Sjómannablaðið Víkingur - 01.03.2017, Page 40

40 – Sjómannablaðið Víkingur
S jómannablaðið Víkingur blæs enn á ný til ljósmynda-
keppni meðal sjómanna. Mjög góð þátttaka hefur verið
allt frá byrjun keppninnar sem sýnir þann mikla áhuga
sem sjómenn hafa á ljósmyndun.
Allir sjómenn geta tekið þátt í keppninni sem og þeir sjó-
menn sem komnir eru á eftirlaun. Við höfum ekki haft flóknar
reglur í keppninni en ekki má breyta myndum á þann hátt að
skeyta saman tveimur eða fleiri myndum. Litaleiðréttingar,
kroppun og réttingar eru leyfðar. En hver er eigandi myndar?
Það þarf ekki að vera sá sem er eigandi myndavélarinnar heldur
er það sá sem þrýsti niður afsmellaranum á myndavélinni þegar
myndin var fönguð.
Viðfangsefnið má vera hvað sem er og er ekki bundið við að
myndirnar hafi verið teknar úti á sjó. Þær þurfa ekki að hafa
verið teknar á síðasta ári heldur er hægt að fara í ljósmynda-
safnið sitt. Myndin má ekki áður hafa tekið þátt í þessari
keppni. Hver ljósmyndari má senda inn allt að 15 ljósmyndum.
Fjögurra manna dómnefnd mun velja þrjár vinningsmyndir
sem hljóta verðlaun blaðsins. Þá verða tólf aðrar myndir valdar
af dómnefndinni sem fara áfram með vinningsmyndunum í
Norðurlandakeppni sjómanna í ljósmyndun sem fram fer í
Noregi í byrjun næsta árs.
Skilafrestur á myndum í keppnina er 1. desember n.k. og
skulu þær sendar á netfangið iceship@heimsnet.is.
Undanfarin ár hafa einungis borist stafrænar ljósmyndir en
allar myndir eru gjaldgengar. Stafrænar myndir þarf að senda
inn í mestu upplausn sem möguleg er. Ef senda á inn myndir
á öðru formi skulu þær sendar til:
Farmanna- og fiskimannasamband Íslands
V/Sjómannablaðsins Víkings
Ljósmyndakeppni 2017
Grensásvegi 13
105 Reykjavík
LJÓSMYNDAKEPPNI
SJÓMANNA 2017
Mynd: Sigurjón Veigar Þórðarson