Fréttabréf Samtaka lungnasjúklinga - des. 2023, Blaðsíða 3

3
Þegar lungun bregðast
Eftir Helgu S. Ragnarsdóttur
Einn er sá samfélagshópur
sem er ekki sérlega áberandi
og lætur yfirleitt ekki sjá
sig mikið utandyra. Hann er
skipaður þeim, sem af ýmsum
ástæðum, eiga við skerta
lungnastarfsemi að etja. Þeir
eiga það sameiginlegt að
áreynsla, kuldi, vindur og
loftmengun ógnar heilsu þeirra, auk þess sem
þeir geta illa treyst á getu sína til að takast á við
umhverfi sem er þeim ekki vinveitt.
Hindranir af ýmsum toga
Þótt góðir dagar komi er ekki víst að þeir næstu verði
það líka sem gerir erfitt um vik að skipuleggja viðburði,
eða verkefni fram í tímann. Þegar lungnaveikir eru innan
um aðra þurfa þeir að halda aftur af einkennum eins og
slímmyndun, hósta og andnauð. Þegar sjúkdómurinn er
kominn á það stig að notkun viðbótarsúrefnis er orðin
nauðsyn, þurfa þeir að hafa með sér tæki sem segja
umhverfinu skýrt að hér sé lungnasjúklingur á ferð. Tenging
sjúkdómsins við reykingar gerir það að verkum að sumir
álíta að þessi hópur geti sjálfum sér um kennt og vitundin
um þá hugsanlegu afstöðu veitir ekki uppörvun til að fara
á mannamót.
Reykingar ekki eina ástæðan
Það er vissulega rétt að reykingar eru afar óhollar fyrir
lungu. Lungnasjúkdómar eru hins vegar af mörgun
gerðum. Sumir þeirra hafa enga tengingu við reykingar, auk
þess sem ýmsir hafa komist upp með að reykja langa ævi
án þess að þróa með sér sjúkdóm í lungum. Það má einnig
hafa það í huga að fyrir fáum áratugum var lítið vitað um
skaðsemi reykinga fyrir lungu. Þegar fólk er svo byrjað að
reykja kemur ávanaþátturinn til en það er vel vitað að þessi
ákveðna fíkn er hreint ekki sú auðveldasta viðureignar.
Hagsmunasamtök lungnasjúklinga
Lungnasamtökin eru hagsmunasamtök lungnasjúklinga og
annarra sem vilja hafa áhrif á þeirra aðstæður og það er
ýmislegt í aðstæðum lungnasjúklinga sem vert er að reyna
að hafa áhrif á. Við viljum auka með upplýsingagjöf skilning
þeirra stofnana sem hafa með að gera hjálpartæki, lífeyri
og ferlimál, svo eitthvað sé nefnt af því sem gæti bætt
líf lungnasjúklinga og gert þá að virkari þátttakendum í
samfélaginu. Það á vissulega að vera sameiginlegt markmið
þeirra og okkar allra.
Fullt af skemmtilegu fólki!
Á mánaðarlegum félagsfundum okkar hjá Lungna-
samtökunum höfum við kynnst því að í samtökunum er
fullt af hressu og skemmtilegu fólki sem er ákveðið í að
láta eigin erfiðleika lönd og leið og njóta lífsins eins og
það kemur fyrir. Við viljum stækka þann hóp. Það gerir
engum gott að sitja heima, maður er manns gaman og það
er tilvalið að byrja þátttöku innan um jafningja sem hafa
þekkingu á aðstæðum.
Viljum ná til aðstandenda
Annar er sá hópur sem við hjá Lungnasamtökunum höfum
líka mikinn hug á að komast í samband við. Sjúkdómur í
fjölskyldu hefur óhjákvæmilega mikil áhrif á aðstandendur
sjúklings og það fólk myndum við einnig vilja styðja með
öllum tiltækum ráðum. Hins vegar höfum engin ráð til
að ná til fólks, hvorki sjúklinga né aðstandenda, nema að
þeirra frumkvæði.
Engin sjálfkrafa upplýsingagjöf um samtökin
Engin stofnun lætur okkur vita þegar einhver greinist
með lungnasjúkdóm. Þess vegna fer því fjarri að allir
lungnasjúklingar viti af samtökunum. Nýgreindir fá enga
sjálfkrafa vitneskju um tilvist okkar en að okkar mati er
hlutverk samtakanna einna brýnast fyrir nýgreinda.
Upplýsingar, umræða og uppörvun er nauðsyn á því stigi