Fréttabréf Samtaka lungnasjúklinga - des. 2023, Blaðsíða 20

20
Öðruvísi viðhorf til reykinga
Fyrir ekki svo löngu voru reykingarnar heldur ekki álitnar
neitt sérstaklega hættulegar. Þvert á móti þóttu þær bara
töff. Því má ekki gleyma. Kristján rifjar upp atvik frá því
hann var að vinna úti á landi. Þar var einhver karl að svíða
kindahausa inni í litlum, gluggalausum skúr. „Þetta var svo
dásamlega vitlaust,“ segir Kristján og skellir upp úr. „Svo
eftir einhvern tíma kemur karlinn út til þess að fá sér ferskt
loft, alveg kolbikasvartur í framan, dregur pakka upp úr
vasanum og fær sér sígarettu! Alveg það sem hann vantaði
mest eftir að hafa verið innilokaður í allri drullunni og
skítnum!“
Ekkert annað í boði
Kristján varð að hætta að vinna þegar hann veiktist. „Hefði
ég ekki fengið þetta væri ég ennþá að vinna,“ segir hann,
enda nógu mikil kaflaskil að láta af störfum þótt veikindi
eigi þar ekki hlut að máli. „Ég held það sé alveg einsýnt
með framhaldið,“ heldur hann þó áfram, pollrólegur sem
fyrr. „Maður er kominn í þessa blindgötu. Lífið heldur áfram
þótt það sé komin öðruvísi áætlun. Það er eins og það er
og ekkert hægt að breyta því, maður er kominn í þessa
götu og reynir að gera gott úr því. Það er ekkert annað í
boði,“ segir hann að lokum og brosir.
Nokkur orð um áfengi og áfengisnotkun
Eftir Helgu S. Ragnarsdóttur
Upp á síðkastið hefur umræða um áfengisnotkun
eldra fólks orðið talsvert áberandi. Nú er það svo
að ekki ber mikið á því að eldra fólk sé að misnota
áfengi svo það komi í fréttum eins og stundum er
tilfellið með þá ungu þar sem allt fer á hvolf með
áberandi afleiðingum. Það var til skamms tíma
rætt á undirbúningsnámskeiðum fyrir starfslok
að til þess að gera dagamun eftir að allir dagar
væru orðnir eins væri hið besta mál að halda upp
á helgi með því að fá sér svo sem eins og eitt glas
eða einn bjór.
Þetta er ekki lengur ráðlagt. Það hefur nefnilega verið
að koma betur og betur í ljós að áfengisneysla er alltaf
til skaða og ekki síst fyrir okkur sem erum orðin eldri.
Jafnvel drykkja í miklu hófi hefur slæm áhrif á alls kyns
kerfi í líkamanum og ekki síst á starfsemi heilans. Áhrifin
vara lengur vegna hægari efnaskipta og þekkt tengsl við
fallhættu sem og þunglyndi og kvíða ásamt tilheyrandi
tilhneigingu til einangrunar ætti að vera nægilegt tilefni
fyrir hvern og einn til að hugsa sitt ráð þegar kemur að
áfengisnotkun.
Það er líka almennt álit sérfræðinga að notkun áfengis
samhliða svefnlyfjum sé ekkert minna en stórhættuleg.
Það er nú samt svo að mjög margir hafa komist upp með
þá lífshætti, án þess að afleiðingar séu augljósar en það er
líka afar algengt að fólk kvarti undan því að hausinn á þeim
virki ekki eins vel og einu sinni var. Það er nefnilega kannski
ekki hægt að kippa honum úr sambandi á hverju kvöldi
til lengri tíma og ætlast svo til að virknin sé fullkomin að
deginum til þrátt fyrir það.
Hér hefur verið talað um afleiðingar áfengisneyslu
fyrir eldra fólk. En við lungnasjúklingar erum ekki bara
lungnasjúklingar, við eldumst líka. Það er ekki síður
áríðandi fyrir okkur en aðra að huga vel að því sem getur
haft áhrif á almenna heilsu okkar. Okkar líf og heilsa er
verðmæti sem á að passa upp á eftir bestu getu. Um það
hljótum við öll að vera sammál.