Gerðir kirkjuþings - 2021, Qupperneq 9

9
Reglulegt kirkjuþing 2021-2022 hið síðasta á þessu kjörtímabili
Fyrir kirkjuþingi 2021-2022 liggja ýmis mál er varða þá stefnumótun sem áður var
getið um. Auk þessu eru mörg mál sem fela í sér aðlögun að nýjum þjóðkirkjulögum og
samræmingu við löggjöfina. Er þar um að ræða setningu nýrra starfsreglna um málefni
sem áður voru lögmælt, t.d. um kirkjuþing. Jafnframt mál um framangreinda nýja
rekstrarskrifstofu þjóðkirkjunnar.
Samkvæmt bráðabirgðaákvæði þjóðkirkjulaganna falla allar starfsreglur, stefnur og
samþykktir kirkjuþings brott um næstu áramót, nema kirkjuþing ákveði annað. Liggur
því fyrir þinginu að endursetja gildandi starfsreglur eftir því sem þörf er talin á, svo og að
veita tilteknum starfsreglum áframhaldandi gildi tímabundið meðan þær verða athugaðar
nánar.
Biskupsembættið mun vafalaust taka meiri ábyrgð á ýmsum málefnum sem mælt er
fyrir um í starfsreglum í dag og æskilegt er að athuga hvort ekki megi einfalda sumar
starfsreglur og stytta. Í þessu sambandi setti aukakirkjuþing 2021 á laggirnar starfshóp
til að endurskoða allar starfsreglur og brottfallin lög og gera tillögur um framtíðarskipan
þeirra.
Forsætisnefnd flytur nokkur mál á þessu þingi sem einkum tengjast skipulagsbreytingum
á yfirstjórn kirkjunnar og aðlögun að breyttu lagaumhverfi. Í því birtist sú nýja skipan að
þingið hefur orðið mun sjálfstæðara og flytur nú þingmál sem áður hefðu verið flutt af
kirkjuráði. Þannig flytur nefndin tillögur að nýjum starfsreglum um kirkjuþing sem ekki
hafa verið til áður sem heildstæður bálkur. Ákvæði um þingið hafa fram að þessu verið í
starfsreglum um þingsköp, en vegna breytts og aukins hlutverks kirkjuþings er rétt að setja
heildstæðan starfsreglubálk sem fjallar með ítarlegri hætti um þingið sjálft, hlutverk þess
og yfirstjórn. Auk þess fjalla þingsköp fyrst og fremst um vinnubrögð þingsins, fundarsköp
o.fl. þegar það er að störfum. Forsætisnefnd flytur tillögu að nýjum þingsköpum og er þar
m.a. gert ráð fyrir ítarlegri reglum um sérstakt hæfi kirkjuþingsfulltrúa og þeirra sem
seturétt eiga á kirkjuþingi. Er þar byggt á ákvæði 7. gr. nýrra þjóðkirkjulaga, en þar eru
gerðar talsvert ítarlegri kröfur um að gætt sé að sérstöku hæfi þingfulltrúa við meðferð
mála á kirkjuþingi. Þá er gert ráð fyrir að framkvæmdanefnd kirkjuþings verði ein af
fastanefndum þingsins. Nefndin flytur einnig tillögu að nýjum starfsreglum um söfnuði og
sóknarnefndir. Þar er helst nýmæla að tekið er saman í einn starfsreglubálk allt það helsta
sem varðar starf safnaða, þ.e. safnaðarfunda, sóknarnefnda, allt er varðar starfsmannahald
safnaða o.fl. Áður voru ákvæði um þetta bæði í eldri þjóðkirkjulögum svo og núgildandi
starfsreglum um sóknarnefndir.
Hér hefur eingöngu verið tæpt á helstu málefnum sem fjallað hefur verið um á
kjörtímabili þessa kirkjuþings og sem lögð eru fyrir þetta þing. Óhætt mun að fullyrða að
þetta sé eitt starfsamasta kirkjuþing seinni tíma og naumast hafa meiri breytingar orðið á
skipulagi og starfsemi þjóðkirkjunnar síðan árið 1998, þegar gildi tóku ný þjóðkirkjulög á
grundvelli kirkjujarðasamkomulagsins frá árinu 1997.
Önnur mál
Í nýjum þjóðkirkjulögum er hugtakið söfnuður notað í stað hugtaksins sókn. Sókn er nú