Hugur og hönd - 2020, Blaðsíða 5

HUGUR OG HÖND 2020  5
Það hafa verið framsæknir einstaklingar sem gáfu
ársritinu Hugur og hönd nafn á sínum tíma því
klassískara heiti er vart hægt að hugsa sér. Nýlega
varð sá merki áfangi að ritið var gert aðgengilegt á
vefsíðunni Tímarit.is. Blaðsíðurnar eru myndaðar og
birtar á stafrænu formi svo þeir sem hafa snjallsíma
eða spjaldtölvu innan seilingar geta notið þess
fróðleiks sem þar er að finna. Ritið kom fyrst út árið
1966 og hefur komið út óslitið síðan (fyrir utan árið
1998). Allir árgangar eru aðgengilegir á vefnum að
undanskildum þremur nýjustu árgöngunum því
þriggja ára birtingartöf er á vefnum. Þrátt fyrir
þessa framþróun er rétt að undirstrika að Hugur og
hönd verður eftir sem áður gefið út prentað enda
jafnast ekkert á við að handfjatla fallegt tímarit.
Nú í haust kemur út saga Heimilisiðnaðarfélagsins
sem rituð er af Áslaugu Sverrisdóttur sagnfræðingi
og gefin er út af Sögufélaginu. Sagan hefur hlotið
heitið Handa á milli – Heimilisiðnaðarfélag
Íslands í hundrað ár. Áslaug hefur unnið að
skrifunum, með hléum, frá því að félagið varð
hundrað ára árið 2013 og því ánægjulegt að komið sé
að útgáfu. Samstarfið við Sögufélagið hefur verið
einstaklega gott og er það mikið lán að sagan skuli
koma út í þeirra ritstjórn og umsjón. Það verður
spennandi að fá bókina í hendur og víst er að margir
félagsmenn munu njóta lesturs hennar. Bókin hlýtur
að verða jólabókin í ár!
Í ágúst bættist við starfsmaður í hálft starf á
skrifstofu félagsins til að sinna námskeiðahaldi og
öðrum tilfallandi verkefnum. Aðrir starfsmenn HFÍ
eru formaður/framkvæmdastjóri í fullu starfi og
starfsmaður í verslun í hálfu starfi. Nú eru því tvö
stöðugildi í stað eins og hálfs áður. Þessi viðbót er
kærkomin enda eru verkefnin fjölmörg og
möguleikar fyrir vexti starfseminnar óþrjótandi.
Nú er lokið gerð nýrrar heimasíðu sem aðlöguð er
snjallsímum og spjaldtölvum. Á síðunni er hægt að
skrá sig og greiða fyrir námskeið sem er mikil
framþróun frá því sem áður var. HFÍ tók að sér að
miðla til framtíðar því efni um þjóðbúninga sem
fram til þessa hefur verið birt á heimasíðunni www.
buningurinn.is og er það birt á nýju síðunni. Með
nýrri heimasíðu er félagið sannarlega komið inn í 21.
öldina.
Í vetur var ráðist í það verkefni að endurnýja
raflagnir og lýsingu í húsnæðinu í Nethyl. Að auki
voru smíðaðir veggir á milli búðarinnar og kennslu-
og bókasafnsrýmis. Að auki hefur þjónustudeildin
(verslunin) verið endurskipulögð og húsgögn þar
endurnýjuð. Velheppnuðum endurbótum á
húsnæðinu, sem hófust fyrir rúmum þremur árum,
er því lokið. Félagið er einstaklega lánsamt að starfa
í eigin húsnæði sem er vel staðsett og hentar
starfseminni vel.
Árið 2020 mun sennilega lengi verða í minnum
haft. Ekki einungis hefur veturinn verið einstaklega
harður og erfiður heldur hefur COVID-19 farsóttin
sett allt á annan endann hér á landi sem annars
staðar í heiminum. HFÍ þurfti eins og aðrir að
bregðast við þessum aðstæðum. Öllum námskeiðum
var aflýst og þau endurgreidd þegar samkomubann
brast á. Auk þess hefur þurft að aflýsa prjónakaffinu
sem haldið er mánaðarlega í húsnæði HFÍ, ekki
verður af ferð ungmenna í handverksbúðir til
Danmerkur þetta árið og erlendir kennarar sem áttu
að koma til Íslands í sumar sitja heima. Nú á vordögum
þegar þessar línur eru skrifaðar er ómögulegt að
segja til um hvernig mál munu þróast en vonir standa
þó til og líkur eru á að starfsemin verði með eðlilegu
sniði frá hausti.
Í þeirri kreppu sem skollin er á í kjölfar faraldurs-
ins, þar sem atvinnuleysi eykst, efnahagslegar
þrengingar eru fyrirsjáanlegar, ferðlög til fjarlægra
landa eru tímabundið útilokuð og fjöldasamkomur
eru ekki leyfilegar er óhjákvæmilegt að fólk
endurmeti hvaða gildi eru mikilvæg. Við þessar
aðstæður hægist á öllu, fólk lítur inn á við og horfir
sér nær. Í slíku ástandi sýnir reynslan okkur að
áhugi á handverki eflist.
Ljóst er að í þeim aðstæðum sem nú ríkja á
Heimilisiðnaðarfélag Íslands hér eftir sem hingað til
brýnt erindi. Því horfum við bjartsýn fram á veginn!
Margrét Valdimarsdóttir,
formaður Heimilisiðnaðarfélags Íslands
Formannspistill