Fréttablaðið - 24.09.2022, Blaðsíða 24

Vildi ekki fara
í leðjuslaginn
Það þarf ekki að kynna
frægasta núlifandi Íslending­
inn fyrir lesendum. Björk
hefur í áratugi haft gríðarleg
áhrif á tónlistarheiminn með
framúrstefnulegri sköpun og
skipað sér fastan sess í popp­
kúltúr á heimsvísu, til bæði
austurs og vesturs.
Björk Guðmundsdóttir
mætir í viðtalið á efri hæð
í timburhúsi á Seltjarnar­
nesi. Hún er klædd stórri
hvítri úlpu með áberandi
augnskugga í jarðlitum. Það er svo­
lítið magnað að sitja á móti stjörnu
af þessari stærðargráðu. Tilefnið er
nýjasta platan, Fossora. Sjónræn
umgjörð í kynningarefni sækir í
sveppaheiminn og jörðina. Platan
er grípandi við fyrstu hlustun,
aðgengileg og ágeng.
„Ég er bara í kápunni, í útilegu­
stemningunni eftir gönguna,“
segir Björk. Hvaðan hún gekk fylgir
ekki sögunni, og það virkar hnýsið
að spyrja. Björk er friðuð stærð í
vesturhluta borgarinnar,
það er bannað
að skipta sér af.
Þetta vita allir.
Nína
Richter
ninarichter
@frettabladid.is

Ekki innan um áhrifavaldana
Björk segist fagna fjölbreytninni í
mannflórunni og breytingum sem
orðið hafa með stóraukinni ferða­
þjónustu. Aðspurð segist hún ekki
finna fyrir auknu áreiti. „Mér finnst
gaman að það séu túristar og líka
íslenskir áhrifavaldar,“ segir hún.
„En þetta er rosalega skýrt. Ég labba
ekki niður Laugaveginn klukkan
sex á föstudegi þegar það er rosa­
lega mikið af túristum.“
Veitingastaðirnir sem Björk og
vinir hennar sækja eru ekki staðir
sem ferðamenn eða áhrifavaldar
fara á. „Ég fer aldrei á opnanir,“
bætir hún við. „Í þeim hverfum sem
ég hangi í er enginn að taka mynd
af mér á símann. Mér finnst eins og
fólk viti þetta einhvern veginn. Ég
var mjög skýr með þetta frá upp­
hafi á Íslandi. Það er bara: Þegar
ég er heima vil ég fá frið og er mjög
þakklát,“ segir Björk.
Hún bætir við að ljósmyndarar
sem taki myndir á opnunum virði
óskir hennar einnig. „Ég sniglast
bakdyramegin og þeir blikka mig
bara og vita að ég vil vera í friði.“
Miskunnarlaus níundi áratugur
Björk segist koma út úr holunni
þegar hún gefur út plötu, en hún
vilji að sama skapi ekki vera mynd­
uð þegar hún er úti að labba. Þó
sé til þekkt fólk sem kjósi það og
hún dæmi það alls ekki. „Þetta líf
er fyrir suma en ekki fyrir mig. Ég
fagna því að fólk sé að fá að velja
þetta sjálft. Það var erfiðara þegar
það var í höndunum á fjölmiðlum
út af papar azzi. Það var miskunnar­
lausara,“ segir hún. „Eins og á 9. ára­
tugnum í London. Ég er ekki að
ýkja, það var móment þegar það
voru fjörutíu paparazzar í garð­
inum hjá mér á bak við runna með
langar linsur þegar ég fór að sofa.
Við Sindri fórum bara til Spánar,“
segir Björk og hlær.
Hvað samfélagsmiðla varðar
segir Björk frábært að rithöfundar
geti skrifað ljóð daglega á Twitter.
Sömuleiðis eigi hún vini sem vinna
mikið á myndmiðla og nota Insta­
gram. „Ég er sjálf meira á Facebook.
En þegar vinir mínir eru að gera ein­
hverja tónleika í Tókýó þá vakna ég
og horfi á þá yfir morgunkaffinu,
maður fær að fylgjast með,“ segir
hún.
Björk tekur þó fram að hún myndi
aldrei deila neinu persónulegu á
samfélagsmiðlum en ítrekar mikil­
vægi þess að fólk fái að velja sjálft
hverju það deilir, hvernig það deilir
því og að það virði að sama skapi
hvernig aðrir vilja gera það.
Vonbrigðin með Katrínu Jakobs
Í ágúst ræddi Björk við breska
blaðið The Guardian um vonbrigði
í tengslum við Katrínu Jakobsdóttur
forsætisráðherra. Aðspurð hvort
þær Katrín hafi rætt saman í kjöl­
far málsins, svarar Björk:
„Nei. Ég hefði getað sagt eitthvað
og þá hefði þetta orðið að einhverju
hitamáli hérna heima. Ég ákvað
að gera það ekki. Ég vildi ekki að
þetta lenti í einhverjum leðjuslag
á milli okkar, sem mér finnst þetta
oft breytast í. Af því að mér finnst
málið ekki vera: Björk á móti Katr­
ínu: Þær fara í bikiní út í leðjuna og
horfum á þær berjast,“ svarar hún.
„Það sem ég vildi frekar, og ég var
mjög ánægð með, var að vikuna á
eftir var á einhverri útvarpsstöð
verið að ræða skilgreininguna fyrir
almenning: Hvað þýðir það þegar
land fer í neyðarástand? Bara að
fræða okkur. Það var mikilvægara
og ég vissi líka að ég væri að fara að
gera viðtöl eftir tvær vikur og þá
gæti ég líka sagt minn punkt. Það
yrði svona mýkri lending frekar en
að fara að grilla Kötu,“ segir Björk.
Misskilningur í fjölmiðlum
Hún vill þó meina að misskilningur
hafi farið af stað í fjölmiðlum þegar
fjallað var um málið, sem hún
kveðst vilja leiðrétta. „Þegar ég var
í New York var ég búin að tala við
Gretu Thunberg, sem fór á bátnum
yfir Atlantshafið. Við ætluðum
saman að vera með blaðamanna­
fund og skora á forsætisráðherra
Norðurlanda að lýsa yfir neyðar­
ástandi,“ segir Björk.
„Ég sagði við Gretu: Það er mín
reynsla á Íslandi, eins og þegar við
vorum að berjast gegn álverunum
og öllu þessu, að ef maður fer að ráð­
ast á fólk sem er ósammála manni
fara allir í skotgrafirnar og allt fer í
lás.“
Hún segist hafa orðið sér úti um
símanúmer hjá forsætisráðherra
í gegnum vin vinar. „Ég sagði við
hana: Heyrðu, Katrín, nú ert þú í
forsvari fyrir Norðurlöndin í ár. Ég
ætlaði bara að láta þig vita af því
að ég og Greta ætlum að halda
þennan blaðamannafund áður
en þú ert með þína ræðu, þar sem
við ætlum að skora á ykkur. En vilt
þú kannski bara vera með okkur í
staðinn fyrir að þetta sé svona
24 Helgin 24. september 2022 LAUGARDAGURFRÉTTABLAÐIÐ