Hinsegin dagar í Reykjavík - 01.08.2021, Side 33

K Í DRAGI
ONUR
Dragsenan hér á landi hefur vaxið
hratt síðustu ár en rætur hennar má
rekja til tíunda áratugarins. Undir
lok síðustu aldar (samt bara fyrir rétt
rúmlega tuttugu árum) var Dragkeppni
Íslands haldin í fyrsta sinn og hefur
dragmenning á Íslandi þroskast hratt
síðan. Einn stærsti vaxtarkippurinn var
sjálfsagt árið 2015 þegar Drag-Súgur
hóf sínar mánaðarlegu dragsýningar
þar sem öllum áhugasömum var gefinn
möguleiki á að koma fram og sýna
listir sínar. Dragsenan einkennist nú
af mikilli fjölbreytni þar sem öll flóran
af draglistafólki kemur saman til að
skemmta sér og öðrum.

Þegar almenningur hugsar um drag er
trúlegt að hann sjái fyrir sér karlmann
í drottningargervi, en skiptir kyn máli í
dragi? Eru til dæmis margar konur í dragi
á Íslandi? Við hittum Oddnýju Svövu
Steinarsdóttur, dragdrottningu, til þess
að heyra hennar upplifun.

„Ég hef oft þurft að heyra að ég sé ekki
alvöru dragdrottning einfaldlega vegna
þess að ég fæddist með píku,“ segir
Oddný, sem einnig er þekkt sem Lola Von
Heart í dragi.

Konan á bak við gervið
Oddný er 24 ára draglistamaður og
grafískur hönnuður. Hún ólst upp á
Ólafsfirði en flutti þaðan sem unglingur.
Þegar Oddný hóf framhaldsskólagöngu
sína flutti hún til Reykjavíkur þar sem
hugmyndaheimur hennar víkkaði og hún
eignaðist nýja vini. Oddný áttaði sig líka á
eigin hinseginleika og 18 ára kom hún út
úr skápnum.

„Ég vissi alveg að ég væri „öðruvísi“ sem
krakki þar sem ég sótti frekar í stelpur,
en ég reyndi að loka á þær hvatir. Ég veit
ekki hvort ég hafi verið að afneita sjálfri
mér, eða hvað það var. En ég kom ekki
út úr skápnum fyrr en ég var 18 ára og
það var af því ég átti kærustu. Í dag finnst
mér erfitt að skilgreina kynhneigð mína
en ég hef verið að hugsa mikið um það
síðastliðið ár og finnst pankynhneigð eiga
vel við mig. En þar á eftir kemur spurning
um kyngervi og kynvitund; hver er ég án
væntinga samfélagsins? Stór spurning
sem ég á enn eftir ósvarað.“

Eftir að framhaldsskólanum lauk fór
Oddný í BA-nám við Listaháskóla Íslands.
Lokaverkefni hennar vakti talsverða
athygli en Oddný skrifaði og hannaði bók
um dragsenuna á Íslandi. Í bókinni beinir
hún sjónum sínum að konum í dragi
og fjallar þar sérstaklega um sjö konur
sem hafa haft áhrif á dragmenningu
samtímans hér á landi. Sumar eru
drottningar en aðrar kóngar en allar eiga
þær sínar sérstöku sögur sem lesandinn
fær að skyggnast inn í.

Fyrstu skref drottningarinnar
Áhugi Oddnýjar á dragmenningu Íslands
var ekki sprottinn úr neinu tómarúmi.
Fyrsta dragsýningin sem hún sá var
sýning á vegum Drag-Súgs árið 2017. „Ég
man eftir að fara í fyrsta skipti á Drag-
Súg og sjá Jenny Purr uppi á sviði. Á því
augnabliki kviknaði á einhverju hjá mér
og ég bara þurfti að prófa þetta.“

Oddný steig strax skref í átt að
draumnum. Hún hafði heyrt að
áheyrnarprufur fyrir Drag-Súg væru
virkilega erfiðar, enda var dragsenan
í miklum blóma á þessum tíma.
Hugmyndir hennar um háskalega senu
reyndust sem betur fer ekki réttar og hún
fann strax að hún var umkringd fólki sem
var eins og hún, og hlýjan og samstaðan
í samfélaginu var mikil.

„Þegar svona mikið af einstöku fólki með
einstaka orku kemur saman, þá myndast
töfrandi andrúmsloft og maður upplifir
sig sem part af fjölskyldu. Tengingin er
engu lík í þessum hóp af því við erum
öll einhvern veginn hinsegin, og ef
ekki hinsegin þá opin fyrir því og mikill
stuðningsaðili.“

Lola verður til - hver er Lola?
Það var svo á Hinsegin dögum 2017
sem að Oddný steig inn í dragsenuna,
fyrst sem aðstoðarmanneskja á
sýningu. Þar kynntist hún fljótlega
dragdrottningunum og kóngunum
og var í kjölfar þess skráð í Drag-Lab,
eins konar dóttur-vettvang Drag-Súgs.
Oddný var talsvert stressuð, svona eins
og gengur, fyrir sinni fyrstu sýningu sem
dragdrottning en eftirvæntingin var þó
stressinu yfirsterkari. Það var fullt út að
dyrum og stuðningur áhorfenda nær
áþreifanlegur og varð þetta, eins og
Oddný orðar það: „besta upplifun EVER!“
Þetta var í fyrsta sinn sem Lola Von Heart
birtist heiminum.

33