Morgunblaðið - 14.07.2022, Qupperneq 20

20 FRÉTTIR
Innlent
MORGUNBLAÐIÐ FIMMTUDAGUR 14. JÚLÍ 2022
Tónlist
fyrir sálina
Matur
fyrir líkamann
Aðalstræti 2 | s. 558 0000
Lifandi píanótónlist
öll kvöld
Opnunartími
Mán.–Fös. 11:30–14:30
Öll kvöld 17:00–23:00
Borðapantanir á matarkjallarinn.is
eða í síma 558 0000
FERÐALÖG
Ásgeir Ingvarsson
ai@mbl.is
Það hefur verið mjög ánægjulegt að
fylgjast með samfélagsmiðlum fyllast
jafnt og þétt af myndum af ferðalög-
um Íslendinga til Mexíkó. Liggur
straumurinn einkum til Yucatan-
skagans og þá aðallega til austur-
strandarinnar, Maya-rívíerunnar
eins og svæðið er kallað, þar sem
finna má vinsæla ferðamannabæi á
borð við Kankún, Playa del Carmen
og Túlum.
Skýrast auknar vinsældir Mexíkó
mögulega af því að í kórónuveiru-
faraldrinum þótti einfalt að ferðast til
landsins og gestir hvorki krafðir um
bólusetningu né mótefnamælingu við
komuna, en þess utan virðist Mexíkó
einfaldlega vera að sækja á enda
skemmtilegur, litríkur og hrífandi
áfangastaður sem þarf ekki að vera
svo dýrt að heimsækja.
Fyrir þá sem vilja sól og sand er
Kankún rétti staðurinn til að byrja og
er alþjóðaflugvöllur borgarinnar
mjög vel tengdur við borgir í Banda-
ríkjunum og Evrópu. Frá Kankún er
síðan auðvelt að halda ferðinni áfram
á landi, meðfram strandlengjunni til
suðurs eða til vesturs í átt að dul-
arfullum musterum djúpt inni í frum-
skóginum.
Er samt vissara að lesendur
fræðist um aðstæður áður en lagt er
af stað, því eins og oft vill verða með
vinsæla ferðamannastaði eru ýmsar
gildrur sem þarf að varast svo að
komast megi hjá bæði óþarfa leið-
indum og óþarfa útgjöldum.
Áfangastaður fyrir bæði
rólegheitafólk og djammara
Fyrst af öllu er mikilvægt að skilja
að Kankún ber það með sér að borgin
laðar til sín fjölda Bandaríkjamanna í
miklu partístuði. Þykir bandarískum
unglingum það mikilvæg manndóms-
vígsla að ferðast til Mexíkó þegar þau
hafa náð 18 ára aldri og komast í
fyrsta skipti í áfengi, enda er áfeng-
iskaupaaldurinn í Bandaríkjunum 21
ár.
Eru hótelin flest staðsett úti á
löngu rifi, steinsnar frá sjálfri Kank-
únborg, og ættu þeir sem vilja mikinn
galsa og háværa skemmtistaði að
halda sig við norðurhlutann á meðan
hinir sem vilja rólegri og afslappaðri
upplifun ættu að una sér betur sunn-
arlega á hótelsvæðinu.
Er í sjálfu sér ósköp fátt að sjá og
gera í Kankún-borg en inn á milli hót-
elanna má finna merkjavöruverslanir
og golfvelli. Þá er enginn hörgull á
ferðaþjónustufyrirtækjum sem bjóða
upp á styttri og lengri ferðir vilji fólk
t.d. skoða fornar Maya-rústir, halda í
köfunarleiðangur eða heimsækja
skemmtigarð.
Flestum ætti að þykja hæfilegt að
dvelja í tvær eða þrjár nætur á góðu
hóteli í Kankún og láta stjana við sig.
Er afskaplega gott að njóta strand-
lífsins í rólegheitum, ýmist áður en
haldið er af stað í lengri leiðangur um
Yukatan-svæðið, eða í lok ferð-
arinnar.
Best að leigja bíl
og forðast leigubílana
Er rétt að vara sérstaklega við við-
skiptaháttum leigubíla og rútu-
frumkvöðla á alþjóðaflugvellinum. Því
miður hafa leigubílstjórarnir í Kankn-
ún beitt miklum fantaskap til að ryðja
í burtu fyrirtækjum á borð við Uber
og er bæði leigubíllinn og flugrútan
mun dýrari í Kankún en í öðrum
borgum Mexíkó. Getur verið hag-
kvæmast og þægilegast að taka bíl á
leigu og bjóðast mjög hagstæð kjör
hjá bílaleigunum á flugvallarsvæðinu.
