyfa öðrum
að njóta og setti myndirnar inn á
sérstaka síðu á barnaland.is en þar
var fólk gjarnan með myndasíður
fyrir börnin sín. Ég útbjó sérstaka
kökusíðu en myndirnar vöktu strax
mikla lukku og áttaði ég mig þá á
því að þetta væri eitthvað sem ég
þyrfti að gera meira úr,“ útskýr-
ir Hjördís aðspurð um upphaf
mömmur.is.
Sykurmassakökurnar
slógu í gegn
Hjördís hélt áfram með köku-
skreytingarnar, fór að æfa sig að
búa til sykurmassa og skreyta með
honum en það var mikil bylting. „Á
þessum tíma var ekki svo algengt
að fólk væri að nota sykurmassa og
það var varla hægt að fá svoleiðis
nema í bakaríum. Hvað þá köku-
skreytingaráhöldin og annað sem
til þarf. Það má segja að þarna hafi
sykurmassakökurnar slegið í gegn,
litríkar og áferðin svo falleg. Þarna
kviknaði þessi hugmynd að gera
meira úr þessu og opna heimasíðu.
Nafnið Mömmur.is varð fyrir val-
inu enda við allar mömmur sem
stofnuðum síðuna. Ég, Tinna syst-
ir mín og Petrún móðir okkar,“ út-
skýrir Hjördís. Heimasíðan átti að
vera vettvangur fyrir fólk til að fá
hugmyndir að veitingum fyrir hin
ýmsu tilefni og geta gert kökuna
sjálft með því að fylgja leiðbeining-
unum. „Ég fékk Tinnu Ósk systur
mína til að hanna heimasíðuna, en
hún er grafískur miðlari. Heima-
síðan sló strax í gegn en segja má
að útfærsla efnisins á henni hafi
ekki verið ósvipað því sem sést nú á
Snapchat og Instagram,“ segir Hjör-
dís og hlær.
Um tíma flutti Hjördís inn köku
skreytingarvörur og seldi í vefversl-
un mömmur.is. Lítið var um vörur
tengdar kökuskreytingum og var
hugsunin að geta útvegað þannig
vörur til þeirra sem þyrftu. „Það er
greinilegt að kökuskreytingaráhug-
inn jókst með tilkomu mömmur.is
og fór eftirspurnin eftir vörum sem
þessum að aukast til muna. Þegar
verslanir fóru að bjóða upp á aukið
úrval á þessu sviði ákvað ég að hætta
með verslunina og einbeita mér
meira að hugmyndavinnunni,“ segir
Hjördís.
Andlit Betty Crocker
á Íslandi
Skömmu eftir að síðan mömmur.is
var opnuð var gerð síða á Facebo-
ok fyrir heimasíðuna. Vinsældirnar
jukust fljótt en fáar kökusíður voru
starfræktar á þessum tíma. Fylgj-
endatölur fóru fljótt upp í 20 þúsund
en það var mjög mikið á þeim tíma
og er enn í dag. Vinsældirnar köll-
uðu á fleiri tækifæri og segir Hjör-
dís það hafa verið merkileg stund
þegar Sigrún Ósk Kristjánsdótt-
ir sjónvarpskona og Sindri Sindra-
son kíktu í heimsókn til að fræðast
meira um heimasíðuna en þá höfðu
sykurmassakökurnar vakið forvitni
þeirra. Innlitið birtist í þættinum Ís-
landi í dag en eftir sýningu þáttarins
varð áhorfsmet á heimsíðu mömm-
ur.is en heimsóknafjöldinn varð það
mikill að síðan þoldi ekki álagið og
hrundi. „Þetta hefur oft á tíðum ver-
ið ævintýri líkast og tækifærin komið
til mín. Má þar nefna þáttagerð með
Siggu Lund en við gerðum nokkra
kökuþætti saman. Í framhaldinu
kom tilboð um að leika í sjónvarps-
auglýsingum fyrir vörumerkið Betty
Crocker á Íslandi. Frábær reynsla
og virkilega skemmtilegt verkefni
að taka þátt í. Það var stór stund
þegar auglýsingarnar birtust í sjón-
varpinu,“ segir Hjördís en síðan þá
hefur hún verið andlit Betty Croc-
ker á Íslandi. Í dag vinnur Hjör-
dís að ýmsum verkefnum tengdum
heimasíðunni. Er m.a. áhrifavaldur
hjá Ghostlamp, útbýr bökunartengt
efni fyrir auglýsingar og er matar-
bloggari fyrir Gott í matinn og Ger-
um það gott á Facebook.
Elskar kennarastarfið
Hjördís starfar sem grunnskóla-
kennari þar sem hún kennir 9. bekk
á unglingastiginu í Grundaskóla á
Akranesi. Aðspurð segist hún elska
kennarastarfið og finnst fátt meira
gefandi en að fræða og vera í kring-
um unglingana. „Það er margt sem
er hægt að læra af þessum flottu
krökkum okkar.“ Hennar aðalstarf
er því kennslan en baksturinn er
áhugamálið. „Það að vera menntað-
ur kennari hefur hjálpað mér mikið
þegar kemur að því að koma frá mér
hugmyndum á mömmur.is. Það er
ekki sjálfgefið að geta t.d. komið vel
fyrir sig orði á prenti og fyrir fram-
an myndavélar,“ segir hún og bros-
ir. Kennaramenntunin hefur einn-
ig komið sér vel við skipulagningu
námskeiða en Hjördís hefur haldið
fjölda námskeiða ásamt móður sinni
Petrúnu.
Ef þú átt þér draum
láttu hann rætast
„Þessi tíu ár hafa liðið ótrúlega hratt
og margt verið gert og sýnir í raun
hversu mikilvægt það er að eiga sér
áhugamál og fylgja því eftir sem þig
dreymir um. Þetta byrjaði jú, allt sem
lítil hugmynd og með mikilli vinnu
varð draumurinn að veruleika. Ég
er samt hvergi hætt því hugmynd-
irnar eru óþrjótandi,“ segir Hjör-
dís og bætir því við að hún trúi því
að allir geti látið drauma sína ræt-
ast ef þeir eru tilbúnir að leggja á sig
þá vinnu sem þarf. „Þetta á við allt
sem við gerum í lífinu, hvort sem
það er að fá draumastarfið, eignast
draumahúsið eða hvað það er. Fæst-
ir fá það bara upp í hendurnar án
þess að hafa nokkuð fyrir því. Ég
trúi því að þetta snúist allt um rétta
forgangsröðun og vinnu og það fer
bara eftir því hversu sterk löngunin
er hvort draumurinn rætist,“ seg-
ir hún að endingu. Einnig má bæta
við að hægt er að finna mömmur.
is á Instagram, SnapChat og Face-
book. arg
Draumur sem varð að veruleika
Hjördís Grímarsdóttir stendur á bakvið heimasíðuna mömmur.is.