Bændablaðið - 26.08.2021, Blaðsíða 7

Bændablaðið | Fimmtudagur 15. apríl 2021
7Bændablaðið | Fimmtudagur 26. ágúst 2021 Bændablaðið | Fimmtudagur 26. ágúst 2021
LÍF&STARF
Húnvetningurinn Sigrún Haralds­
dóttir átti sviðið í síðustu þáttum.
Nú er komið að Skagfirðingnum
Þorbergi Þorsteinssyni, fæddum á Ísafirði
á árinu 1908, „en Skagfirðingur skýr og
hreinn“, sonur Þorsteins Magnússonar frá
Gilhaga og Sigríðar Benediktsdóttur frá
Syðra-Skörðugili. Undir önnum háarsláttar
er viðeigandi að rita hér tvær stökur
Þorbergs sem hann nefnir „heystörfin“:
Herrans er uppi öldin,
þó öll hafi frúin völdin,
þau talast við bak við tjöldin,
og taka saman á kvöldin.
Loftin brumast og blána,
blærinn strýkur um hána,
þá leggur hann út á lág’na
og lánar henni Grána…
Ungur að árum orti Þorbergur:
Heitan morgun kalda kinn
kyssti veðurblíðan,
ég er alltaf ástfanginn
alla daga síðan.
Fjórar samstæðar stökur nefnir Þorbergur
Estoríur:
Gesta er leið um gluggann minn,
gerður er veislustaður,
hugar að draugum húsbóndinn
og hundurinn geðbilaður.
Löggunni vildi hún brugga blandið
og bjóða til veislu sæt og hlý,
en slík var ástin á eigin hlandi
að hún ætlaði varla að tíma því.
Með söknuði kvöddu þau sælureit
með sængina og tekjur nógar,
en erfið mun næsta eftirleit
því Adam er horfinn til skógar.
Ennþá gróa grösin vís
þó gusti og snjói í fjöllin.
Upp úr skógar rökkri rís
rummungsþjófahöllin.
Næst er haldið í Þingeyjarsýslu. Þaðan
er runnin þessi vísa Hólmfríðar
Indriðadóttur á Hafralæk:
Baugalundur bauð mér koss,
blíðan eftir vonum.
Það var holdi þungur kross
að þurfa að neita honum.
Eftir Friðjón Ólafsson er þessi lipra vísa:
Reyndu að skoða í réttu ljósi
Rögnvald, okkar blaðamann,
þó að strákar, Stjáni og Rósi
stundum yrki gegnum hann.
Næst yrkir Gísli Árnason til Jóns
Björnssonar loftskeytamanns:
Þegar hríð á húsum bylur
hentar best, það er mér ljóst,
að leiki við þig læraylur,
ljúfar varir, fögur brjóst.
Helgi Hjörvar orti við lestur ljóðabókar
Matthíasar Johannessen:
Illt er hlutverk örlaganna
að atómskáld með rímlaust fjas
og höfuðsmiður hortittanna
heita skuli Matthías.
Þessa frábæru vísu orti Árni Böðvarsson
á Akureyri á afmælisdegi sínum:
Þó eftirtekjan oft sé smá,
við örðugleika að stríða,
þá er einhver eftirsjá
í árunum sem líða.
Og næstu tvær vísur eru einnig Árna
Böðvars sonar. Ortar undir vísnaþætti í
útvarpinu:
Af því mikið yndi hef
ef ég fæ að heyra
lítið, fagurt stuðlastef
stikla mér við eyra.
Umsjón:
Árni Geirhjörtur Jónsson
kotabyggð1@gmail.com
280MÆLT AF
MUNNI FRAM
Í snoturri umgjörð norðan við kirkjuna hefur verið komið fyrir skiltum þar sem í máli og myndum er stiklað á sögu Valþjófsstaðar sem höfuðbóls
og kirkjustaðar frá öndverðu. Myndir / Ásdís Helga Bjarnadóttir
Sögusvið Valþjófsstaðar á Fljótsdal afhjúpað:
Stiklað á sögu höfuðbólsins og
kirkjustaðarins frá öndverðu
Sögusvið Valþjófsstaðar á Fljótsdal, sem
er rétt utan við kirkjuna, var afhjúpað í
liðinni viku. Í snoturri umgjörð norðan við
kirkjuna hefur verið komið fyrir skiltum
þar sem í máli og myndum er stiklað á
sögu Valþjófsstaðar sem höfuðbóls og
kirkjustaðar frá öndverðu.
Hjörleifur Guttormsson hafði frumkvæði
að þessu verkefni og tók saman sögulegan
fróðleik um staðinn. Hann fékk til liðs við sig
kirkjugarðaráð og Fljótsdalshrepp sem styrktu
verkefnið bæði með ráðgjöf og myndarlegu
fjárframlagi. Auk þess styrkti Brunabót
verkefnið. Guðmundur Rafn Sigurðsson,
framkvæmdastjóri hjá kirkjugarðaráði,
hannaði svæðið og fylgdi eftir framkvæmdum.
Birgir Axelsson hjá Brústeini hlóð upp sviðið.
Liður í undirbúningi verksins var könnun
með jarðsjá á útlínum hins forna kirkjugarðs.
Innan sviðsins hefur verið komið fyrir þremur
grafarmörkum frá 19. öld.
Valþjófsstaðarhurðin
Valþjófsstaður er fornt höfuðból og
kirkjustaður, þar hefur verið kirkja frá því á 13.
öld. Þaðan er hin þekkta Valþjófsstaðarhurð
sem varðveitt er á Þjóðminjasafni. Hún er
einnig frá 13. öld með miklum útskurði í
rómönskum stíl þar sem er að finna þekkt
miðaldaminni. Hurðin var á kirkjunni á
Valþjófsstað til ársins 1851. Núverandi kirkja
á Valþjófsstað er frá árinu 1966.
Veðrið skartaði sínu fegursta þegar sviðið
var formlega opnað. Flutt voru áhugaverð
erindi og ávörp við athöfnina og rómað ketil-
kaffi og kleinur í boði sóknarnefndar á eftir.
/MÞÞ
Gestir skoða eitt af skiltunum sem komið hefur verið fyrir á sögusviðinu.
Einstök veðurblíða lék við gesti við opnun
sögusviðs Valþjófsstaðar.
Hjörleifur Guttormsson tók saman sögulegan fróðleik um staðinn. Hér flytur hann ávarp við athöfnina.
Þessir komu við sögu við opnun
sögusviðs Valþjófsstaðarkirkju,
frá vinstri eru Birgir Axelsson
skrúðgarðyrkjumeistari,
Guðmundur Rafn Sigurðsson,
framkvæmdastjóri kirkjugarðaráðs
og Hjörleifur Guttormsson.