Þeir sem leigja bíl verða samt að
vara sig á að á mexíkóskum bens-
ínstöðvum sjá starfsmenn um að
dæla og hafa sumir þeirra komist upp
á lag með að plata erlenda ferða-
menn. Ef starfsmaðurinn segir t.d. að
kortavélin virki ekki er vissara að
halda bara áfram á næstu stöð, því
sennilega er maðkur í mysunni. Þeg-
ar bílnum er skilað, fyrir brottför,
ætti að forðast að nota bensínstöðv-
arnar næst flugvellinum því þar virð-
ast mestar líkur á að lenda í svika-
hröppum.
Ekki missa af Chichen Itza
Er kjörið að verja einum degi á
eyjunni Isla Mujeres. Tekur stutta
stund að sigla þangað frá Kankún og
er byggðin gönguvæn og notaleg.
Nóg er af prýðilegum veitingastöðum
sem stilla verðinu í hóf og einnig
fjöldi ferðamannabúða sem selja alls
konar glingur. Eyjan er mjó og löng
og hægt að leigja litla golfkerru til að
aka um svæðið, en kerrurnar eru dýr-
ar og ætti að nægja flestum að fara
fótgangandi um aðalbyggðarkjarn-
ann. Nyrst á eyjunni eru strand-
klúbbarnir og hægt að leigja þar sól-
bekk fyrir lítið, og svamla aðeins í
sjónum.
Af öðrum áfangastöðum í nágrenni
Kankún má nefna eyjuna Holbox en
til að komast þangað þarf að aka í tvo
tíma til bæjarins Chiquilá í norðvestri
og þaðan taka ferjuna. Holbox er
einkar notalegur bær, mikil ró yfir
samfélaginu, hótelin ekki dýr og veit-
ingastaðirnir sömuleiðis. Er gaman
að vaða sjóinn í átt að Punta Mos-
quito, og fylgjast með sólsetrinu frá
Punta Cocos.
Þá er vel þess virði að heimsækja
borgina Valladolid sem er sjarmer-
andi og gömul, en skammt þar frá er
að finna Oxmán-vatnspyttinn (sp.
cenote) og einstök upplifun að svamla
þar. Er um tveggja tíma akstur frá
Kankún til Valladolid og þaðan tekur
svo tæpa klukkustund í viðbót að aka
til rústa Maya-borgarinnar Chichén
Itzá þar sem Kukulcán-musterið
stendur.
Er frekar dýrt að borga sig inn á
Chichén Itzá og ágengir sölumenn
hafa fengið að leggja svæðið undir
sig, en það sakar ekki að staldra við í
eins og tvo tíma og sjá musterið með
eigin augum.
Eins má halda í suðurátt, s.s. til
strandbæjarins Playa del Carmen,
sem er ódýrari en Kankún en hefur
upp á margt að bjóða, eða alla leið til
Tulum sem er í miklu uppáhaldi hjá
sterkefnuðum áhrifavöldum.
Slakað á við ströndina í Kankún
- Margir Íslendingar hafa uppgötvað töfra Yucatan-skagans og er Kankún yfirleitt fyrsti viðkomu-
staðurinn - Þar er tekið vel á móti gestum en að mörgu þarf að gæta til að eiga ánægjulega ferð
Af mörgum góðum kostum í Kankún stendur Ritz-Carlton
hótelið upp úr. Hótelið er bæði öruggt og notalegt, og hafa
gestir aðgang að fyrirtaks strandlengju.
Er það peninganna virði að hreiðra um sig í skýli úti á
ströndinni, slaka á í hengirúmi, hlusta á öldurnar og panta
margarítur að hætti hússins.
Herbergin eru glæsileg og þægileg, starfsfólkið hugsar
einkar vel um gestina, súshí-barinn er fyrsta flokks og mjög
rómantískt að snæða kvöldverð í einu af strandskýlunum
við sólsetur.
Lúxuslíf í hengirúmi
HVAR Á AÐ GISTA?
Makindi Að dotta í hengirúmi í góða veðrinu er engu líkt.
Upplifun Herbergi á Ritz-Carlton. Góður staður til að byrja daginn.
Ljósmynd / Wikipedia - Kyle Simurod (CC)
Stutt stopp Chichén Itzá er eitt af undrum veraldar en hundsa þarf ágenga sölumenn.
Ljósmynd / Wikipedia - Thomassi Mickael (CC)
Hæfilegt Stutt er að sigla frá Kankún til Isla Mujeres og verðskuldar dagsferð.