Dagblaðið Vísir - DV - 25.10.1990, Blaðsíða 5

FIMMTUDAGUR 25. OKTÓBER 1990.
5
í hjarta okkar vitum við að ísland er eitt besta land veraldar
eða það besta, og gjöfult getur það verið ef rétt er á málum
haldið. En hvað er þá að, er kerfið brenglað og landinu
kennt um? Það skyldi þó aldrei vera? Mér er nær að halda
að leitun sé að lýðræðisríki þar sem ofstjórn og kerfishroki
lifa jafn góðu lífi og hér.
Ert þú sammála eða hefur þú verið svo lánsamur að
þurfa aldrei að sækja réttlætismál til ríkisvaldsins og koma
hvarvetna að lokuðum dyrum? Ekki get ég státað af því né
heldur fjöldi fólks sem leitað hefur til mín. Sj álfstæðismenn
verða að berjast gegn sívaxandi drýldni kerfisins. Það gera
ekki aðrir.
Tækifærin til framfara blasa hvarvetna við og
draumarnir rætast þegar frelsisafl fólksins leysist úr
læðingi. Með þetta í huga göngum við nú til prófkjörs um
frambjóðendur í örlagaríkum Alþingiskosningum.
Vindar frjálsræðis leika nú um alla Evrópu og
stjórnlyndi er hvarvetna hafnað. Gömul baráttumál verða
að veruleika eftir langa bið. Því fögnum við og horfum
vonglöð fram á veginn.
Þessum umbyltingum hef ég kynnst við störf mín að
alþjóðamálum, fyrst sem formaður utanríkismálanefndar
og nú Evrópunefndar Alþingis. í samskiptum okkar við
Evrópubandalagið eigum við margra góðra kosta völ og
þurfum aldrei að fórna neinum fiskveiðiréttindum ef
hyggilega er á málum haldið.
Að nýju býðst nú stóriðja og stórvirkjanir. Auðlegð sú
sem felst í hreinu umhverfi er mikilvæg á sviði ferðamála og
matvælaframleiðslu. Þessi tækifæri eigum við hiklaust að
nýta. Hver sigurinn af öðrum vinnst nú í landhelgismálum
og auður sá sem fólginn er í menntun og verkkunnáttu vex
nú óðfluga.
Hægt verður því um vik að bæta kjörin þegar þjóðin
losnar úr álögum vinstristefnu. Pá linnir líka blekkingunni
um kjörin og skattana, enda er nú hver maður að sjá í gegn
um hana. Ljósast snýr þetta að láglaunafólki sem borgar
háa dulda skatta þótt-það eigi ekki til hnífs og skeiðar í
bókstaflegri merkingu. Sú staðreynd að kjara- og
aðstöðumunur er nú meiri á íslandi en verið hefur í áratugi
er svartasti blettur þjóðlífsins. Það er frumskylda
Sjálfstæðisflokksins þegar hann fær völdin að snúast gegn
þessu siðleysi því aðrir gera það ekki.
Með auknum þrótti atvinnulífsins verður auðvelt að
bæta hag sjúkra og aldraðra, efla menningu og menntir og
sækja fram á öllum sviðum. Allt blasir þetta við ef okkur
tekst að sigla framhjá boðum og nýta einstakt
tækifæri til mikilla sigra. Við þurfum að stilla
saman strengina þótt sjálfstæðismenn geti
aldrei orðið sammála um alla hluti, enda
yrði þá lítið úr heilbrigðri
þjóðmálaumræðu.
Ég hef barist gegn forsjárhyggju og ofríki og í
þingflokki Sjálfstæðisflokksins hef ég talið mig leggja mest
á vogarskálarnar sem talsmaður athafnafrelsis og framfara.
Það hefur glatt mig að finna hvatningu og stuðning
sjálfstæðisfólks í Reykjavík við störf mín.
Fyrir fjórum árum sóttist ég eftir þingsæti í Reykjavík,
höfuðvígi frjálslyndis á íslandi og fékk örugga kosningu.
Nú sækist ég eftir afgerandi umboði þínu til enn aukinna
áhrifa og forystuhlutverka til áframhaldandi baráttu gegn
kerfishyggju og ofsköttun.
Með bestu kveðju,
W.
Eyjólfur Konráð Jónsson