Golf á Íslandi - 01.05.2015, Síða 20

Birgir Leifur Hafþórsson, sexfaldur Íslandsmeistari úr GKG, ætlar að
leggja alla áherslu á mót erlendis á þessu ári. Birgir er með takmarkaðan
keppnisrétt á Áskorendamótaröðinni, sem er sú næst sterkasta í Evrópu.
Birgir komst inn á lokaúrtökumótið fyrir Evrópumótaröðina sl. haust.
Opnaði það glugga inn á Áskorendamótaröðina og verða mótin mun fleiri
í ár hjá Birgi miðað við undanfarin misseri. Hann verður einnig með á
nokkrum mótum á Nordic League mótaröðinni.
„Ég ætla að nýta tækifærin sem gefast – hér
heima á Íslandi er markmiðið að leika á
Íslandsmótinu, ef það rekst ekki á mót á
Áskorendamótaröðinni,” segir Birgir Leifur
en hann er búsettur á Íslandi og starfar hjá
Golfklúbbi Kópavogs og Garðabæjar. Hann
hefur því glímt við íslenskar aðstæður í
vetur á undirbúningstímabilinu.
„Þetta hefur gengið ágætlega. Ég hef lagt
áherslu á stutta spilið og líkamsræktina.
Tíminn var vel nýttur samhliða
vinnudeginum.”
Birgir er með skýr markmið fyrir tímabilið
og ætlar að festa sig í sessi á bestu mótaröð
Evrópu. „Ég fæ fleiri tækifæri í ár á næst
sterkustu atvinnumótaröð Evrópu og með
góðum árangri þar get ég fest mig í sessi á
bestu mótaröð Evrópu. Ég þarf að nýta þetta
tækifæri eins vel og ég get - og taka skref
upp á við.”
Stuðningurinn frá Forskoti er mikilvægur
fyrir Birgi og hann vonast til þess að
sjóðurinn eigi eftir að eflast enn frekar á
næstu árum. „Þetta er kostnaðarsöm útgerð
og því er mikilvægt að fá stuðninginn frá
Forskoti. Ég vil koma á framfæri þökkum til
þeirra sem koma að þessum sjóði. Framtíðin
er björt í íslensku golfi og ómetanlegt
fyrir yngri afrekskylfinga að vita af þessu
baklandi og stuðningi. Þannig geta þau látið
drauma sína rætast.”
Birgir Leifur verður 39 ára gamall í
maí á þessu ári en hann hefur verið
atvinnukylfingur frá árinu 1997. Hann er
eini íslenski karlkylfingurinn sem hefur
öðlast keppnisrétt á bestu atvinnumótaröð
Evrópu. Það er enn markmiðið hjá Birgi að
komast inn á Evrópumótaröðina og halda
sér þar í nokkur ár.
„Ég sé þetta þannig fyrir mér að ég verði
búinn að festa mig í sessi á Evrópumóta
röðinni á næstu árum og haldi mér þar fram
til 45 ára aldurs. Eftir það er stefnan sett á
öldungamótaröðina,” sagði Birgir Leifur í
léttum tón.
Þarf að nýta tækifærin sem gefast
20 GOLF.IS - Golf á Íslandi
Ómetanlegur stuðningur úr Forskoti