Sveitarstjórnarmál - jún. 2019, Blaðsíða 28
28
SVEITARSTJÓRNARMÁL
Húnaþing vestra er víðfeðmt
landbúnaðarhérað miðja vegu á milli
Reykjavíkur og Akureyrar. Íbúar eru
1.200 talsins og býr um helmingur þeirra
í dreifbýli. „Almennt séð er sveitarfélagið
vaxandi samfélag með ógrynni tækifæra.
Búsetuskilyrði eru í fremstu röð og
sóknarfærin felast ekki hvað síst í því að
viðhalda þeirri góðu stöðu.“
Ferðaþjónusta á einnig stóran
sess í atvinnulífinu, með bæði
beinum og óbeinum hætti. Afkoma
atvinnugreinarinnar byggir þó líkt
og landbúnaður á náttúrunni og eru
náttúruperlur fjölmargar á svæðinu, þar
á meðal vinsælir selaskoðunarstaðir.
Selasetur Íslands er því vel í sveit sett
á Hvammstanga. „Þar er rekin miðstöð
rannsókna á selum á landinu í samvinnu
við Hafrannsóknarstofnun,“ segir Guðný
og bætir við að einn mikilvægasti þáttur
rannsóknanna sé vöktun á ástandi
selastofna við Ísland. „Á meðal þess
sem er undir smásjánni er fæðuval sela
og ferðamennska ásamt öðrum áhrifum
manna á stofninn. Þá hefur Selasetrið
umsjón með upplýsingamiðstöð
Húnaþings vestra, þannig að starfið
sem þar er unnið er bæði mikið og
metnaðarfullt.“
Hún þvertekur jafnframt fyrir að
innansveitarkróníkur standi mönnum
og málefnum með einhverju móti fyrir
þrifum, eins og stundum er haldið
fram um sveitarfélög ekki hvað síst
úti á landsbyggðinni. „Það er ekki
rígur innan sveitarfélagsins, það eru
ekki margir undir 50 ára sem þekkja
mörk þeirra átta sveitarfélaga sem
Húnaþing vestra samanstendur af.
Hins vegar er heilbrigður rígur við
nágrannasveitarfélögin í austri, þó þannig
að um leið er mikil og góð samvinna og
sameiginlegir hagsmunir eru um flest
málefni.“
Hitaveitan sjöfölduð að lengd
„Þetta hefur í raun flest verið skemmtilegt.
Ég er í það minnsta lítið fyrir að
dvelja við það sem miður fer,“ svarar
Guðný aðspurð um hæðir og lægðir í
sveitarstjórastarfinu. „Auðvitað koma upp
erfið mál, en þau vilja gleymast þegar
lokaniðurstaðan er góð,“ segir hún og
kinkar glaðlega kolli. „Samstarfið við
sveitarstjórn hefur verið mjög farsælt frá
upphafi, starfsmenn sveitarfélagsins eru
öflugir og íbúar einstaklega velviljaðir
þeim miklu breytingum sem gerðar hafa
verið.“
Sú framkvæmd sem ber einna hæst er
uppbygging á hitaveitu sveitarfélagsins
sem lengdist úr 20 km í 140 km
og lagning ljósleiðara. Verkefnið
reyndist mun flóknara en ætlað var
í fyrstu. „Á sama tíma skiptum við út
hitaveitumælum, fórum að innheimta eftir
orkuígildum í stað rúmmetra og hættum
að áætla notkun. Þar sem alfarið er mælt
eftir notkun, eru engar áætlanir lengur
gerðar eða uppgjörsreikningar, heldur
eru reikningar hærri þegar kalt er í veðri
og lægri þegar veður er gott og notkun
minni.“
Guðný segir að starfið hafi ekki síður
verið lærdómsríkt. „Ég er endalaust að
læra og öll samskipti gefa manni reynslu,
kannski helst það hve miklu er hægt
að koma í verk með góðri samvinnu
stjórnenda og starfsmanna.”
Þá segist hún hiklaust geta mælt með
flutningi ríkisstofnana út á land. „Það
var mikil lyftistöng á sínum tíma að
fá öfluga opinbera stofnun eins og
Fæðingarorlofssjóð til Hvammstanga
og sýnir hvað slíkt fyrirkomulag getur
heppnast vel. Sjóðurinn er vel rekinn,
veitir góða þjónustu og starfsmannavelta
er í lágmarki. Gissur Pétursson,
fyrrverandi forstjóri Vinnumálastofnunar,
hefur látið hafa eftir sér að þetta sé
best heppnaði flutningur á ríkisstofnun
á landsbyggðina og því get ég vel
trúað. Auk þess er öll almenn þjónusta
til staðar hér; öflugur grunn-, leik- og
tónlistarskóli, öflug verslun, veitingastaðir,
kaffihús, heilsugæsla, hjúkrunarheimili,
bókhaldsstofa, verkfræðistofa,
jarðvinnuverktakar og iðnaðarmenn,
bílaverkstæði, prentsmiðja, saumastofa,
sláturhús, bókaútgáfa og frábært
tjaldsvæði, svo eitthvað sé nefnt.“
Stöðnun í samgöngumálum
Guðný hefur mikla trú á framtíð
Húnaþings vestra, aðallega fyrir þau
fjölmörgu tækifæri sem hún sér til
frekari vaxtar og þróunar. Það á reyndar
ekki aðeins við um sjálft sveitarfélagið
heldur um landshlutann allan. „Framtíð
Norðurlands vestra er góð og sóknarfæri
Unnið við lengingu hitaveitu og lagningu ljósleiðara. Hitaveitan var lengd um 120 km. (Ljósm.
Húnaþing vestra).
Selasetur Íslands er vel í sveit sett á
Hvammstanga. (Ljósm.: Húnaþing vestra).